Son günlərin ən aktual siyasi müzakirə mövzularından biri Azərbaycanda siyasi partiyaların vəziyəti və inkişaf perspektivləri ilə bağlıdır. Üstün rəy əsasən bundan ibarətdir ki, hakim Yap - dan başqa bütün digər siyasi partiyaların real təsir gücləri yoxdur, bir çoxunun heç vaxt belə gücləri olmayıb, bəziləri isə bu və ya digər səbəblərdən olan gücünü sonradan itirib. Partiyalarla bağlı nə baş verir və nə gözlənilir?
Mövzu ilə bağlı siyasi şərhçi, Bakı - xəbər qəzetinin baş redaktoru Aydın Quliyevin fikirlərini öyrəndik. Aydın Quliyev təsdiqlədi ki, həqiqətən bir vaxtlar, daha doğrusu 15- 20 il əvvələ qədər Azərbaycanda 4 güclü siyasi partiya var idi :" Bunlar hakim YAP, ADP, AXCP və Müsavat partiyaları idi. İndi bunların 3- ü cəmiyyətin nəzərində aşağı - yuxarı kiçik fərqlərlə görünməz olublar. Bu acınacaqlı vəziyyət səbəbsiz deyil. Vaxtilə onların hər birinin çevrəsində gündəlik qəzetlərin timsalında güclü informasiya - təbliğat ruporları var idi. 2007- ci ildə gündəlik, hətta bəzən həftədə 7 dəfə çap olunan Bakı - Xəbər qəzeti ADP- nin çevrəsindən ayrıldı. ADP bununla çökdü və bu gün də özünə gələ bilmir. 2013- cü ildə Yeni Müsavat qəzeti Müsavat partiyasından ayrıldı. Müsavat partiyası da çökdü və bu gün də özünü düzəldə bilmir. 2013 - 14 - cü illərdə Azadlıq qəzetinin çapı dayanan kimi AXCP də əvvəlki gücünü itirdi. Gündəlik qəzetlər müstəqillik kursu tutan kimi siyasi partiyaların çevrəsində güc faktorları baxımından böyük boşluq yarandı. Həmin siyasi partiyalar qəzetlərin gedişi ilə yaranmış boşluğu doldurmağı bacarmadılar.Ağrısını bu gün də çəkirlər. Hakim YAP Yeni Azərbaycan qəzeti kimi öz güc faktorunu qoruyub saxladı, bu gün də qəzet YAP - ın güc faktorlarından biri sayılır. Təbii ki, bu partiyanın lider, iqtidar resursları kimi digər həlledici güc faktorları da var. Müstəqillik dövründə gündəlik qəzeti olmayan və dediyim 4 partiya kimi ən güclülər sayılan 5- ci partiya sadəcə olmayıb. Qəzetlər böyüdülər, çap versiyadan əlavə, sayt və hətta müxtəlif sosial şəbəkə seqmentlərini, o cümlədən güclü yuotube kanalı yaratdılar. Təbii ki, qəzetlərin siyasi partiyalara doğru geridönüşü artıq mümkünsüzdür. " A. Quliyevin fikrincə siyasi partiyaların indi ən böyük problemi özlərinə müasir siyasi şəraitə uyğun güc faktorları tapa bilməmələridir.
Mətləb Salahov
