Tramp və Putin Ukraynanı bölüşdürürlər – Avropa oyundankənardır...
Mətləb Salahov: “Belə görünür ki, Tramp hazır planla hakimiyyətə gəlib”
Donald Tramp hakimiyyətə gələr gəlməz dünya siyasəti əməllicə çalxalanmağa başlayıb. Amerikalı milyarder Ağ Evə gələn kimi özündən əvvəlki Co Bayden administrasiyasının bütün streotiplərini bir-bir məhv edib siyasi zibilliyə tullamaqda davam edir. USAİD kimi bir canavar təşkilatın çökdürülməsindən başlamış, Ukraynanın taleyini Rusiya lideri Vladimir Putinlə müzakirəyə çıxarmağa qədər ən kritik qərarlar verən hazırkı ABŞ administrasiyası, indi də “qoca qitə” üçün yeni sürpriz qərarlara imza atır. Budur, ABŞ və Rusiya artıq Ukraynanın taleyini həll etmək üçün Səudiyyə Ərəbistanında danışqlara da başlayıblar. Hər nə qədər də Avropa liderləri dəlicəsinə D.Trampın təkbaşına prosesləri öz nəzarətinə almaq cəhdinə qarşı çıxsalar da, fakt ortadadır ki, Ağ Ev Ukraynanın taleyini Rusiya ilə təkbaşına həll etmək qərarına gəlib. Jurnalist-ekspert Mətləb Salahov “Bakı-xəbər”ə açıqlamasında bildirib ki, Avropa liderlərinin Paris görüşündə səsləndirilən fikirlər daha çox özünümüdafiə xarakterlidir və Avropa qitəsindəki siyasi liderlərin baş verələr qarşısında konkret planlarının olmadığına sübutdur.
M.Salahov qeyd edib ki, D.Tramp seçkilərdən əvvəl səsləndirdiyi “hər şey tamamilə başqa olacaq” bəyanatını artıq əməli işdə tətbiq edir: “Diqqət edin, bu adam ikinci hakimiyyət dönüşünüdə ABŞ-ın özünün on illiklərdir davam edən sterotiplərini tamamailə ortadan qaldırmaq və dünya siyasətində mövcud qaydaları dərhal kökündən dəyişməklə işə başladı. Həm ABŞ-dan axıdılan milyon və milyardlara “stop” dedi, həm də Avropa qitəsinə hər şeyin bundan sonra başqa olacağını göstərdi. Əslində Paris görüşündə Avropa Birliyi liderləri Ukraynanın taleyindən daha çox D.Trampdan özlərinə qarşı yaranacaq təhlükə barədə həyəcan keçiriblər.
“Xüsusilə ABŞ-dan Avropaya axan “dollar bulağı”nın yeni prezident tərəfindən qapadılacağı, NATO-nun ABŞ-ın himayəsindən çıxacağı avropalıları qorxuya salıb”
Xüsusilə neçə on illiklərdir ki, ABŞ-dan Avropaya axan “dollar bulağı”nın yeni prezident tərəfindən qapadılacağı, NATO-nun ABŞ-ın himayəsindən çıxacağı kimi məsələlər avropalıları qorxuya salıb. Onları həm də D.Tramp-V.Putin ittifaqının Avropa üçün yaradacağı problemlərdən narahatdırlar. Üstəlik ABŞ prezidentinin “qoca qitə”nin iştirakı olmadan Ukrayna böhranını Səudiyyə Ərəbistanında Moskva ilə müzakirəyə çıxarması da artıq yeni Ağ Ev sahibinin Avropa Birliyinin mövqeyinə heç bir əhəmiyyət vermədiyini ortaya qoyur.
Hazırda Ağ Evin məhz Moskva ilə müəyyən danışıqlara girməsi bundan sonrakı hadisələr üçün fərqli proqnizlar da ortaya qoyur. Bu vaxta qədər Ukraynanı müdafiə edənlərin indi də qarşı tərəflə danışıqlar aparmaq maraqları avropalıları daha çox təlaşlandırıb. Hər zaman ABŞ-ın dəstəyinə arxalanan Avropa Birliyi ölkələri, bu son proseslərdən sonra özlərini meydanda “tək qalmış” sayırlar. Belə hesab olunur ki, avropalılar təkcə dəstəkdən məhrum olmayıblar, həmçinin, Rusiyanın savaş açmaq planının da ortaya çıxma ehtimalı ilə üz-üzə qalıblar. İndi “qoca qitə” öz taleyi, özünün bundan sonrakı vəziyyəti ilə bağlı daha çox narahatdır. Hətta mümkün olacaq savaşa, müharibəyə hazırlıq görülməsinin labüdlüyü barədə də düşünülür. D.Trampın dünya siyasətində anidən kəskin dəyişiklik startı belə görünür ki, qarşıdakı müddətdə daha ajiotaj situasiyanın ortaya çıxmasına və gözlənilməz addımların yaranmasına səbəb olacaq.”
Namiq Quliyev
