Mən yazıma onunla başlayım ki, internet əsrində cənnətə getmək üçün fırldaqçılara 7 min manat ənam verənləri, ölüsünə 25-30 min manatlıq başdaşı qoyduranları, məzarlıq başında şəhərcik yaradıb ora internet çəkdirənləri, məzar başında bahalı çılçıraqlar və oturmaq üçün son dəb oturacaqlar quraşdıranları, "dini toy" adı ilə eşşək anqırtısı çıxarıb cibini pullarla dolduranları, tort kəsib ətrafında dövrə vurub mahnı oxuyanları görəndən sonra, rəhmətlik Cəlil Məmmədquluzadə yaşasaydı yəqin ki, bircə bunu deyərdi – ÖLÜLƏR!
Əslində o kişinin qoyub getdiyi zamandan bəri ancaq qazalaq- faytonu bahalı avtomobillərlə, balaca kənd evlərini 20-25 mərtəbəli göydələn "novostroykalar"la, "poçt qutusu"nu da internet, tik-tok və vatçapla əvəzləmişik, başqa heç bir dəyişiklik filan yoxdur. Yəni edə bildiyimiz bunlardır. Amma əsrlərdir tərgidə bilmədiyimiz, həmişə əzabını çəkdiyimiz əsas məsələ yenə yüz illərdir bizimlə yol gəlir. Heç cürə dəyişə bilmədəyimiz, daha doğrusu xilas ola bilmədəyimiz bir məsələ qalır – DÜŞÜNCƏ VƏ HƏYATA BAXIŞIMIZ! Bax bu məsələdə indi əvvəlkindən daha pis axsayırıq. Nə düşüncəmizdə dəyişiklik var, nə də həyata baxışımızda. "Poçt Qutusu"ndan ötən əsrlərdə bütün millətlər və xalqlar çox dəyişdi, yeniləndi, təkmilləşdi, bir bizdən başqa. Bizdən qat-qat geridə olan xalqlar başa düşdülər ki, ziyanlarına nədir, xeyirlərinə nə, necə qabağa getmək olar. Onların əksinə olaraq təkcə biz özümüz - özümüzə düşmən olmağı, qabağa gedənimizin ayağından tutub dala çəkməyi, bir-birimizə ürək yandırmaq əvəzinə bir-birimizi didişdirməyi tərgidə bilmədik. Dəqiq yadımdadır, 2020-ci ildə, pandemiyanın qızğın vaxtı Bakıda qoruyucu maska tapmaq qızıl tapmaqdan çox qəliz idi. Qəhətə çəkmişdilər apteklərdə qoruyucu maskaları. Sən demə yerli işbazlar bu qoruyucu maskaları qanı bahasına iranlılara satmağa girişmişdilər. "Millət necə tarac olur olsun nə işim var, düşmənlərə möhtac olur olsun nə işim var" məsəli yenə iş başında idi. Tanış "təfəkkür", tanış tamahkarlıq...
Nə isə gələk MƏTLƏBƏ, Mətləb də odur ki, son günlər ölkə mətbuatında bahalı başdaşları qoyanlar barədə yazılar hər gün çoxalmaqdadır. Bir para gerizəkalı, dünyagörüşü və savad problemi olanlar guya əzizlərini "qiymətə mindirmək" üçün başlayıblar 25-30 min manatlıq başdaşları qoydurmağa. Həttda bunu səviyyəsiz efirlərdə milyonarla insanın qarşısında deməkdən utanmırlar. Sanki fəxr ediləsi, rəhmətə gedən atası üçün əsl övladlıq edirmiş kimi qürrəlinəsi iş görüblər. Bu cahil, amma bolluca pul - para sahibləri o qədər düşüncəsiz, kütbeyin sürüsüdür ki, qəbiristanlıqda belə ucuz şounun yalnız pul itirməkdən başqa heç nəyə yaramadığını anlaya bilmirlər. Bəlkə də anlayırlar, lakin min bir qaranlıq yollarla "qazanılmış" pullarla məzarlıqda belə özlərini reklam etmək, digərlərindən fərqləndirmək xəstəliyi onları rahat buraxmır axı. Ay düşük gədə, axı sağlığında qara qəpik qiymət qoymadığın çuvalsız atana ən bahalı mərmərdən baş daşı qoymaqla ölmüş dədənimi "qiymətə mindirirsən", yoxsa sadəcə özünə reklam qazanırsan? Axı bu cahil və gerizəkalı imic sənin nəyinə gərəkdir? Bu savadsız gədə-güdə yığını trilyard dollar cah-cəlal sahibi olan Səudiyyə şahzadəsinin yarım metrlik sadə ağ daşdan olan məzarını heç görüblərmi? Türkiyəli məşhur milyarderlərin, böyük sənət adamlarının məzarlarını necə, görüb seyr ediblərmi? Əlbəttdə rüşvətlə, onun-bunun haqqını yeməklə milyonlar yığmaqdan, sosial şəbəkələrdə "maska tutmaq"dan, cinsi azlıqlara sponsorluq etməkdən başları ayılarsa, dünyada olub keçənlərdən xəbərdar olarlar...
Görün din-iman necə ucuzlaşdırılıb ki, Həcc, Kərbəla, Məşhəd ziyarətləri əməlli-başlı biznes və qanı-qiyamətinə turistik qazanc mənbəyinə çevrilib. İndi bu yerlərə bir nəfər üçün gediş-gəliş haqqı fantastik qiymətə təklif edilir. Həcc ziyarəti bir nəfər üçün 10 min manata,Ümrə-Kərbəla ziyarəti 7500 manata başa gəlir. Məgər bu qədər pulu turistik ziyarət xətrinə, "Kərbəla","Hacı" adlandırılmaq üçün ərəblərin büdcəsinə xərcləməyə dəyərmi? Açıq-aşkar görünür ki, din pərdəsi altında özünə əməllicə qazanc yeri tapan işbazlar avam kütləni soyub-talamaq üçün hər il qiymətləri "ceyran belinə" mindirirlər. İnternet əsrində dini bu şəkildə başa düşən, cənnətə düşmək üçün hansısa fırıldaqçıya 7 min manat rüşvət verən cəmiyyətin anlamalı olduğu bir həqiqət var: Allahı sevmək, ona sevgisini göstərmək üçün ilk növbədə ƏMƏL İBADƏTİ etməlisən. Gözəl əməl sahibi olmaq, Allahını daima başının üstündə görmək və hər gün vicdanının səsinə qulaq asmaq üçünsə min kilometrlərlə yol qət etməyə, ərəbin, farsın xəzinəsinə hər il yüz minlər ödəməyə ehtiyac yoxdur...
Mətləb Salahov
