Mətləb Salahov: “Belə görünür ki, Ukrayna müharibəsi daha çox silah ticarəti və çirkli pulların “yuyulması” üçün hazırlanmış ssenaridir”
Artıq ABŞ prezidenti kreslosunu tərk edən, yaşı 80-ni haqlamış qoca Co Baydenin qanlı “əsəri” kimi tarixə düşən Ukrayna böhranı barədə hər keçən gün daha dolğun məlumatlar gün üzünə çıxır. Bir çox dünya mediasında daha çox silah ticarəti və siyasi maraqlar üçün başladılan bu qanlı müharibəyə dair elə faktlar üzə çıxır ki, bir anlığa dünya siyasətinə də, dünya nizamını idarə edənlərə də dəhşətli nifrət hissi yaranır adamda. Xüsusilə Ukrayna Prezidenti Volodimir Zelenskinin ayrılan pulların Ukraynaya çatmadığı barədəki son açıqlamaları Ukrayna müharibəsinin sirli tərəflərini yavaş-yavaş gün üzünə çıxarır. Yüzlərlə dinc Ukrayna vətəndaşının, qadın və uşaqların bombardman altında ölməsinə, minlərlə insanın soyuq qış günlərində öz ev-eşiyini tərk edib Avropa çöllərinə səpələnməsinə bais olanlara nifrət oxumaqdan başqa çarə qalmır. Yuxarıda qeyd etdiyimiz kimi, hər keçən gün bu qanlı müharibə barədə dəhşətli faktlar ortaya çıxdıqca dünyanın əsl üzünə daha çox bələd olursan. Maraqlar, qazanc, daha çox adam öldürmək üçün silah ticarəti... Jurnalist-ekspert Mətləb Salahov “Bakı-xəbər”ə açıqlamasında diqqətə çatdırıb ki, Rusiya-Ukrayna müharibəsini danışılmış ssenari kimi təqdim edənlərin sırası hər gün çoxalmağa başlayıb. M.Salahovun dediyinə görə, o zaman həm Rusiyanın ilk addımları, həm də ABŞ başda olmaqla Qərbdəkilərin sonrakı addımları müharibə ssenarisinin razılaşdırılmış proses olduğuna şübhələri daha da artırır: “Diqqət edin, ilk vaxtlar elə bir təəsürat yaradıldı ki, guya ABŞ Qərblə Rusiya arasındakı sərhədlərin Polşadan deyil, məhz Ukrayna ərazisindən keçirilməsi üçün əməliyyatlara başlayır. Səbəb kimi isə, guya Rusiyanın Avropaya qarşı irimiqyaslı hücum planı hazırlamasıdır. Sonra Kiyevdəki qərbpərəstlərin hakimiyyəti ələ keçirmələri baş verdi. Məhz bunlardan sonra Rusiya Krıma hücub edib Ukraynanın daha bir neçə strateti ərazisini ələ keçirdi. Bir qədər sonra Ukrayna ilə müharibənin qaçılmazlığı barədə təbliğat maşını işə salındı və 24 fevral soyuğunda Rusiya qoşunları üz tutdular Kiyevə sarı. Hər kəs yaxşı xatırlayır ki, həmin günlərdə çox qısa vaxtda Rusiya qoşunları Kiyevin darvazalarına qədər gələ bildilər. Həttda dəqiq yadımdadır ki, Kiyevin müdafiəsi üçün qum kisələrindən və avtomobil təkərlərindən ibarət barrikadalar da qurulmuşdu. Amma bir anda hər şey dəyişdi və köhnə sovet tanklarından ibarət Rusiya qoşunları geriyə hərəkət etməyə başladılar. Sual olunur: niyə? Məqsəd Kiyevi tutmaq idisə, niyə Moskva bunu etmədi ki? Əgər deyildiyi kimi Qərbin Ukrayna üzərindən kritik Rusiya qərarı var idisə, niyə Moskva Kiyevin darvazalarından geri döndü? Xatırladaq ki, o zaman Ukrayna ordusu Rusiyaya qarşı heç müqavimət göstərəcək halda belə deyildi. Sonrakı lokal, məqsədsiz müharibə planı işə düşdü və günü bu gün də davam edir. Son iki ildə isə Qərb dövlətlərindən Ukraynaya yardım adı ilə milyardlarla dollar həcmində yardım paketləri açıqlanıb. Həttda uzaq Lixteyştenə qədər. Elə ölkələr bu müharibədə Ukraynaya maliyyə yardımı ayırdıqlarını elan ediblər ki, Rusiya ilə tarix boyu “salam-əleyküm”ləri belə yoxdur. Və indi aydın olur ki, o yardımlardan əsər-əlamət belə yoxdur. Ukrayna vəd edilən o yardımların ancaq cüzi hissəsini ala bilib. Volodimir Zelenski son günlər aparıcı dünya mediasına açıqlamalarında bu məsələyə aydınlıq gətirib. SİTAT: “Biz ABŞ-nin vəd etdiyi 177 milyard dolların cəmi 75 milyardını almışıq. Bəziləri guya Ukraynanın Ştatlardan ordunun dəstəklənməsi üçün 200 milyard dollar aldığını iddia edir. Bu, həqiqətə uyğun deyil. Mən qalan pulların hara xərcləndiyini bilmirəm”. Bəs onda Ukraynaya Rusiya üzərində qələbə çalmaq üçün ayrılan maliyyə vəsaiti hara xərclənib? Məncə bu sual çox tezliklə Qərb dövlətlərində ciddi ajiotajlar üçün qığılcım kimi ortaya çıxacaq.Çünki Qərbin Almaniya, Fransa, Böyük Britaniya kimi nəhənglərindən başlamış, Lixteynşteyn kimi cırtdanlarına qədər hər dövlətin elan etdiyi yüz milyonlarla dollar yardımların, silah və sursat dəstəyinin heç on faizi Kiyevə gəlib çatmayıb. Belə görünür ki, Ukrayna müharibəsi silah ticarəti və çirkli pulların yuyulması üçün vacib məkan halına gəlib. Gün kimi aydındır ki, müharibənin əvvələrində guya Rusiyanın ildırımsürətli müharibə ilə Avropaya hücum edəcəyi barədə dövriyyəyə buraxılan təbliğatın arxasında qeyd etdiyim kimi, silah ticarəti və maliyyə maraqları dayanır. ABŞ-ın sabiq prezidenti Co Baydenin silah ticarəti ilə məşğul olan oğlunun adı Ukrayna müharibəsinin silah alverində hallanır. Əlbəttdə, bu məsələdə karlı tərəf təkcə Qərb deyil. Həm də Rusiyanın özü də bu oyundan karlı çıxan tərəfdir. Köhnə silahların əldən çıxarılması, müharibə adı altında ölkə daxilində icra olunan tədbirlər, Vladimir Putinin təkhakimiyyətlilik sistemini daha da gücləndirmək şansının yaranması - daha bilmədiyimiz çox şey. Amma tək həqiqət ortadadır ki, vaxtı ilə Rusiyada şoumenliklə məşğul olmuş V.Zelenski bir-bir müharibə sirlərini açıb tökməklə məşğuldur. Vəd edilən, amma ona çatmayan milyardlar Zelenskini dilə gətirib.”
Namiq Quliyev
