Dekabrın 11-də Moskvada "Volxonka, 16" malikanəsində Rusiya Yazıçılar Birlikləri Assosiyasiyası tərəfindən Rusiyadan kənarda yaşayan və rus dilində yazan müəlliflərin "Rus Mükafatı" adlı Beynəlxalq Ədəbi Müsabiqəsinin qalibləri müəyyənləşdirilib. Tədbirdə Rusiya Prezidentinin Beynəlxalq mədəni əməkdaşlıq üzrə xüsusi nümayəndəsi Mixail Şvidkoy xarici işlər naziri Sergey Lavrovun təbrikini oxudu. Münsiflər heyətinin tərkibində təmsil olunan şair və naşir Maksim Amelin (sədr), yazıçı Tatyana Tolstaya, şair Dmitri Vodennikov, yazıçı Sergey Belyakov, yazıçı Yevgeni Abdullayev, ədəbiyyatşünas İvan Saverçenko, yazıçı və filoloq Abuzər Bağırov, "Alpina. Proza" nəşriyyatının baş redaktoru Tatyana Solovyova poeziya və nəsr kateqoriyalarında üç qalibi müəyyən etdilər. Poeziya kateqoriyasında birinci yeri "Və bir az da ifa olunmamış musiqi" adlı şeirlər toplusuna görə moldovalı Sergey Paqın tutdu.
İkinci yeri təqdim etmək üçün səhnəyə çıxan münfislər heyətinin üzvü Dmitri Vodennikov "möcüzəyə səs verdiyini" etiraf edərək müəllifi həmvətənimiz olan şair-yazıçı Ədalət İsmayılovun (Mədədoğlu) "Daltonik" ("Rəngbilməz") poemasının ikinci yerə layiq olduğunu bildirdi. Üçüncü yeri isə "Kövrək divarlar" şeirlər toplusuna görə özbəkistanlı Natalya Beloyedova qazandı. Nəsr üzrə qaliblər isə belə müəyyənləşdirildi: belaruslu Helena Pobyarjinaya "Valsarb" romanına görə I yerə, qırğızıstanlı Daniel Berger "İstiotlu qəhvə" kitabına görə II yerə, qazaxıstanlı Timur Niqmatullin "Mən yalan danışmıram, ana" romanına görə III yerə layiq görüldülər.
Xatırladaq ki, mükafat fondunun 5 milyon rubl təşkil etdiyi builki Beynəlxalq Ədəbi müsabiqədə 55 ölkədən 591 nəfər müəllif iştirak edirdi. Qaliblər birinci yer üçün 1 milyon rubl, ikinci yer üçün 800 min və üçüncü yer üçün 700 min rublla təltif olundular.
Qeyd: Ədalət Mədədoğlu Gürcüstanın Başkeçid (Dmanisi) rayonunda anadan olub. Borçalının tanınmış şairlərindən olan Mədəd Coşqunun oğludur. Orta məktəbi şəhər beynəlmiləl məktəbində rus dilində bitirib. Azərbaycan və rus dillərini mükəmməl mənimsəyib. Daha sonra M.Qorki adına Dünya Ədəbiyyatı İnstitutunda ali təhsil alıb. Hər iki dildə ədəbi yaradıcılıqla məşğul olur. Hazırda "Əqli Mülkiyyət" jurnalının baş redaktorudur.
Şərif Kərimli,
yazıçı-jurnalist
