“Planetimizdəki vəziyyət heç vaxt bu qədər gözlənilməz, bu qədər qarışıq olmamışdı”...– Bu fikir ArmenianReportun analitiki Razmik Akopcanyanın qələmə aldığı “Həyəcan verici perspektivlər: hökumətimizin bunlardan xəbəri varmı?!”başlıqlı məqalədə yer alıb.Müəllif daha sonra əsil erməni xislətinə uyğun faktları təhrif edərək yazısna belə davam edir.
Düşmən mediası olsa da Azərbaycan mətbuatını oxumaq vacibdir. Bu yolla biz düşmənin bütün planlarından xəbərdar ola bilərik. Öyrənirik ki, Azərbaycan prezidenti İlham Əliyevin Pakistana bu ay baş tutması gözlənilən rəsmi səfərinə hazırlıq gedir. Gözlənilən bu səfərin mühüm detalları var. Belə ki, Pakistanın ingilisdilli “Business Recorder” nəşrinin məlumatına görə, səfər zamanı iki ölkə arasında bir sıra strateji sazişlər imzalanacaq. Onların infrastruktur, enerji və müdafiə kimi sahələri əhatə edəcəyi bildirilir. Azərbaycanın Pakistanda 2 milyard dollardan çox investisiya layihələrindən də artıq xəbərimiz var. Məbləğ mühümdür və təsir edicidir. Bu, təbii ki, Pakistanın Azərbaycana qarşı xüsusi münasibətini özündə əks etdirir. Əslində, biz bunu 44 günlük müharibə zamanı görmüşük. Təəssüf ki, İmran Xanın həbsinə baxmayaraq, Pakistan dövləti indiyədək dünya ictimaiyyətindən heç bir kəskin qınaq almayıb. Beləliklə biz Azərbaycanın silahlanmasının növbəti mərhələsinə şahidlik edirik. Bildirilir ki, Əliyevin İslamabada hazırkı səfəri zamanı JF-17 Blok 3 qırıcılarının alınması planlaşdırılır. Pakistan əvvəlcə JF-17 qırıcılarının daha əvvəlki versiyasını təklif edib, lakin Azərbaycan bu təyyarələrin köhnəldiyini önə çəkərək, onların modernləşdirilmiş Block-3 versiyasına maraq göstərib. Hansı ki, Pakistan bu təyyarələrin ilk alıcısı olub və sonra iki ölkə Pakistan və Çin birgə qırıcı istehsalına başladı. Çin aviasiya sənayesi 2010-cu illərdə sürətli inkişaf dövrünə qədəm qoydu və nəticədə JF-17 Block-3 döyüş təyyarəsinin daha müasir texnologiyaya əsaslanan versiyası yaradıldı. Burda Rusiyanın MiQ-29 RD-33 mühərrikinin yüksək dərəcədə təkmilləşdirilmiş versiyasından istifadə edilir. JF-17 Blok-3 isə daha müasir və güclü Çin WS-13 mühərriki ilə təchiz edilib. JF-17 Block-3 ilk uçuşunu 2019-cu ilin dekabrında etdi. 2023-cü ilin martında JF-17 Block-3 çoxməqsədli qırıcılarının ilk partiyası Pakistan Hərbi Hava Qüvvələrində xidmətə daxil oldu. O, “4+” nəsil qırıcı hesab edilsə də, beşinci nəsil avionika və silahlardan istifadə edir. Onun dizaynı və xüsusiyyətləri İsveç-Amerika Gripen E ilə müqayisə edilə bilər. Bununla belə, bu seçim əməliyyat xərclərinin aşağı olması səbəbindən daha sərfəli büdcə variantıdır. Ümumiyyətlə, Pakistanın yenidən Azərbaycana kömək edəcəyini deməyə bütün əsaslar var. Bu şəraitdə bəs biz nə etməliyik? Hesab edirəm ki, biz Hərbi Hava Qüvvələrimizi gücləndirməkdə israrlı olmalıyıq. Burada qeyd etmək lazımdır ki, ABŞ-dan F-16 və ya Fransadan Rafale təyyarələrinin alınması Azərbaycan üçün əlçatmaz idi və bu belə də qalır. ABŞ-da, Fransada, hətta Böyük Britaniyada heç kim yeni müharibəyə hazırlaşan Bakıya bu cür açıq-aşkar hərbi dəstəyə razı olmayacaq. Biz həm də Ermənistan Hərbi Hava Qüvvələrində Fransanın “Rafale” qırıcılarının olmasını təmin etməklə buna hazırlaşmalıyıq. Eyni zamanda, hava hücumundan müdafiə sistemimizi gücləndirməliyik və ən əsası, Bakının planlarını pozmaq üçün müttəfiqlərimizə bizə yardım göstərmələri üçün təzyiq göstərməliyik. Çox yaxında qlobal miqyasda ciddi hadisələrin baş verə biləcəyi tamamilə aydındır. Xüsusilə, İran ordusu artıq yüksək döyüş hazırlığı vəziyyətinə gətirilib ki, bu da Amerika-İsrail tandemi tərəfindən İrana hücum ehtimalının artması ilə əlaqələndirilir. Hadisələrin bu cür inkişaf edəcəyi təqdirdə Bakının bu məqamdan yararlanmağa və Süniki ələ keçirmək üçün çoxdankı planlarını həyata keçirməyə çalışacağını deməyə əsaslar var. Hər kəs dünyada nə baş verdiyini görə bilər! Planetimizdəki vəziyyət heç vaxt bu qədər gözlənilməz, bu qədər qarışıq olmamışdı. Təkcə ABŞ və Rusiyanın yaxınlaşması buna dəyər! Yeri gəlmişkən, Vaşinqton və Moskva düşmənin Süniklə bağlı planlarına qarşı olmaya da bilər. İsrail isə şübhəsiz ki, Azərbaycana silah satmaqla yanaşı hadisələrin belə inkişafının tərəfdarıdır. Əgər əvvəllər bu cür tədarükü dayandırmaq üçün heç olmasa bir ümid işığı var idisə, indi yəhudilərin təsirindən son dərəcə asılı olan Trampın prezidentliyi dövründə artıq bunu unutmaq lazım gələcək. Göründüyü kimi, vəziyyət çox həyəcanlıdır. Amma mən hesab edirəm ki, problemi ört-basdır etməkdənsə, bu barədə məlumat vermək daha yaxşıdır. İndi xarici təhdidlərlə deyil, getdikcə daha aydın görünən hakimiyyəti itirmək perspektivindən narahat olanlar nəhayət ki,bundan bir çıxış yolu axtarmalıdır.
Surxay Əliyev
