Mətləb Salahov: “Qərb Putinin bu ciddi səhvindən yararlanaraq, Moskvanın “iliyinə işləyəcək” görünməmiş sanksiyalar hazırlayır”
“Rusiya lideri Vladimir Putinin Ukraynadakı müharibəyə son qoymaq üçün İstanbuldakı danışıqlara qatılmaması, üstəlik qarşı tərəfə və dolayısı ilə Qərb ölkələrinə qarşı təhqir ritorikasını işə salması Moskva üçün ağır nəticələrə səbəb olacaq. Çünki həmişəki vəziyyətdən fərqli olaraq artıq Ukraynadakı müharibəyə görə əsas günahkar Rusiya lideri göstərilir. Açıq şəkildə görünür ki, V.Putin uzun illərdir davam edən məsuliyyətsiz və saymazyana ritorikasını davam etdirir.” Bu fikirləri “Bakı xəbər”ə açıqlamasında jurnalist-ekspert Mətləb Salahov bildirib. M.Salahovun fikrincə artıq dünya birliyindəki mühüm siyasi qüvvələr və söz sahibi qurumlar Kreml sahibinin bu siyasi şıltaqlıqlarını həzm etmək istəmir və Rusiya əleyhinə həlledici zərbə endirməyə hazırlaşırlar. “Diqqət edin. Artıq Avropa Birliyi Moskva əleyhinə ciddi ticarət embarqosu barədə qərara hazırlaşır. Artıq Almaniya da bu məsələdə dilə gəlib. Almaniya kansleri Fridrix Mers “X” sosial şəbəkəsindəki paylaşımında yazır ki, “Prezident Zelenskinin İstanbula getməsi böyük güzəşt idi. Putin isə gəlmədi – bununla da özünü çətin vəziyyətə saldı. Yeni sanksiyalar paketi hazırdır. Onu çərşənbə axşamı Brüsseldə qəbul edəcəyik”. Bəli, bu o deməkdir ki, Qərb V.Putinin bu ciddi səhvindən yararlanaraq Moskvanın “iliyinə işləyəcək” görünməmiş sanksiyalar hazırlayır. İstanbul danışıqlarını ələ salmaq V.Putinin çox böyük səhvi oldu. Artıq günah keçisi onun özüdür”.
Namiq Quliyev
