Mətləb Salahov: "Ermənistanın açıq şəkildə silahlandırılması bölgədə gələcək qanlı təxribat planlarının masada olduğunu göstərir" Ermənistan yenə qızışdırılır. Cənubi Qafqaza təsir uğrunda mübarizədə Adolf Hitlerdən daha çox canfəşanlıq edən hazırkı Qərb dairələri, bölgədə sülh əvəzinə qan-qada axtarırlar. Onlar faşist fürerdən fərqli olaraq bu məsələdə öz ordularına deyil, birbaşa bölgədə faşist dövləti imici qazanmış, birinci Qarabağ müharibəsi zamanı azərbaycanlı körpələri analarının gözü qarşısında şişə çəkən erməni faşizminə "stavka" edirlər. Təlxək "inqilabçı" kimi İrəvanda hakimiyyətə gətirilən Nikol Paşinyanda deyəsən həm də "şeytan tükü" var. Bu adam hakimiyyətə gəldiyi gündən bircə qələbə üzü görməyib. Azərbaycanla 44 günlük müharibədə acınacaqlı məğlubiyyət görən N.Paşinyan, Ermənistanda sosial və siyasi islahatlarda da dişə dəyəsi heç bir uğura imza atmayıb. Amma Qərbdəkilər saqqalını qırxmış bu balacaboy Nikoldan möhkəm yapışıblar. Maraqlıdır ki, ölkədaxili sorğuda da Nikol Vavayeviç keçmiş iqtidar sahibi olan Serj Sarkisyanı və Robert Köçəryanı dəfələrlə üstələyir. Bu isə ən azı o deməkdir ki, erməni cəmiyyəti qeyri peşəkar dövlət adamı təsiri bağışlasa da, N.Paşinyanı müharibə caniləri olan olan keçmiş prezidentlərdən üstün tuturlar. Fakt budur. Erməni ictimai fikrinin bu durumu Qərbdəkiləri də N.Paşinyanı seçməyə vadar edir. Jurnalist – ekspert Mətləb Salahov "bakı-xəbər"ə açıqlamasında bildirib ki, hazırkı Ermənistan iqtidarını ayaqda saxlamağa çalışan Qərb dairələri Cənubi Qafqaz planlarını məhz bu rejimin üzərindən reallaşdırmağa çalışırlar. Bunun üçün güclü silah-sursat, yüz milyonlarla dollarlar peşkeş edilir.. "Əlbəttdə, rəsmi Bakı bütün bunları anbaan müşahidə edir və Azərbaycan cavab tədbirlərini hazırlamamış deyil. Prezident İlham Əliyev yanvarın 7-də yerli televiziya kanallarına müsahibəsində növbəti dəfə Ermənistanı və havadarlarını xəbərdar edib. "Ermənistanın silahlanması, sadəcə olaraq, yeni gərginliyə gətirib çıxaracaq. Biz bunu istəmirik. Biz sülh istəyirik", - deyə dövlət başçısı bildirib. Ermənistanın faktiki olaraq bölgə üçün bir təhdid mənbəyi olduğuna diqqət çəkən Azərbaycan rəhbəri qeyd edib ki, müstəqil Ermənistan dövləti əslində faşist dövlətdir. Çünki əgər bu ölkəyə 30 ilə yaxın faşist ideologiyasının daşıyıcıları rəhbərlik ediblərsə, bu ölkəni onlar elə özləri kimi də formalaşdırıblar. Ölkəmizin faşist dövlətlə qonşu olduğunu və faşizm təhlükəsinin sovuşmadığını xatırladan Prezidentdən SİTAT: "Ona görə faşizm məhv edilməlidir. Bunu ya Ermənistan rəhbərliyi məhv edəcək, ya da biz məhv edəcəyik. Bizim başqa çarəmiz yoxdur".Bəli, mahiyyət etibarilə Ermənistanın və onu himayə edən tərəflərin əsl simasını ifşa edən Azərbaycan Prezidentinin mesajları sülh danışıqları ilə bağlı bütün məsələləri tam əhatə edir. İkinci Qarabağ müharibəsinin və antiterror tədbirlərinin nəticələrinin Ermənistan tərəfindən ciddi qəbul edilməsinin labüdlüyünü vurğulayan cənab İlham Əliyev, mövcud şəraitdə İrəvanın öz himayədarlarına arxalanaraq vaxt qazanmaq cəhdlərinin heç bir nəticəsinin olmayacağını da bir daha xatırladıb. Bütün bunlar nə deməkdir? Bu azından o deməkdir ki, bölgədə ciddi müharibə qoxusu gəlir və Azərbaycanın dövlət başçısı informasiyalı lider olaraq real durumun fərqindədir. Çünki ortada Ermənistanı silahlandırmaq məsələsi var...
"Makron Paşinyanı Trampa, İrəvanı Avropa İttifaqına sırımaqla Azərbaycan və Türkiyə əleyhinə Qərbdən daha çox dəstək almaq istəyir"
Çox təəsüf ki, bölgədə sülh və inkişaf əvəzinə xaos və müharibə törətməkdə maraqlı olan bir sıra dövlətlər rəsmi İrəvanı silahlandırmaq yolunu seçiblər. Bu məsələdə əsas rol Fransaya mənsubdur. Niyə məhz Fransa? Artıq Emmanuel Makronun biabırçı idarəçiliyi üzündən dünyanın hər yerindən qovulan və bihörmət edilən Fransa dövləti, indi də Cənubi Qafqazda Ermənistan üzərindən siyasi mövcudluğunu yeritmək istəyir. Əlbəttdə o bu məsələdə tək deyil. Avropa İttifaqındakı "müharibə klubu"ndan başlayaraq, özünü rəsmi İrəvanın dostu və qardaşı kimi göstərməyə çalışan yaxın İrandan başlamış uzaq Hindistana qədər – hər kəs Ermənistanı silahlandırmağa, 44 günlük müharibənin nəticələrini dəyişdirməyə çalışırlar. Əlbəttdə, həm də bölgədə öz çirkin maraqlarını təmin etməyi də qətiyyən unutmurlar. Məgər həm avropalılar, həm iranlılar, eləcə də hindistanlıların özləri guya Ermənistanda dilənçi həyatı yaşayan ermənilərimi düşünürlər? - qətiyyən! N.Paşinyanı Parisə aparıb ABŞ-ın yeni seçilən prezidenti Donald Trampa təqdim etmək, Ermənistan baş nazirinin qərbdən dəstəkləndiyi barədə siyasi görüntü yaratmaq E.Makronun Cənubi Qafqazda Türkiyə və Azərbaycan əleyhinə ən qanlı təxribatlardan çəkinməyəcəyinin nümayişi idi. Marionet siyasi fiqur sayılan N.Paşinyanı Ağ Evin yeni sahibinin gözünə dürtüşdürməklə bölgədə Azərbaycan və Türkiyə əlehyinə fəaliyyətdə Qərbdən daha çox dəstək almağa çalışır E.Makron rejimi. Lakin məsələ təkcə E.Makronla bağlı deyil. Avropada ən böyük və çevik erməni lobbisi məhz Parisdə yerləşir. Uzun illər Fransa həttda Minsk Qrupunun üzvü olsa da, daima ermənipərəst siyasəti ilə seçilib. Lakin fərq ondadır ki, heç bir keçmiş Fransa prezidenti hazırkı Makron rejimi qədər ermənipərəst siyasət yürütməyib.
Ən dəhşətlisi həm də odur ki, ikinci dünya müharibəsi zamanı faşizm əleyhinə birgə mübarizə aparan tərəflər, bu gün Cənubi Qafqazda yuva salmış Ermənistandakı faşist ideologiyasını himayə edirlər. Bu faktın özü isə beynəlxalq münasibətlər sistemindəki ikili siyasətin bariz nümunəsidir. Lakin bütün qızışdırıcı və qanlı təxribat cəhdlərinə baxmayaraq, Azərbaycan həm sülh siyasətinə sadiqdir, həm də 44 günlük müharibədə erməni faşizminin başını əzən əzəmətli "Dəmir yumruq" yenə öz sözünü deməyə hazırdır. Çünki güclü və məntilqi siyasət yürüdən Azərbaycanla güc dili ilə danışmaq artıq mümkünsüzdür. Azərbaycan Prezidentinin son müsahibəsindəki fikirlər, Ermənistanı silahlandıran qüvvələrə yönəlmiş açıqlamaları ciddi xəbərdarlıq olmaqla yanaşı, həm də qarşı tərəfi və onun arxasında duranları ciddi məsuliyyətə dəvətdir."
Namiq Quliyev
