Məhərrəm Zülfüqarlı: "Erməni xalqı uzun illər "Erməni xalqının tarixindən", bu qondarma tezislərdən ciddi əziyyət çəkib, baş nazir onlara bunu izah etməyə çalışıb"
Qriqoryan kilsəsinin və bir sıra erməni alimlərinin uydurduqları, cild-cild cızmaqaraya, dərsliyə çevirdikləri "Erməni xalqının tarixi" artıq iflasa uğrayıb. Belə ki, Ermənistan hökuməti son iclasında "Erməni xalqının tarixi" məktəb fənni adının "Ermənistan tarixi" adı ilə əvəz olunmasına dair qətnamə qəbul edib. Baş nazir Nikol Paşinyanın sözlərinə görə, dərsliyin adı bu şəkildə dəyişdirilir ki, ictimai həyatın mərkəzində dövlət dayansın: "Mən "Erməni xalqının tarixi" ilə "Ermənistan tarixi" arasındakı fərqi necə görürəm? "Ermənistan tarixi" dövlətin, hətta mövcud olmadığı dövrlər də daxil, varlığı və inkişafının nəqlidir. Amma "Erməni xalqının tarixi" dövlətin mövcud olduğu dövrlər də daxil adamların tarixinin nəqlidir. Bu konseptual fərq mühüm əhəmiyyətə malikdir və bizim üçün əsas olanı dövlətin varlığı strategiyasıdır".
Burada diqqət çəkən məsələ hökumətin son iclasında "Erməni xalqının tarixi" məktəb fənni adının "Ermənistan tarixi" adı ilə əvəz olunmasına baş nazir Paşinyanın necə izah verməsidir.
Əslində Paşinyanın verdiyi bu izah Ermənistan cəmiyyətini yola verməkdən başqa bir şey deyil. Belə baxanda, onun dediklərinin ikisi də eynidir. Paşinyanınn mövqeyi düzdür. Bu mənada ki, "Erməni xalqının tarixi" başdan-başa cəfəngiyat və uydurmalardan, miflərdən ibarətdir. Paşinyan bunu açıq deyə bilmir ki, bu xalqın qədim tarixi yoxdur, yazılanlar yalanlardan, quramalardan ibarətdir. Paşinyan sətiraltı deyir ki, "Erməni xalqının tarixi" adı altında xalqa cəfəngiyat öyrədirsiz, millətə faciə gətirirsiniz. Bunu açıq deyə bilmədiyi üçün belə ritorik, yalançı məntiqin üstündə mülahizələr qurur.
"Paşinyan xalqa çatdırmaq istəyir ki, illərdir öyrədilən, təbliğ edilən tarix saxtadır, Ermənistan dövlətinin tarixi isə gerçəkdir, belə bir dövlət ilk dəfə 1918-ci ildə yaradılıb"
Tarix elmləri doktoru, professor Məhərrəm Zülfüqarlı baki-xeber.com-a şərhində bildirdi ki, Ermənistanın Baş naziri reallıqdan çıxış edərək belə bir fikir səsləndirib. M.Zülfüqarlı qeyd etdi ki, 44 günlük Vətən müharibəsindən sonra Paşinyan cəmiyyəti reallıqlarla barışmağa, uydurma, mifoloji yanaşmadan qaçmağa çağırır. "Tarixin saxtalaşdırılması, xalqa tarixin uydurma şəklində təqdim olunması məsələsi ən çox ermənilərə aiddir. Erməni xalqı uzun illər "Erməni xalqının tarixindən", bu qondarma tezislərdən ciddi əziyyət çəkib, baş nazir onlara bunu izah etməyə çalışıb. Əslində, erməni xalqının gerçək tarixi yoxdur, hər şey miflərdən ibarətdir. Paşinyan xalqa çatdırmaq istəyir ki, illərdir öyrədilən, təbliğ edilən tarix saxtadır, Ermənistan dövlətinin tarixi isə gerçəkdir, belə bir dövlət ilk dəfə 1918-ci ildə yaradılıb".
M.Zülfüqarlı hesab edir ki, "Erməni xalqının tarixi" dərsliyi şagirdlərə gerçəyi öyrətmirdi, amma "Ermənistan tarixi"ndə ermənilərin əsl tarixi, dövlətlərinin hansı dövrdə yaradıldığı yəqin göstərilib.
"Mən 1984-cü ildə İrəvanda tələbə-inşaat dəstələri komandirlərinin Cənubi Qafqaz seminarında iştirak edəndə bir məsələnin şahidi oldum. Bizi Matenadarandakı muzeyə apardılar, muzeyin girişində dünya xəritəsinin iri maketi qoyulmuşdu. Həmin maketdə hər bir ölkənin üzərinə müxtəlif geyimli bir qadın, beş kişi fiquru qoyulmuşdu. Bələdçi bizə izah edirdi ki, məsələn, filan dövrdə Rumınyada ermənilər belə geyinirdi, Argentinada `belə geyinirdilər və sair. Bunları göstərməklə özlərini "böyük xalq" kimi qələmə verməyə çalışırdılar. Həqiqət isə ondan ibarətdir ki, tarixdə üç xalqın dövləti olmayıb. Bunlardan biri ermənidir. Bu, qaraçılara da, yəhudlərə də aiddir. Onlar dünyada vətəni olmayan xalqlar kimi qəbul olunur. Ermənilər qədim dövrdən dünyaya yayılmağa başlayıblar. Ermənilər öz vəziyyətlərini anlamaq, gerçəyi axtarıb tapmaq, tarixdən nəticə çıxarmaq əvəzinə saxta xəritələr, saxta kitablar çap edirlər, mifik, qondarma "Böyük Ermənistan" şüarını irəli sürürlər. Əslində, Paşinyan onları bu yolla "Böyük Ermənistan" xülyasından ayırmağa, əsası olmayan bir ideyanın ardınca getməkdən çəkindirməyə çalışır.
44 günlük müharibədə Azərbaycan Ordusunun qazandığı qələbədən sonra Ermənistanın bir sıra siyasiləri, səlahiyyətli nümayəndələri artıq bu ziyanlı və səhv yanaşmanı başa düşüblər, tarixə yenidən baxmağa, qonşulara qarşı ərazi iddialarından əl çəkməyə başlamaq istəyirlər. Paşinyan hökuməti konstitusiyanı da dəyişmək istəyir. Fikrimcə, "Erməni xalqının tarixi" məktəb fənni adının "Ermənistan tarixi" adı ilə əvəz olunmasına dair qətnamənin çıxarılması təsadüfi deyil, bununla konstitusiyanın dəyişməsinə zəmin yaradırlar. Çünki dərsliklərdəki cəfəng məsələlər, qonşu dövlətlərə ərazi iddiaları konstitusiyada əks olunub. Odur ki, Paşinyan hökuməti ilk dəyişikliyə dərslikdən başlayıb, ardınca bu dəyişiklik konstitusiyada əks olunacaq. Bilirsiz ki, Ermənistanın gerbində Ağrı dağının təsviri var. Bu da qonşu Türkiyəyə qarşı ərazi iddiası deməkdir. Konstitusiyada Qarabağı da öz əraziləri kimi göstəriblər. Dəfələrlə Paşinyan da deyib ki, Qarabağ Azərbaycan torpağıdır. Bunu Putin də bildirib. Ermənistan Azərbaycanla və Türkiyə ilə münasibətləri düzəltmək üçün bu addımları atmalıdır. Bunun əleyhdarları çox olsa da, amma hökumət bu fikri xalqın beyninə yeridir ki, xəstə təfəkkürdən əl çəksinlər. Bu müsbət addımdır. Gələcəkdə proses güclənərsə qonşularla Ermənistan arasında yaxşı münasibətlər yarana bilər, saxta tarixdən erməni xalqının canı qurtarar, onun faciəsinə səbəb olan bu saxtakarlığa son qoyular. Bu, Qafqazda sülhün bərqərar olması üçün mühüm amildir. Biz də bu addımları bəyənirik"-deyə M.Zülfüqarlı qeyd etdi.
İradə SARIYEVA
