Mətləb Salahov: “Bölgədə mühüm siyasi və iqtisadi oyunçuya çevrilən Azərbaycanla sıx əlaqələr qurmaq Aİ üçün vacib məsələdir”
“Avropa İttifaqının Xarici siyasət və təhlükəsizlik məsələləri üzrə ali nümayəndəsi Kaya Kallasın Azərbaycana etdiyi səfər təkcə ikitərəfli münasibətlərdə mühüm bir dönüş nöqtəsi kimi qiymətləndirilməməlidir. Bu səfər daha çox bir sıra aspektlərdə dəyərələndirilməlidir. İlk öncə xanım K.Kallasın səfəri Avropa İttifaqının Azərbaycana olan ikili münasibəti fonunda baş tutub.” Bu barədə jurnalist-ekspert Mətləb Salahov “Bakı xəbər”ə açıqlamasında deyib. O vurğulayıb ki, ali Avropa qurumunun Azərbaycanla tərəfdaşlıq siyasətinə başlaması İrəvandakı revanşistləri də təşvişə salıb: “ Məlumdur ki, 44 günlük vətən müharibəsindən sonra bir sıra Qərb institutları, əsasən də Aİ Azərbaycana qarşı son dərəcə qərəzli mövqedən çıxış edərək açıq şəkildə ermənipərəst siyasət yürüdüblər.”Sülh müşahidəçisi” adı altında hərbi mütəxəssis qrupunun Azərbaycanla sərhəddə yerləşdirilməsi, Ermənistanın iqtisadi dirçəlişi üçün deyil, məhz Azərbaycana qarşı qisas müharibəsinə hazırlaşması üçün 100 milyonlarla dollarların İrəvana ötürülməsi çox yaxın tarixdə baş verib.
K.Kallasın Bakı səfəri, onun Prezident İlham Əliyevlə keçirdiyi görüş, Azərbaycan xarici işlər naziri Ceyhun Bayramovla apardığı müzakirələr Azərbaycan-Aİ əlaqələrinin yeni mərhələyə qədəm qoyması üçün mühüm proses oldu. Bu ən azından Aİ-nın neçə illərdir özü barədə formalaşdırdığı ermənispərəsət imicinin dağılmasına kömək etmiş oldu. Əlbətdə Aİ-nın ermənipərəstlik reputasiyasından qurtulması üçün bunun davamının gətirilməsi hər şeydən vacibdir. Bu olacaqmı?- hər şeyi zaman göstərəcək. Amma K.Kallasın bu səfərinin digər bir önəmli tərəfi, ötən həftə Çin ilə mühüm iqtisadi tərəfdaşlıq sənədləri imzalayan Azərbaycanla əlaqələrə Aİ-nın verdiyi böyük dəyərdir. Bu qurumda gözəl anlayırlar ki, birtərəfli ermənipərəst siyasət bu mühüm Qərb strukturunun Cənubi Qafqazdakı proseslərə müdaxiləsini əngəlləyir. Çünki Azərbaycanla işgüzar əməkdaşlıq olmadan bölgədə baş verənlərə qoşulmaq, siyasi aktivliyini təsdiqləmək mümkünsüzdür. Xüsusilə nəzərə alsaq ki, Çin ilə mühüm iqtisadi layihələr reallaşdırmağa hazırlaşan Azərbaycanı mühüm iqtisadi aktivlik və güclü dəstək gözləyir, o zaman Aİ-nın rəsmi Bakı ilə münasibətləri yoluna qoymaq istəyini başa düşmək çətin deyil. Amma bu səfərlə bağlı Ermənistan mediasında yaranan təşviş daha çox diqqəti çəkir. Erməni ekspert və siyasətçilər Aİ-nın rəsmi Bakı ilə arasını düzəltmək istəyinin ermənispərəst siyasəti arxa plana keçirməsindən qorxurlar. Onlar da anlayırlar ki, bu birtərəfli erməni “sevgisi” çox da davam edə bilməzdi. Çünki iqtisadi maraqlar siyasətin önündə gəlir. Diqqət edin: K.Kallasın Bakı görüşlərində Azərbaycanın Xəzər-Qara dəniz regionunda oynadığı strateji rol, habelə Avropanın enerji təhlükəsizliyinin təmin olunmasında iştirakının önəmi xüsusi vurğulanıb. Bu gün Azərbaycan Avropanın 10 ölkəsinə təbii qaz ixrac edir və qaz təchizatının coğrafi şaxələnməsi baxımından qitədə lider mövqeyindədir. Bu isə o deməkdir ki, qarşıdakı illərdə daha böyük siyasi və iqtisadi oyunçuya çevriləcək Azərbaycanla sıx əlaqələr qurmaq Aİ-nın planlarına daxil olan vacib məqamdır. Ən azı ona görə ki, Aİ bölgəmizdə formalaşmaqda olan yeni münasibətlər sistemindən, xüsusilə Çinin iştirakı ilə bölgədə qurulacaq yeni iqtisadi proseslərdən kənarda qalmaq istəmir.”
Namiq Quliyev
