Mətləb Salahov: “Erməni baş nazir Sülh Müqaviləsi barədə danışıqları uzatmaqla Tramp - Putin tandemindən yeni “şans” gözləyir”
Ermənistanın baş naziri Nikol Paşinyan Azərbaycan əleyhinə qeyri səmimiliyini bütün çılpaqlığı ilə ortaya qoymağa davam edir. Ənənəvi erməni hiyləgərliyi ilə “silahlanan” Nikol Vavayeviç növbəti dəfə regionda sülhün əldə edilməsinə maraqlı olmadığını nümayiş etdirib. Özü də birbaşa öz imzası ilə. Erməni baş nazir fevralın 10-da “Armenpress” xəbər agentliyində dərc olunmuş məqaləsində faktları və həqiqətləri təhrif etməklə əslində Ermənistan hakimiyyətinin əsl mahiyyətini də üzə çıxarıb. N.Paşinyan, bu məqalədə regional proseslərə və Qərbi Azərbaycan mövzusuna dair yanlış, əsassız və zərərli fikirlər yazmaqla ənənəvi erməni siyasətindən də əl çəkmədiyini nümayiş etdirib. Jurnalist-ekspert Mətləb Salahov “Bakı-xəbər”ə açıqlamasında erməni baş nazirin ölkəsinin mətbuatında öz imzası ilə təxribat və təhrif dolu “faktlarla” çıxış etməsini 10 noyabr sənədindəki müddəalarla daban-dabana ziddiyət təşkil etdiyini deyib. M.Salahov qeyd edib ki, Ermənistan Azərbaycanla konstruktiv münasibətlər qurmaq və regional kommunikasiya və iqtisadi əlaqələr qurmaq üçün ilk növbədə ölkəmizə qarşı ərazi iddialarına son qoymalıdır. “Çünki bu ölkənin konstitusiyasında və digər hüquqi sənədlərdə ölkəmizə qarşı ərazi iddiaları hələ də qüvvədə qalır. Azərbaycan rəsmi səviyyədə bununla bağlı dəfələrlə xəbərdarlıq edib. “Armenpress”dəki yazısında N.Paşinyan Azərbaycanın ərazi bütövlüyünün tanınmasına dair 1991-ci ildə imzalanmış Alma-Ata Bəyannaməsinə və 2022-ci il Praqa razılaşmasına istinad edir. Lakin məhz 1991-ci il Alma-Ata Bəyannaməsinin imzalanmasından sonra Ermənistan Azərbaycana qarşı genişmiqyaslı işğalçı siyasət həyata keçirib. Təkcə bu fakt rəsmi İrəvanın bu gün Azərbaycanın ərazi bütövlüyünü tanıması ilə bağlı qeyri-səmimi olduğunu təsdiqləyir. Əgər Ermənistan həqiqətən səmimidirsə, o zaman konstitusiyasından və digər qanunlardakı ölkəmizə qarşı ərazi iddialarını ehtiva edən müddəaları çıxarmalıdır. Bunun üçün şəxsən N.Paşinyan hansısa diqqət çəkən ciddi addımlar atırmı? Qəti olaraq yox! Axı bu necə ola bilər ki, özünü sülhsevər kimi göstərməyə çalışan bir hakimiyyət başçısı öz ölkəsinin konstitusiyasında beynəlxalq hüquqa zidd olaraq başq abir ölkənin ərazi bütövlüyünə iddia edən maddələriBelə sənədlərin qüvvədə qalması gələcəkdə Azərbaycana qarşı ərazi iddiası üçün istifadə oluna bilər. Ona görə də Azərbaycanın bu şərti mütləq yerinə yetirilməlidir.
Bundan başqa, bu gün baş verənlər açıqca göstərir ki, N.Paşinyan hakimiyyəti özünü "sülh göyərçini" kimi təqdim etməklə ikili siyasətini davam etdirir. Əgər hazırkı Ermənistan hakimiyyəti elan etdiyi kimi doğrudan da Azərbaycanla sülh əldə etmək istəyirsə, onda bunun üçün mütləq real addımlar atmalıdır. Həmin real addımlardan əsər əlamət varmı?qətiyyən! Onlar Azərbaycan əleyhinə təxribatları dayandırmalı, yüz cür cəfəng bəhanələr gətirmədən sülh müqaviləsini imzalamalı, Azərbaycanla sərhədlərin delimitasiyası və demarkasiyası prosesinə mane olmamalıdırlar. Bunlar baş verirmi? O da qətiyyən! Bütün bu sadaladıqlarımın əvəzinə erməni tərəfi müxtəlif beynəlxalq platformalarda manipulyativ çıxışlar edərək məsuliyyətdən yayınmağa çalışırlar.
Daha bir fakta diqqət edək. Qərbdəki dəstəkçilərinin fitvası ilə bir neçə il öncə Xankəndidən könüllü olaraq ayrılmış ermənilərin yenidən bu bölgəyə qayıdışı üçün dəridən-qabıqdan çıxan Ermənistan höküməti, niyə azərbaycanlıların da Ermənistan ərazisindəki doğma yurd-yuvalarına qayıtması üçün əməli addım atmır? Axı azərbaycanlıların doğma yurdlarına qayıtmaq haqqı beynəlxalq hüququn fundamental prinsipləri ilə təsbit olunmuş mütləq hüquqlardan biridir. İnsan Hüquqları Ümumi Bəyannaməsi, Mülki və Siyasi Hüquqlar Haqqında Beynəlxalq Pakt, Qaçqınların Statusuna dair 1951-ci il Konvensiyası və digər mühüm sənədlərdə bu hüquq açıq şəkildə öz əksini tapır.
Bundan başqa qeyd ediləsi daha bir məqam var. Axı tarixi ədalətin bərpası təkcə qayıdışla yekunlaşmır, həmçinin mədəni irsin qorunmasını da əhatə etməlidir. Ermənistan ərazisində azərbaycanlılara məxsus yüzlərlə məscid, qəbiristanlıq, tarixi abidə və digər mədəni irs nümunələri məhv edilib və ya təhqir olunub. Halbuki, mədəni irsin qorunması təkcə beynəlxalq humanitar hüququn deyil, eyni zamanda, fundamental insan hüquqlarının bir hissəsidir. Ümumdünya İnsan Hüquqları Bəyannaməsində mədəni hüquqların, yəni, insan yaradıcılığının müxtəlif formalarının qorunması və inkişaf etdirilməsi əsas prinsiplərdən biri kimi qəbul edilib. Ermənistan qayıdış prosesi baş verməzdən əvvəl, qayıdış zamanı və sonrakı dövrdə bu hüquqların təmin olunması üçün konkret addımlar atmalıdır. Bütün bu sadaladıqlarımın gerçəkləşməsi üçün bircə addım atılırmı Ermənistan hakimiyyəti tərəfindən? Qətiyyən! İndi N.Paşinyan Ukrayna-ABŞ gərginliyi və Vladimir Putin - Donald Tramp yaxınlaşması fonunda yaranan yeni siyasi situasiyada özü üçün yeni şanslar gözləyir. Hazırkı Ermənistan hakimiyyəti üçün “xaç atası” kimi tanınan Emmanuel Makronun Ağ Ev-də heç adam yerinə qoyulmaması da erməni baş naziri ciddi narahat edir. Çox güman ki, Sülh Müqaviləsi barədə danışıqları uzatmağa çalışan erməni baş nazir D.Tramp - V.Putin tandemindən yeni “şans” gözləyir. Həmişə olduğu kimi, ənənəvi erməni hiyləgərliyi..”
Namiq Quliyev
