Mətləb Salahov: "Milyarder Tramp açıq-aydın nüfuz, ticarət və sərvətləri talamaq uğrunda çarpışır"
"Hazırda dünya siyasətində ticarət və sərvətlər uğrunda amansız mübarizə gedir. Şəxsən mən ABŞ prezidenti Donald Trampın hakimiyyətə gəldiyi gündən həyata keçirdiyi siyasəti yırtıcı biznes və amansız ticarət müharibəsi kimi xarakterizə edirəm. Diqqət edin: bu adam hakimiyyətə gələr- gəlməz ilk əvvəl Ukraynadakı qanlı böhrana son qoyacağını, dərhal sülh imzalanacağını elan etdi və dünya üçün "sülh mələyi" obrazına büründü. Lakin işlərə yaxından bələd olandan sonra dərhal silah ticarəti üçün istifadə edilən bu qanlı münaqişəni dayandırmaqdan vaz keçib, Kiyevə yardım adı ilə göndərilən milyardların hesabatını tələb etdi.” Bu fikirləri “Bakı-Xəbər”ə açıqlamasında jurnalist-ekspert Mətləb Salahov bildirib. M.Salahov qeyd edib ki, D.Tramp ikinci dəfə hakimiyyətə sırf varlanmaq planları ilə qayıdıb. “Bu adam sırf ticarət maraqları üçün Ukrayna müharibəsinin Avropa liderləri və o zamankı ABŞ prezidenti Cozef Bayden tərəfindən silah ticarəti və milyardlarla dollarların yuyulması üçün "qanlı bazar" kimi istifadə edildiyi faktını da ifşa etdi. Dərhal da Volodimir Zelenskiyə təzyiqlər edib Ukraynadakı təbii sərvətləri ABŞ-a daşımaq üçün müqaviləyə imza atdırdı. Günü bu gün D.Trampın dünya siyasətinə baxışı siyasətdən daha çox ticarət və biznes maraqları üzərində qurulub. Ağ Ev sahibinin Rusiya lideri Vladimir Putinlə sıx əməkdaşlıq siyasəti də məhz ticarət maraqlarına söykənir. D.Trampın ərəb ölkələrinə son səfərini xatırlamaq kifayətdir. Üç ərəb ölkəsi ilə 3 trilyard dollarlıq müqavilələrin imzalanması bütün dediklərimi təsdiqləyən mühüm faktdır. Bu üç ərəb ölkəsi kimlə müharibə edəcək ki, bu qədər silah-sursata ehtiyacları olsun?. Yaxud texnoji istehsalı olmayan bu ərəb ölkələrinin əlavə texnoloji dəstəyə nə ehtiyacları var ki? Bu, sadəcə gülüncdür.D.Tramp müsəlman krallarından “xəracını” toplayıb geri qayıtdı, vəssalam!”
Namiq Quliyev
