Türkiyə Respublikasının Azərbaycan Respublikasında yeni təyin edilmiş fövqəladə və səlahiyyətli səfiri Birol Akgün fevralın 13-ü Bakıda Fəxri Xiyaban, Şəhidlər Xiyabanı və Türk Şəhidliyini ziyarət etdi. Ziyarət çərçivəsində səfir Birol Akgün media nümayəndələrinə açıqlama verib:
"Dəyərli media nümayəndələri, bu gün Azərbaycan Respublikasının Prezidenti cənab İlham Əliyevin etimadnaməni qəbul etdiyi üçün təşəkkürlərimi bildirirəm. Ulu öndərimiz Mustafa Kamal Atatürkün hər zaman vurğuladığı kimi, Türkiyə-Azərbaycan daima qardaş ölkələrdir. Türkiyə üçün Azərbaycanın sevinci, sevincimiz, kədəri, bizim də kədərimizdir. Azərbaycanın qurucusu Ulu öndər Heydər Əliyev, Qafqaz İslam Ordusunun komandiri Nuru Paşa və vətəni üçün canını fəda edən şəhidlərimizin hüzurunda olmaq çox qürur vericidir. Bu ölkənin keçmişi, gələcəyi ilə bağlantı quran şəhidlərimizi rəhmətlə anıram. Türkiyə və Azərbaycan çətin zamanlarda daima bir-birinin yanında olub. Müstəqillik müharibəsi zamanı Azərbaycanın etdiyi qardaş köməkləri heç unutmadıq. Qarabağ müharibəsi zamanı biz Azərbaycanın zəfərinə inanıb, daima bunu gözlədik. 6 fevral Türkiyədə baş verən zəlzələdə qardaş ölkənin köməyini heç bir zaman unutmayacıq. Bu gün olduğu kimi, sabah da elə olacaq. Türkiyə Cümhuriyyəti və Azərbaycan Respublikasının Prezidentinin uğurlu siyasəti, bənzərsiz dostluq münasibətləri ilə "Şuşa bəyannaməsi" də qeyd olunan münasibətləri daha da inkişaf etdirəcəyik. Məqsədimiz liderlərimizin qoyduğu ənənəyə sadiq qalmaqdır. Münasibətlərimizi hər sahədə inkişaf etdirməyə davam edəcik. Türkiyə ilə Azərbaycan dünən də, bu gün də qardaşdır və bu daima belə olaraq qalacaq".
Aytac Kərimova
