Mətləb Salahov: “Hazırkı Ermənistan hakimiyyəti açıq şəkildə qanlı revanşa sürüklənir”
"Ermənistanın baş naziri Nikol Paşinyan artıq ənənəvi erməni hiyləgərliyini də arxada qoyub. Dövlət və siyasət işində naşı kimi göstərilən bu adam, onu siyasi mənada pultla idarə edənlərin birbaşa diktəsi ilə Azərbaycanla hərbi toqquşma üçün gün sayır. Artıq son günlər erməni ordusu tərəfindən mövqelərimiz intensiv şəkildə atəşə tutulur. Mətbuatda gedən məlumatlardan aydın görünür ki, artıq erməni hərbi birləşmələrinin bir sıra istiqamətlərdə hərəkətlliliyi də müşahidə olunur. Düzdür, bir neçə gün öncə Parlamentin son iclasındakı çıxışında N.Paşinyan Azərbaycanla müharibənin mümkünlüyü qəti şəkildə istisna edərək, sülh bəyanatları səsləndirdi. Lakin bu Adolf Hitlerin 1941-ci ildə, ikinci dünya müharibəsi öncəki gedişinə bənzər gedişdir.”
Bu fikirləri “Bakı xəbər”ə açıqlamasında jurnalist –ekspert Mətləb Salahov bildirib. M.Salahov qeyd edib ki, hazırkı Ermənistan hakimiyyəti Avropa Birliyinə üzvlüklə bağlı ilk addımları atmaqla həm ilk tapşırıqları icra etməyə başlayıb, həm də bölgədə “Rusiyasız Qafqaz” siyasətinə start verib. “Əslində “Rusiyasız Qafqaz” ideyası Emmanuel Makron və Avropa İttifaqının funksionerlərinə aid ideyadır. Fakt budur ki, N.Paşinyan bu ideyanı gerçək etmək üçün çalışır. Eyni zamanda ABŞ Prezidenti Donald Trampla düşmənə çevrilən Avropa liderləri, Ermənistan vasitəsi ilə Cənubi Qafqazda ABŞ liderinin dostluq etdiyi Vladimir Putini sıxışdırmaq və burada bufer zona yaratmaq üzərində işləyirlər. Bu, açıq-aydın belədir. Qərb ona görə Cənubi Qafqazda möhkəmlənməyə çalışır ki, bu strateji bölgədə gələcək on illiklər boyu Rusiya təsiri olmadan Yaxın Şərqə qədər geniş təsir zonası yarada bilsin. Hazırda Qərb başbilənləri bu planlar üçün hazırkı Ermənistan hakimiyyətini “itaətkar icraçı” işinə seçiblər və görünən odur ki, Azərbaycanı hədəf seçməklə gələcək planlar üçün hazırlıq görürlər.” M.Salahov qeyd edib ki, Ermənistanın silahlandırılması işinə şəxsən Fransa prezidentinin özü nəzarət edir və bu o deməkdir ki, erməni sevgisində Makrondan geri qalmayan Avropa İttifaqınının rəhbərləri bu qədər silah-sursatı və yüz milyonlarla dolları İrəvana göz dağı olsun deyə yollamırlar: “Daha bir məqama diqqət edək. Həm N.Paşinyan, həm də onun komandasında təmsil olunanlar nə qədə\r çığır-bağır salıb sülh barədə danışsalar da, əməli addım gələndə sülhdən əsər əlamət yoxdur. Əvvəla hazırkı Ermənistan hakimiyyəti sülh məsələsi üçün lazım olan iki əsas məsələni həll etməyib. Birincisi, Azərbaycana qarşı ərazi iddiaları ilə “zəngin olan” hazırkı Ermənistan Konstitusiyasında heç bir dəyişiklik edilməyib. Bunun üçün heç bir əməli addım da görünmür. Halbuki Konstitusiya dəyişikliyi Sülh Sazişi üçün ən vacib məqamdır. İkincisi, Ermənistan cəmiyyətinin sülh prosesinə hazırlanması. Bu isiqamətdə də nəinki irəliləyiş yoxdur, əksinə ənənəvi erməni daşnak təfəkkürü son bir neçə ayda daha aqressiv forma alıb. Azərbaycana qarşı nifrət isterikası belə görünür ki, erməni cəmiyyətini heç vaxt tərk etməyəcək. Çünki bütün dövrlərdə Errmənistanın dövlət siyasətində işğalçılıq başlıca ideologiya olub. Heç bir erməni siyasətçi görünür ki, bu isterikadan imtina edənə oxşamır. Əksinə, bu cür xəstə ictimai şüur həm erməni siyasətçilərinə, həm də bölgədə mühüm maraqları olan böyük dövlətlərə Azərbaycana qarşı işğalçılıq planları həyata keçirmək üçün vacib məqamdır. Bu isə o deməkdir ki, bu gün erməni cəmiyyəti Azərbaycanla sülhə hazır deyil. Sülh, təkcə sənəd üzərində qazanılmır, həm də insanların şüurunda qazanılır.”
Namiq Quliyev
