ABŞ rəhbərliyi Rusiya-Ukrayna müharibəsinin dayandırılması haqda razılaşmanın Rusiyanın pozacağı təqdirdə Ukraynanın avtomatik olaraq NATO-ya qəbul ediləcəyi ilə bağlı variantı nəzərdən keçirir. Bu barədə NBC News-un son günlər ABŞ və Ukrayna arasında artan qarşıdurmaya həsr olunmuş məqaləsində deyilir. ABŞ rəsmiləri arasında olan mənbələr jurnalistlərə bildiriblər ki, ABŞ administrasiyası bu variantı Ukraynanın təhlükəsizliyinin təminatlarından biri kimi nəzərdən keçirir. Onların fikrincə, NATO-ya avtomatik üzvlük haqqında müddəa Kiyevin və onun avropalı müttəfiqlərinin Rusiyanın atəşkəs zamanı öz qüvvələrini toplayacağı və yenidən Ukraynanı işğal edəcəyi ilə bağlı qorxularına cavab ola bilər.
Ukrayna üzrə təmas qrupunun iclasındakı çıxışı zamanı ABŞ-ın müdafiə naziri Pit Heqset bildirib ki, ABŞ Ukraynanın NATO-ya üzvlüyünü Rusiya-Ukrayna danışıqlar yolu ilə həllinin real nəticəsi” hesab etmir. NBC News-un məlumatına görə, Heqset Ukraynanın NATO-ya daxil olması ehtimalı ilə bağlı sərt bəyanatlar verib. Kanalın mənbələri iddia edir ki, çıxışın layihələrində Ukrayna üçün təhlükəsizlik zəmanətlərinin “NATO üzvlüyü vasitəsilə təmin edilməməsi” qeyd olunub. NBC News-un məqaləsində deyilir ki, bununla belə, nadir torpaq metalları üzrə sövdələşmə Birləşmiş Ştatlar və Ukrayna arasında strateji tərəfdaşlığın qurulmasında əsas komponenti ola bilər ki,bu da müharibə başa çatdıqdan sonra Kiyevin təhlükəsizliyinin təminatına kömək edə bilər. Telekanalın məlumatına görə, ABŞ-ın maliyyə naziri Skott Bessent Ukrayna prezidenti Vladimir Zelenskini məhz buna inandırmağa çalışıb. Surxay Əliyev
