“Özünü orta güc kimi təsdiq edən Azərbaycan artıq regional böhranların həllində və geosiyasi proseslərdə aktiv iştirakçı rolunda çıxış etməklə, sülhə sabitliyə öz töhfəsini verməkdədir. Ukrayna xarici işlər naziri Andrey Sibiqanın Azərbaycana səfəri və Bakıda keçirdiyi görüşlərdə verilən mesajları bunun bariz nümunəsi hesab etmək olar. Azərbaycan Ukrayna müharibəsi ilə bağlı mövqeyini ilk gündən açıq şəkildə bəyan edib və bu gün də həmin mövqeyindədir. Bu mövqe ondan ibarətdir ki, Azərbaycan müharibənin Ukraynanın ərazi bütövlüyü və suverenliyi çərçivəsində həllinə tərəfdardır. Bunu Azərbaycan Prezidenti dəfələrlə və ukraynalı nazirlə görüşündə də bir daha bəyan edib".
Bunu Ölkə.az-a açıqlamasında Milli Məclisin deputatı Cavanşir Feyziyev deyib.
"İkinci məqam ondan ibarətdir ki, Azərbaycan müharibənin ilk günlərindən Ukraynaya humanitar yardım edib. İndiyədək Azərbaycan 40 milyon dollar həcmində yardım edib. Bu rəsmi rəqəmdir. Bundan əlavə olaraq Azərbaycan ictimaiyyəti də bu prosesdə aktiv iştirakçı olub.
Üçüncü məqam isə ondan ibarətdir ki, Azərbaycan həm də müharibənin gedişi dövründə Ukraynanın quruculuq-bərpa işində iştirak edib və bu proses davam etməkdədir.
Azərbaycan Ukraynanın İrpen şəhərində hücum nəticəsində dağılan məktəbini yenidən bərpa edərək istifadəyə verib. Dördüncüsü, Azərbaycan beynəlxalq platformalarda da Ukraynaya dəstək verən ölkələrdəndir”, - o söyləyib.
Deputat əlavə edib ki, Azərbaycan bundan sonra da Ukraynaya dəstək verməkdə davam edəcək: “Bu, həm siyasi, həm iqtisadi, həm humanitar, həm də quruculuq-bərpa prosesində yaxından iştirak edəcək. 10-11 iyul tarixlərində Romada keçiriləcək Ukraynanın Bərpası Konfransı keçiriləcək və orada Azərbaycan da təmsil olacaq. Xarici işlər naziri Ceyhun Bayramov Bakının bu toplantıda iştirakını təsdiq edərək deyib ki, Ukraynanın bərpası, həm də iqtisadiyyatına investisiya yatırılması prosesində iştirak edəcək. Azərbaycanın Ukraynadakı proseslərdə iştirakı Avrasiya bölgəsində sülhün, sabitliyin, əməkdaşlığın yenidən formalaşmasına töhfə verməklə yanaşı, geosiyasi mövqeyinin möhkəmlənməsinə xidmət edəcək”.
Deputat əlavə edib ki, Azərbaycan son illərdə ümumiyyətlə dünyada beynəlxalq humanitar böhranların aradan qalxmasında özünməxsus yeri və rolu olan ölkədir: “Azərbaycan COVİD-19 pandemiyası zamanı 80-dən çox ölkəyə həcmi on milyonlarla dollarla ölçülən maddi və humanitar dəstək göstərib. Bu ölkələrin əksəriyyəti Azərbaycanın yerləşdiyi bölgəinin hüdudlarından kənarda, o cümlədən Afrika qitəsində olan ölkələr olub.
Azərbaycan hazırda Yaxın Şərqdəki proseslərdə, xüsusən də Suriyanın yenidən bərpasında iştirak niyyətini ortaya qoyub və bu istiqamətdə ciddi işlər getməkdədir.
Azərbaycanın bu rolu beynəlxalq aləm tərəfindəndə də təqdir olunmaqdadır. Azərbaycanın bu rolu Avropa İttifaqı rəhbərlərinin Alnabiyada Avropa Siyasi Birliyinin sammitində cənab Prezident İlham Əliyevlə görüşündə də ölkəmizin daha geniş coğrafiyada sülhə, sabitliyə, əməkdaşlığın yaranmasına verdiyi töhfə təqdir olunub. Romada keçiriləcək Ukraynanın Bərpası Konfransında dəvətə gəldikdə isə bunu Qərbin Azərbaycanı orta güc olması ilə hesablaşması və regional proseslərin həllinə töhfə verə biləcək ölkə kimi qiymətləndirmək lazımdır.
Onu da xüsusilə qeyd etmək istərdim ki, bu gün Azərbaycana qarşı olan ölkələr belə cənab Prezident İlham Əliyevin yürütdüyü siyasətlə hesablaşır. Bu özünü, istər ölkəmizə edilən səfərlər, istər ölkə başçısının xarici səfərləri, istər beynəlxalq tədbirlərdə cənab Prezidentə olan münasibətdə aydın şəkildə büruzə verir. Əminəm ki, bu siyasət Azərbaycanın beynəlxalq münasibətlər sistemində orta güc kimi daha ciddi oyunçu rolunda çıxış etməsi ilə nəticələnəcək”.
