Ölkəmizin dost və qardaş münasibətləri saxladığı ölklərdən biri də Pakistan dövlətidir. Hər zaman Azərbaycanın haqq səsini dəstəkləyən rəsmi Islamabad, ölkəmiz müstəqillik qazandıqdan sonra daima qardaş Türkiyə qədər bizə göstərdiyi qardaşlıq münasibəti ilə fərqlənib. Təkcə onu xatırladaq ki, Pakistan dövləti Azərbaycanın müstəqilliyini tanıyan ilk dövlətlərdən biridir. Bildiyimiz kimi ölkələrimiz arasında diplomatik əlaqələrin əsası 1992-ci ilin iyununda qoyulub. Paytaxt Bakıda Pakistan səfirliyi 1993-cü ilin martında açılıb. Təəsüf ki, 1992-1993-cü illərdə hakimiyyətdə olan AXC hakimiyyəti qardaş Pakistanla əlaqələri genişləndirmək, münasibətləri müttəfiqlik səviyyəsinə yüksəltmək üçün yaranan bütün şansları boşa verib. O zamankı hakimiyyətin qüsurlu xarici siyasət kursundakı nöqsanlardan biri də Azərbaycana dəstək olan ölkələrlə münasibətləri genişləndirmək və tərəfdaşlıq səviyyəsinə çatdırmaq üçün əməli addımlar ata bilməməsi idi. Azərbaycan və Pakistan arasındakı hərtərəfli əlaqələrin inkişafında müasir müstəqil Azərbaycanın qurucusu Heydər Əliyev xüsusi xidmətləri olub. Məhz Heydər Əliyev qardaş Pakistan dövləti ilə olduqca mükəmməl münasibətlər qurulmasına nail olub. 1995-ci ildə Pakistan İslam Respublikasının Prezidenti Sərdar Taruq Əhməd Xan Leqarinin Azərbaycana səfəri olub. 1996-cı ildə isə ümummilli liderimiz Heydər Əliyevin Pakistana səfəri də tarixi önəm daşıyırdı. Çünki bu səfər zamanı keçirilən görüşlər iki ölkə arasında müdafiə və hərbi-texniki sahədə əməkdaşlığın uğurla inkişaf etməsinə zəmin yaratdı. Azərbaycan İslamabadda öz diplomatik missiyasına 1997-ci ilin avqustunda başlayıb. Pakistanla səmərəli əməkdaşlıq siyasəti Prezident İlham Əliyevi hakimiyyəti zamanında da uğurla inkişaf edib. 2015-ci il martın 11-14-də Pakistan İslam Respublikasının Prezidenti Məmnun Hüseynin Azərbaycana rəsmi səfəri zamanı imzalanan “Azərbaycan Respublikası ilə Pakistan İslam Respublikası arasında strateji tərəfdaşlıq haqqında Birgə Bəyannamə” ölkələrimiz arasındakı qardaşlıq əlaqələrinin güclənməsinə böyük töhfə verib. Həmçinin Prezident İlham Əliyevin ötən ilin iyulun 11-12 tarixlərində Pakistana olan dövlət səfəri hər iki qardaş ölkənin strateji tərəfdaşlıq münasibətlərinin gücləndirilməsi baxımından çox mühüm əhəmiyyət kəsb etdi. 2024-cü ilin iyulun 11-də İslamabadda Prezident İlham Əliyev və Pakistanın Baş naziri Məhəmməd Şahbaz Şərif mətbuata bəyanatlarla çıxış ediblər. Çıxışı zamanı Prezident İlham Əliyev bir sıra tarixi faktları diqqətə çatdırıb. Prezidentdən SİTAT: “Biz qardaşıq, dostuq! Qardaş və dost kimi biz Sizinlə, Kəşmirdəki qardaşlarımızla hər zaman yan-yana olacağıq, beynəlxalq hüququn və ədalətin tərəfində dayanacağıq. Mən əminəm ki, ədalət zəfər çalacaq.”
Azərbaycan və Pakistan çətin günlərdə hər zaman bir-birinin yanında olublar. Təsadüfi deyil ki, Pakistan indiyədək Ermənistanla heç bir diplomatik əlaqə qurmayıb, Ermənistanın suverenliyini tanımayıb. Pakistan ilə Azərbaycan arasındakı bu isti münasibətlər parlamentlərarası əlaqələr səviyyəsində, iqtisadi, humanitar, hərbi və digər sahələrdə uğurla davam etdirilir və bu da öz bəhrəsini verməkdədir.
Xüsusilə qeyd etmək lazımdır ki, qardaş Pakistan Senatının Xarici Əlaqələr Komitəsi Azərbaycana dəstəyini möhkəmləndirmək üçün Xocalı faciəsini soyqırımı kimi tanıyıb. Ən əsası isə 44 günlük Vətən müharibəsi zamanı qardaş Türkiyə kimi Pakistan dövləti də Azərbaycanın haqq işini dəstəkləyib, Ermənistanın işğalçılıq siyasətinə son qoyulmasında ölkəmizin ədalətli mövqeyini prinsipial şəkildə müdafiə edib. Əlbəttdə Azərbaycan xalqı heç zaman bu qardaşlıq dəstəyini unutmayacaq. Beləliklə, bizi bir-birimizə bağlayan dərin tarixi bağlar, bütün dünyaya nümunə olacaq qardaşlıq münasibətləri mövcuddur.
Mətləb
