"Təəssüflər, böyük təəssüflər...
Üç türk ölkəsi İranla birlikdə Çindən Ermənistana Paşinyanın çox çalışdığı pəncərəni açdılar. Paşinyanın "Sülh kəsişməsi " layihəsini biz əsaslı olaraq mif sayırdıq. Həqiqətən belə idi. Çünki dost və qardaş saydığımız ölkələrə güvənirdik. İranı başa düşdük. Ermənistan İranın ürəyinin başında "əbədi əziz- xələf" qardaşdır. Bəs qardaş türk dövlətlərinə nə deyək? Küsək, inciyək?...." Bu fikirlər "Bakı-Xəbər" Media Qrupunun rəhbəri, politoloq Aydın Quliyevin öz Facebook səhifəsində paylaşdığı statusunda yer alır. A.Quliyev daha sonra yazır:
"Mayın 31- də Çinin Şanxay şəhərindən ilk yük avtomobili 20 günlük yoldan sonra Yerevana çatıb. Avtomobili Yerevanda Qazaxıstanın, Türkmənistanın səfirlərinin də iştirak etdiyi mötəbər bir dəstə qarşılayıb. Çünki həmin yük Çindən Qazaxıstana, oradan Özbəkistana ,sonra Türkmənistana və daha sonra İran vasitəsilə Yerevana gedib.Əcəb marşrutdur, lap düşməni sevindirən, dostları məyus edən marşrutdur ...
Mən sona qədər inanmaq istəyirdim ki, prezidentimiz İlham Əliyevin " Ermənistan Azərbaycanla razılmasa, " Sülh kəsişməsi" layihəsi işləməyəcək" bəyanatı öz hökmündə qalacaq.Çünki dostluğa, qardaşlığa, etibara, dürüstlüyə və müttəfiqliyə söykənən bəyanatdır. Əlbəttə, Azərbaycan olaraq bizim qəsdimiz heç də o deyil ki, Mərkəzi Asiyanın qardaş türk dövlətləri Ermənistanla heç bir əlaqə yaratmasınlar .Ancaq ən azı Ermənistanın Azərbaycanla sülh sazişi imzalamadığı müddətdə Ermənistana belə pəncərələrin açılması doğru deyil. Artıq bütün Ermənistan mediası , ictimai fikir Çindən gələn ilk yük avtomobilini Paşinyanın " Sülh kəsişməsi " layihəsi çərçivəsində böyük nəticə kimi təqdim edirlər.
Tokayev Yerevana bunun üçünmü getmişdi? Astana Bayramov- Mirzoyan görüşünə bunun üçünmü platforma təqdim etmişdi? Ermənistanda Qazaxıstanın, Özbəkistanın və Türkmənistanın Azərbaycandan üstün nə marağı var görəsən?
Çindən Ermənistana daşınan bir neçə yük maşını bu ölkələrə Azərbaycandan qiymətli nə verə bilər?!....Suallar....."
Mətləb
