Bakıda “Türkiyə–Azərbaycan Qardaşlığı Təhsil Forumu” keçirilib. Yurd.Media xəbər verir ki, Forumun əsas məqsədi iki qardaş ölkə arasında təhsil və elmi əməkdaşlığın inkişaf etdirilməsi olub.
Tədbirdə Üsküdar Universitetinin qurucu rektoru, tanınmış psixiatr və neyroelm mütəxəssisi, professor Nevzat Tarhanın seminarı böyük maraqla qarşılanıb.
Professor Tarhan çıxışında təhsildə insani və etik dəyərlərin vacibliyini vurğulayıb. O bildirib ki, müasir təhsil sistemi yalnız akademik biliklərə deyil, həm də insani keyfiyyətlərin formalaşdırılmasına əsaslanmalıdır. Onun sözlərinə görə, təhsilin əsas məqsədi sadəcə bilik ötürmək deyil, şəxsiyyət yetişdirməkdir. Müəllimlər bu prosesin mərkəzində dayanmalı, yalnız dərs deyən deyil, həm də gənclərə yol göstərən lider olmalıdırlar.
Professor əlavə edib ki, informasiya bolluğu insan beyninə güclü təsir göstərir və bu şəraitdə şagirdlərə düzgün istiqamət verə biləcək müəllimlərə böyük ehtiyac yaranır. O qeyd edib ki, müəllimlər yalnız ixtisas bilikləri ilə kifayətlənməməli, həm də emosional və etik liderlik bacarıqlarını inkişaf etdirməlidirlər.
Nevzat Tarhan çıxışında texnologiyanın təhsildəki roluna da toxunub. O vurğulayıb ki, süni intellekt və rəqəmsal alətlərin düzgün tətbiqi şagirdlərin tənqidi düşünmə və yaradıcılıq bacarıqlarının inkişafına mühüm töhfə verə bilər. Bununla yanaşı, o bildirib ki, texnologiya müəllim-şagird münasibətlərini əvəz edə bilməz, əksinə, bu münasibətləri dəstəkləməlidir.
Forum çərçivəsində müəllimlərlə canlı dialoq və fikir mübadiləsi aparılıb. Onlar təhsil sistemindəki mövcud çətinliklər, şagird motivasiyası, dəyərlərin rolu və texnologiyanın istifadəsi kimi mövzularda fikir bölüşüblər. Professor Tarhan müəllimlərin fikirlərini dinləyib və onlara tövsiyələrini təqdim edib.
Tədbirdə Azərbaycanın müxtəlif bölgələrindən gəlmiş 500-dən artıq müəllim iştirak edib. Seminarın sonunda iştirakçılara sertifikatlar təqdim olunub. Forumda elm, təhsil və siyasət sahəsində tanınmış şəxslər çıxış ediblər.
Qeyd olunub ki, bu forum iki ölkə arasında təhsil sahəsində əməkdaşlıq imkanlarının genişləndirilməsi, ortaq dəyərlərin qorunması və gələcək nəsillərin sağlam, savadlı şəkildə yetişdirilməsi baxımından mühüm platforma rolunu oynayıb.
Seminar eyni zamanda müəllimlərin bilik və bacarıqlarının artırılmasına, onların pedaqoji yanaşmalarının müasir elmi və texnoloji əsaslarla zənginləşdirilməsinə xidmət edib. Forum çərçivəsində təqdim olunan məruzələr, xüsusilə professor Nevzat Tarhanın çıxışı müəllimlərə insan psixologiyası, emosional zəka, etik dəyərlər və texnologiyanın təhsildəki rolu barədə dəyərli və praktik biliklər qazandırıb.
