Putin Avropanın gücsüzlüyünü hər gün ortaya qoyur...
Mətləb Salahov: “Avropa Liderləri yalvarır, amma Putin məqsədlərinə çatmamış Ukraynada müharibəni dayandırmayacaq”
“İnanmıram ki, Avropa öz tarixi boyu belə gücsüz dövr yaşasın. Keçmiş ABŞ prezidenti Co Baydenin daha çox silah ticarəti üçün “pulsilmə bazarı” kimi yaratdığı qanlı Ukrayna müharibəsi artıq qoca qitənin başına ağır bəla olub. Huşunu itirmiş qoca Baydenin Avropa ilə Rusiyanın sərhədlərini Ukraynadan çəkmək kimi cəfəng “ideyası” ucbatından Ukrayna ölkə kimi dağıdılıb məhv edildi, on minlərlə ukraynalının həyatına son qoyuldu.” Bu sözləri “Bakı xəbər”ə açıqlamasında jurnalist-ekspert Mətləb Salahov bildirib. M.Salahov qeyd edib ki, bu gün ABŞ rəhbərliyi səviyyəsində açıq şəkildə etiraf olunur ki, Ukrayna böhranı həm də Kiyevə yalançı “yardımlar” adı ilə milyardlarla dolların “yuyulması” üçün istifadə olunub.
“Təkcə C.Baydenin oğlunun adının Ukraynadakı qalmaqallı silah ticarətində hallandırılması, həttda onun həbsinin gündəmə gətirilməsi dediklərimə əyani sübutdur. Donald Trampın Ağ Evə gələr-gəlməz Ukraynada “yuyulan” milyardlar barədə hesab tələb etməsi də bu məsələnin pik nöqtəsi oldu. D.Tramp açıq şəkildə Ukrayna böhranın əsl məqsədini ortaya qoydu.
İndi Avropa İttifaqı nə qədər çalışsa və həttda yalvarsa da Vladimir Putini danışıqlar stoluna əyləşdirə bilmir. Həm Rusiya lideri öz gücünə əmindir, həm də Avropa İttifaqının “dişsizliyi” Ukrayna müharibəsinin bitməsinə mane olur. Belə görünür ki, V.Putin öz gizli məqsəd və hədəflərinə çatmamış Ukrayna müharibəsi bitən deyil. Avropa İttifaqının gücsüzlüyü Rusiya liderini Ukraynadan sonra daha böyük hərbi güc nümayişinə sövq edir. Hədəfdə hansı ərazilərdir? – bunu V.Putinin özü bilir. Bu vəziyyətdə yalnız ABŞ-ın güclü təsiri V.Putini fikrindən daşındıra bilər”.
Namiq Quliyev
