“Prezidentin tövsiyələrinə əməl etmək əvəzinə dövlət büdcəsinin vəsaitlərini sağa-sola, lazımsız yerlərə xərcləyirlər, qiyməti 100-150 min manatlarla ölçülən maşınlarda gəzirlər”
Səfərbərlik və Hərbi Xidmətə Çağırış üzrə Dövlət Xidmətinin generallarının 100 minlik avtomobillərdə Şəhidlər Xiyabanını ziyarət etməsi geniş müzakirələ səbəb olub.
Mətbuatın araşdırmasına görə, Səfərbərlik və Hərbi Xidmətə Çağırış üzrə Dövlət Xidməti (SHXÇDX) üçün yeni alınan onlarla “Hyundai Azera” model avtomobilin 1 ədədinin bazar qiyməti 100 min manata yaxındır. Qeyd edək ki, fevralın 13-də SHXÇDX-nın yaradılmasının 13 ili tamam olub. Bu münasibətlə Səfərbərlik və Hərbi Xidmətə Çağırış üzrə Dövlət Xidmətinin general olan rəhbər şəxsləri və şəxsi heyəti Şəhidlər Xiyabanını ziyarətə yeni avtomobillərlə gəliblər. Dediyimiz kimi, SHXÇDX generallarının 100 minlik maşınlardan istifadə etməsi geniş ictimai müzakirələrə səbəb olub və bu, ölkənin kütləvi informasiya vasitələrində yayılıb.
İctimaiyyətdə “Səfərbərlik Xidmətinin rəhbərlərinin 100 minlik maşınlarda gəzməsi çox vacibdir?” kimi suallar da səsləndirilir.
Ümumiyyətlə, dövlət müəssisələrinin rəhbərlərinin, xüsusən də SHXÇDX kimi vacib bir strukturunun rəhbərlərinin belə bahalı maşınlarda gəzməsi nə dərəcədə doğrudur? Cəmiyyəti niyə qıcıqlandırırlar?
Azərbaycan Prezidenti dəfələrlə deyib ki, təvazökar olmaq lazımdır. Hətta ölkə başçısı məsələ qaldırmışdı ki, məmurlar, dövlət qurumlarının rəhbərləri Azərbaycanda istehsal edilən avtomobillərdən istifadə etsin. Yadınıza salaq ki, 2016-cı ilin 27 yanvar ayında İlham Əliyev “Azərbaycan Respublikası regionlarının 2014-2018-ci illərdə sosial-iqtisadi inkişafı Dövlət Proqramı”nın icrasının ikinci ilinin yekunlarına həsr olunmuş konfransda çıxışı zamanı məmurların bahalı xarici avtomobillərdən istifadə etməsini tənqid edərək və onlara Naxçıvan MR-nın istehsalı olan “NAZ-Lifan” avtomobillərindən istifadə etmələrini tövsiyə etmişdi. O müşavirədən 9 il keçib, məmurlar isə Prezidentin tövsiyəsinə əməl etmək əvəzinə, bir-birinin bəhsinə dövlət büdcəsi hesabına özlərinə bahalı maşınlar alırlar.
Məmurlar niyə 100-150 minlik maşınlarla gəzməlidirlər? O pulları başqa sahələrə yönəltmək olmazmı? O vəsait hesabına o məmurların rəhbərlik etdiyi sahələrdəki problemləri həll etmək daha məqsədəuyğun olmazmı, nəinki onların bahalı maşınlarda gəzməsi?
Prezident İlham Əliyev dəfələrlə məmurlara tövsiyə edib ki, təvazökar olmalısınız: “Siz öz davranışınızla insanların hörmətini qazanmalısınız. Təvazökar olmalısınız, həm işdə, həm məişətdə, həm özünüz, həm yaxın qohumlarınız. İnsanları qıcıqlandıra biləcək addımlar atmamalısınız. Özünüzü hamıdan yuxarıda hiss etməməlisiniz”.
Prezident dəfələrlə vurğulayıb ki, məmurlar yerli istehsal məhsullarından istifadə etməlidir, kabinetlərinə yerli mebellər qoymalıdır, ölkədə istehsal olunan maşınlarda gəzməlidir.
Ekspertlər bildirir ki, məmurların cəmiyyəti qıcıqlandıran davranışlar sərgiləməsi, bahalı evlərdə, villalarda yaşaması, qiyməti 100 min manatlarla ölçülən avtomobildə gəzməsi mənfi bir haldır, bu, ölkə başçısının tövsiyələrinə birbaşa ziddir. Ekspertlərə görə, xüsusən də Hərbi Çağırış Xidmətinin rəhbərlərinin belə maşınlarda gəzməsi cəmiyyətdə çox böyük narazılıq və qıcıq yaradır, hətta bəziləri bunun bağışlanılmaz, qəbuledilməz olduğunu düşünür. Belə bir vacib qurumda böyük postlar tutan şəxslərdən daha çox təvazörluq gözləndildiyini deyən ekspertlər deyir ki, SHXÇDX rəhbərlərinin 100 minlik maşınlarda xalqımızın igid oğullarının, qəhrəmanlarımızın uyuduğu Şəhidlər Xiyabanını ziyarət etməsi çox mənfi reaksiyalara səbəb oldu. Təkcə bu qurumun rəhbərləri deyil, dövlət qurumlarının mütləq əksəriyyətinin rəhbərləri belə bahalı maşınlarda gəzməyi özlərinə şöhrət bilirlər, halbuki, o bahalı maşınların alınmasına xərclənən vəsaiti başqa yerlərə yönəltmək olar.
Elyar İslamoğlu: “Dövlət qurumları rəhbərlərinin bahalı maşınlarda gəzməsi də cəmiyyətdə qıcıq yaradır”
Filologiya üzrə fəlsəfə doktoru, tanınmış ictimai fəal Elyar İslamoğlu baki-xeber.com-a bildirdi ki, məmurların bahalı həyat tərzi, təvazökarlıqdan uzaq davranışları cəmiyyətdə qıcıq və narazılıq yaradır. E.İslamoğlunun sözlərinə görə, bu, açıq-aşkar dövlət büdcəsinin talanması deməkdir. Məmurların Prezident İlham Əliyevdən örnək götürməli olduğunu deyən ekspert hesab edir ki, dövlət qurumlarının əksəriyyətində biz bunu görmürük. “Bilirsiz ki, Prezident İlham Əliyev tövsiyə edib ki, yerli istehsala marağın artırılması məqsədilə “NAZ-Lifan” avtomobillərindən istifadə etsinlər . O vaxt bəzi məmurların “NAZ-Lifan” avtomobillərini aldıqlarını gördük, təəssüflər olsun ki, bu gün yerli avtomobillərdən xidməti maşın olaraq istifadə etmirlər. Biz daha çox məmurların 100, 200 minlik, onlardan da bahalı maşınlarda işə, yaxud hansısa tədbirə getdiyinin şahidi oluruq. Dövlət qurumları rəhbərlərinin bahalı maşınlarda gəzməsi də cəmiyyətdə qıcıq yaradır. Çünki o avtomobillər dövlət büdcəsi hesabına aılınır, bu da büdcənin səmərəsiz şəkildə istifadə olunması deməkdir. Çox təəssüflər olsun ki, aidiyyəti dövlət qurumları bu faktlarla bağlı araşdırma aparıb Prezident İlham Əliyevə düzgün hesabat təqdim etmirlər. Həmin bahalı maşınlar həm də çoxlu benzin israfı deməkdir. Təbii ki, o nazirliklərin, o qurumların benzini həm bu şəkildə israf etməsi, həm də dövlət büdcəsi hesabına həmin maşınların bahalı qiymətlərə alınması büdcədən külli miqdarda vəsaitin xərclənməsi hesabına başa gəlir. Çox təəssüf ki, SHXÇDX rəhbərləri də çox bahalı maşınlardan istifadə edirlər.
Xeyli müddətdir ki, biz mətbuatda bu qurumun regionlar üzrə təmsilçilərinin rüşvətxorluq əməlləri barədə məlumatlara da rast gəlirik. İstər müharibə dövründə səfərbərlik məsələsində, istərsə də hərbi çağırış zamanı yol verdikləri nöqsanlarla bağlı xeyli məhkəmə işinə rast gəlirik. Bu xidmətin müəyyən əməkdaşları həbs olundular, cəzalandırıldılar. Yaxşı olardı ki, bu cür bahalı maşınlarla Şəhidlər Xiyabanına gəlməkdənsə, yerli maşınlarla bu müqəddəs məkanı ziyarət edəydilər, bu onların təvazökar olduğunu göstərərdi. İctimaiyyət də düşünərdi ki, bu xidmətin generalları, yüksək rütbəli şəxsləri təvazökardır, Prezidentin tövsiyələrini bütün fəaliyyətlərində əsas götürürlər. Təəssüf ki, biz bunu görmədik. Araşdırma aparsaq görərik ki, onların övladları, yaxınları, ailə üzvləri heç Vətən müharibəsində iştirak etməyiblər, ailələrində şəhid və qazi yoxdur”.
E.İslamoğlunun sözlərinə görə, bu halda da məmurlar xalqın yaşadıqlarını canlarında hiss etmir və dövlətin büdcəsini talamaqla özlərinin şəxsi maraqlarını təmin edirlər. “Təəssüflər olsun ki, məmurlar, yüksək vəzifəli şəxslər Prezidentin tövsiyələrinə əməl etmək əvəzinə dövlət büdcəsinin vəsaitlərini sağa-sola, lazımsız yerlərə xərcləyirlər, qiyməti 100-150 min manatlarla ölçülən maşınlarda gəzirlər, nəticədə büdcə boşalır. O pulu başqa yerlərə də yönəltmək olardı. Amma görürsüz ki, bu kimi məsələlər onları maraqlandırmır.
Hesab edirəm ki, Korrupsiya ilə Mübarizə İdarəsi belə hallarla mübarizə aparmalıdır, öz vəzifəsindən sui-isitifadə edən, büdcəni səmərəsiz, sağa-sola xərcləyən məmurlara qarşı cəza tədbirləri görülməlidir. Təəssüflər olsun ki, bizim məmurlar milyonlarla qiyməti olan villaları, bahalı həyatları, 100-150 minlik xidməti maşınları ilə gündəmə gəlirlər. Məmurlar bahalı maşınları ilə deyil, xalqa xidmətləri, təvazökar davranışları ilə bir-birilə yarışsınlar”-deyə E.İslamoğlu bildirdi.
İradə SARIYEVA
