Mətləb Salahov: "Daima Azərbaycan əleyhinə qatı düşmənçilik sərgiləyən bu təşkilat, artıq ABŞ-ın öz maraqları üçün də ciddi təhlükəyə çevrilib"
USAİD-i daha çox keçmiş sovet ərazilərində və Yaxın Şərqdə yaxşı "tanıyırlar". Ölkələrin daxilində təxribatlar törətməkdə və cəsus şəbəkəsi formalaşdırmaqda, Qərb siyasi kursuna "yox" deyən hakimiyyət və qüvvələrin sıradan çıxarılmasında, iğtişaşlar yaradılmasında və informasiya təxribatlarında adı daima hallanan USAİD, artıq ABŞ-ın özü üçün də ciddi təhlükəyə çevrilib. Ağ Ev-ə yenicə qədəm qoyan Donald Tramp və onun komandası artıq bu xoşagəlməz təşkilatın fəaliyyətini dayandırmaq üçün əməllicə işə başlayıblar. ABŞ Dövlət İdarəetməsinin Səmərəliliyi Departamentini (DOGE) idarə edən İlon Mask "X" sosial şəbəkəsində paylaşımında bəyan edib ki, artıq USAID-in ləğvi prosesindədirlər: "USAID bərpa oluna bilməz". Məlum olduğu kimi, ötən həftə administrasiya ABŞ-nin xarici yardımlarını dondurub. Mask USAID agentliyini Çin laboratoriyasını maliyyələşdirməkdə ittiham edib. Amerikada iddia edilir ki, koronavirus məhz bu laboratoriyadan yayılıb. İlon Mask bunlarla bağlı müvafiq bəyanatları öz "X" hesabında dərc edib. Bildirilib ki, Tramp hökuməti dünya miqyasında göstərilən on milyardlarla dollar həcmində yardımı dayandırmaqda israrlıdır. Jurnalist-ekspert Mətləb Salahov "Bakı-xəbər"ə açıqlamasında bildirib ki, son bir neçə il ərzində USAİD artıq idarəolunmaz həddə çatmışdı. M.Salahov qeyd edib ki, yüzdən çox ölkədə fəaliyyət göstərən təşkilat 50 milyard dollardan çox büdcəyə malikdir ki, bu da onun fəaliyyət mexanizminin ABŞ-ın çərçivəsindən çıxaraq idarəolunmaz şəkil almasına rəvac verir. "Bu təşkilat barədə danışarkən ilk növbədə ölkəmiz Azərbaycana olan münasibətini önə çıxarmalıyıq. Qatı ermənipərəst Samanta Pauerin başçılıq etdiyi USAİD daima Azərbaycan əleyhinə olan bütün proseslərdə "bayraqdar" rolu oynayıb. Əlbəttdə informasiya, güclü maliyyə və siyasi dəstək tapmaqda. Azərbaycan əleyhinə olan ən kiçicik təxribat xarakterli məlumatı dərhal şişirdib öz maraqlarına uyğun dövriyyəyə buraxan bu təşkilat ölkəmizə qarşı amansız mənfilikləri ilə seçilirdi. USAID başqa ölkələrin daxilini qarışdırmaq məsələsində "mahir ustadır". Bu təşkilat analoji fəaliyyətini illər öncə Azərbaycanda da həyata keçirməyə çalışıb, lakin cəhdləri baş tutmayıb. Belə ki, təşkilat müxtəlif qrant və ianələr hesabına Azərbaycanda öz planlarını reallaşdırmağa cəhd göstərib. USAİD-in ən böyük qərəzi və riyakarlığı ondadır ki, onun rəhbərləri Bakıda səfərdə olarkən Ermənistandan - tarixi torpaqlarından qovulmuş 300 minə yaxın qərbi azərbaycanlının heç biri ilə görüşməyib. Qurum onlara heç bir yardım etməyib. Qərb siyasi institutları sırasında yer alan USAID heç vaxt Ermənistanın Azərbaycana qarşı təcavüzünü pisləməyib, bir milyondan çox qaçqının öz torpaqlarına qayıtması üçün səy göstərməyib. Ermənistanın azərbaycanlı əhaliyə qarşı törətdiyi vəhşiliklər barədə bircə sətir də olsun məlumat yaymayan bu təşkilat, bunun əksinə olaraq daima rəsmi Bakı əleyhinə olmazın hədyanlar yağdırıb. Bunlar hər kəsin gözü qarşısında olan real həqiqətlərdir. "USAİD 1992-ci ildən bəri Ermənistana 3,3 milyard dollar sərmayə yatırıb"
Bu təşkilatın ikili siyasətini göstərən daha bir fakta müaricət edək. 1991-ci ildən USAlD "Azərbaycana dəstək" proqramlarına 450 milyon dollardan çox vəsait sərf etsə də, Gürcüstana 1,8 milyard, Ermənistana isə 1992-ci ildən bəri 3,3 milyard dollar sərmayə yatırıb. Hazırda 22 layihə üzrə İrəvana dəstək davam edir. Bu rəqəmlər birbaşa USAİD-in əsl mahiyyətini ortaya qoyur. Azərbaycanın xarici işlər naziri Ceyhun Bayramov Gürcüstanın xarici işlər naziri Maka Boçorişvili ilə görüşdən sonra keçirilən birgə brifinqdə USAİD barədə rəsmi Bakının mövqeyini ifadə edib. "Biz bir daha şahid olduq ki, USAID-in yardımları xoşniyyətli deyil. Ona görə də ölkəmizə qarşı qərəzli və zərərli siyasi xətt tutan USAID-in fəaliyyəti 2024-cü il iyunun 1-dən etibarən de-yure dayandırılıb". Bəli, bir sıra Qərb qurumları Azərbaycanın daxilində olmazın təxribat şəbəkəsi formalaşdırmaq üçün "can yandırıblar". Ölkəmiz dövlət müstəqilliyi əldə etdikdən sonra USAID, Milli Demokratiya İnstitutu, "Fridrix Nauman", "Marşall", IREX və digər bu kimi qurumlar ölkəmizdə fəaliyyət göstəriblər. Onlar aldıqları təlimatlar əsasında ölkədə "5-ci kolon" formalaşdırmaq və ondan siyasi hakimiyyətə qarşı təzyiq vasitəsi kimi istifadə etmək missiyasını yerinə yetiriblər. USAID bu məsələlərdə daima ön yerdə qərarlaşıb. İndi görünür ki, bu təşkilat həm də qlobal dərəcədə cinayət və təxribat oyunlarında da "fəallıq" göstərib. Onun Çin laboratoriyalarında hazırlanan virus epidemiyaları barədə ittiham olunması daha dəhşətli mətləblərdən xəbər verir. Görünür D.Tramp bu təşkilatın fəaliyyətini dayandırmağı çox əvvəl düşünübmüş."
Namiq Quliyev
