Mətləb Salahov: "Bütün standartlardan min dəfə uzaqda olan Ermənistanı Avropa İttifaqına üzv kimi göstərmək Qərbdəkilərin bölgədəki planlarına hesablanıb"
"Nikol Paşinyan və arxasındakı Qərb dairələri Ermənmistanı yeni bir böhrana sürükləməkdədirlər. Amma təkcə böhran deyil, həm də xam xəyal, təhlükəsizlik risqi, Rusiya ilə bu dəfə daha şiddətli gərginlik, üstəgəl Qərbin qanlı planları üçün açıq laboratoriyaya çevrilmək. Qonşu Gürcüstanda istəyinə çata bilməyən Qərb strategləri Emmanuel Makronun təhriki ilə indi də Ermənistanı "test" edirlər." Bu fikirləri "Bakı xəbər"ə açıqlamasında jurnalist-ekspert Mətləb Salahov bildirib. M.Salahov qeyd edib ki, Qərbdəkilər bu məsələdə son dərəcə israrlıdırlar. "Bilə-bilə ki, Rusiya qoşunları Gümrüdə yeyib-yatır, bilə-bilə ki, Rusiya heç vaxt əsrlər boyu "kəbinli arvad" kimi yanaşdığı Ermənistanı əldən buraxan deyil, bunlar yenə bu məsələdə israr edirlər. Amma Qərbdəkilərin bu sadaladıqlarımın heç biri veclərinə belə deyil. Olan erməniyə olacaq, Qərbdə oturanlara nə?. Təki Cənubi Qafqazda planları işə düşsün, təki xaos və qanlı qarşıdurma cəbhəsi yaratsınlar. İndi də N.Paşinyanı cuşa gətirib Ermənistanın Avropa İttifaqına üzvlüyü barədə şou yaratmağa və referendum keçirməyə can atırlar. Heç bir məntiqə, siyasi yanaşmaya qəti şəkildə uyğun gəlməyən maymaq iddiadır bu.
Rəsmi İrəvan Avropa İttifaqına üzvlük məsələsini ortaya atsa da, bu istiqamətdə ölkəyə əngəl olacaq kifayət qədər nüans var. İlk olaraq, bu quruma üzv olmaq üçün Avropa qitəsində yerləşmək ən mühüm tələblərdəndir. Ermənistan isə Asiyada yerləşir. Təşkilatın prosedur qaydalarına müvafiq olaraq, Avropa İttifaqı Şurası üzvlüklə bağlı ərizəni yalnız yekdilliklə rədd və ya təsdiqləyə bilər. Bir çoxlarının fikrincə, Ermənistan hakimiyyətinin təsir gücü zəif olduğundan demokratik institutların fəaliyyətinə hər hansı bir məhdudiyyət tətbiq edə bilmir. Belə olduğu təqdirdə isə xaricdə Ermənistanda demokratiyanın olduğu barədə saxta "imic" formalaşır. Yəni təşkilat ölkə daxilindəki vəziyyəti analiz etsə, hər şeyin əslində sadəcə yalandan ibarət olduğu aşkara çıxacaq. Əlbəttdə, analiz etmək istəsə. Amma onlar bunu istəmirlər axı.
Bundan başqa, Ermənistanın təşkilata üzv olmaq üçün qarşısında duran əngəllər sadəcə bununla da bitmir. Aİ-yə üzv ölkələrin hər birinin dövlət sərhədlərini mühafizə etməyə qadir olduğunu düşünsək, İrəvanın yenə də bu normativlərdən kənarda qaldığını söyləyə bilərik. Eyni zamanda, təşkilata namizəd, yaxud üzv ölkələrin ərazisində NATO istisna olmaqla başqa dövlətin qoşunu yoxdur. Amma İrəvanın sərhədlərini hazırda Qərbin ən böyük düşməni hesab etdiyi rusiyalı hərbçilər qoruyur. Məlum olduğu kimi, Şimal qonşumuzun 102 saylı hərbi bazası Ermənistanda, Gümrüdə yerləşir. Bundan başqa Ermənistan həmçinin Rusiyanın iqtisadi vassalıdır. Ermənilər Avropadan deyil Rusiyadan qidalanırlar. Bu isə o deməkdir ki, Ermənistan iqtisadi baxımdan da Moskvadan asılı durumdadır. Yəni həm regional şərait, həm də Ermənistanın Cənubi Qafqazda işğalçı dövlət kimi tanınması onun təşkilata üzv olmasını qeyri-mümkün edir. Üstəlik, İrəvanın bir müddət öncə dəyişdirilməsinin vacibliyi vurğulanan qanunlar toplusunda Azərbaycana qarşı ərazi iddiaları yer alır. Bütün bunların müqabilində ölkənin Avropa İttifaqına üzvlüyü müşkül məsələdir.
Ermənistanın Avropa İttifaqı ilə bağlı xam xəyallar qurmasında, yuxarıda qeyd etdiyim kimi, Fransanın, hazırkı Yelisey Sarayında outran E.Makronun da xüsusi rolu var. Belə ki, E.Makron N.Paşinyanı Qərb liderləri üçün siyasi vitrinə çıxarmaqla rəsmi İrəvan Parisin himayədarlığı sayəsində quruma üzv olacağını düşünür. Şübhəsiz, bu düşüncə çox yanlışdır. Çünki Makron hakimiyyəti sadə ermənilərin gələcəyinə görə deyil, məhz öz şəxsi maraqları üçün rəsmi İrəvanla müttəfiqlik edir. Paris Cənubi Qafqazda öz ambisiyaları üçün manipulyasiyalara əl atır. Bundan düzgün nəticə çıxara bilməyən Simonyan kimi xəyalpərəstlər isə Rusiya faktorunu nəzərə almadan asanlıqla Qərbə yönələ biləcəklərini düşünürlər. Ermənistanın hakim dairələri ölkənin mövcudluğunun Rusiyaya bağlı olduğunu unudurlar. Halbuki, İrəvanın gələcək addımlarının məhz Rusiyadan asılı olduğu hər kəsə məlumdur. Yəni Fransa nə qədər Ermənistana yalan vədlər versə də, hayların müstəqil addım ata bilməyəcəyi gün kimi məlum məsələdir. Bölgədə yaşayan hər xalqa gözəl məlumdur ki, ermənilər gec-tez yenə Rusiyanın qucağına yürüyəcəklər. Onların adəti həmişə belə olub.
Rusiyanın Ermənistanın Aİ sevasına münasibəti də gecikməyib. Öz növbəsində Rusiya hakimiyyəti dərhal Ermənistana xəbərdarlıq edib ki, eyni zamanda Aİ və Aİİ üzvü olmaq mümkün deyil. "İki fərqli təşkilatın üzvü olmaq, hipotetik olaraq, sadəcə olaraq mümkün deyil. Bir gömrük məkanı var, malların, xidmətlərin, insanların və kapitalın sərbəst hərəkəti zonası var - müxtəlif qaydalar var", - Rusiya prezidentinin mətbuat katibi Dmitri Peskov bildirib. Eyni zamanda, o, Avropaya inteqrasiyanın İrəvanın "suveren hüququ" olduğunu vurğulayıb və "bir çox onilliklər ərzində Aİ-yə üzvlüyü diqqət mərkəzində saxlayan, lakin Brüsseldən o qədər də qarşılıqlı münasibətlə qarşılaşmayan" Türkiyənin nümunəsini xatırladıb.
Əlbəttdə, o da gün kimi aydındır ki, Ermənistan nə indi, nə bir ildən sonra, nə də beş ildən sonra Avropa İttifaqına üzv olmayacaq. Lakin Avropa İttifaqı ilə danışıqlar prosesində öz layihələrinə qoşulmaq, ondan pul qoparmaq, eləcə də iqtisadi, siyasi, hətta hərbi dəstək almaq istəyir. əslində bu cür ambisiyalara düşmək bölgədə hər kəsin üz çevirdiyi Ermənistana Qərbdən daha çox pul qoparmaq üçün göydəndüşmədir. Bu prosesdən çıxarılan yeganə məntiq budur ki, xəyal belə olsa bu planda N.Paşinyanı şəxsən Qərb qurumlarından qoparacağı milyonlar, Qərbdəkiləri isə Cənubi Qafqazda yeni xaos ocağı yaratmaq düşündürür. Hər kəs qazanmaq istəyir, Ermənistan itirsə belə.."
Namiq Quliyev
