İsrail hökuməti Qəzzada yeni döyüşlərin başladılması üçün ehtiyatda olan 400 min əsgərin orduya çağırılmasına icazə verib.Bu barədə kanal 12 xəbər verib.
Martın 2-də artıq ehtiyatda olan 320 min hərbçinin səfərbər olunma müddəti başa çatıb.Lakin hakimiyyət bu limiti artırmaq qərarına gəlib. Belə ki,yeni qərarda hərbi xidmətə çağırışın 2025-ci il mayın 29-dək mümkünlüyü vurğulanır. İsrail mənbələri isə bunu atəşkəs razılaşmasının birinci mərhələsinin başa çatmasından və əsirlərin mübadiləsindən sonra Qəzzada aktiv döyüş əməliyyatlarına hazırlıq kimi qiymətləndirir. Öz növbəsində HƏMAS vasitəçiləri İsraili sazişdə nəzərdə tutulan öhdəlikləri yerinə yetirməyə məcbur etməyə çağırıb. Fələstin tərəfi hesab edir ki, məhbusları geri qaytarmağın yeganə yolu sazişin şərtlərinə əməl etmək və ikinci mərhələ üzrə dərhal danışıqlara başlamaqdır . Yanvarın 19-da qüvvəyə minən atəşkəs sazişinin birinci mərhələsi şənbə günü başa çatıb. Bu saziş HƏMAS ilə İsrail ordusu arasında 15 aylıq döyüşləri dayandıraraq, 33 israilli və 5 tayilandlı məhbusun 1900-ə yaxın fələstinli məhbusun müqabilindı azad edilməsinə icazə verib. Qəzza Səhiyyə Nazirliyinin məlumatında bildirilir ki, İsrail ordusunun Qəzza zolağına havadan və qurudan hücumu nəticəsində azı 48 365 nəfər həlak olub.
Surxay Əliyev
