Özünü "islam dövləti", "şiəliyin sütunu" elan etsə də, İran adlanan molla rejimi öz əməlləri ilə bunun əksini sərgiləyir. Antitürk hərəkatlarının başında duran mollakratiya eyni zamanda da xristian erməniləri hər zaman dəstəkləyir. Şah rejimində də erməni toplumuna xüsusi yanaşılıb, bu gün də məscid, islam düşməni rejim ermənilərə hər cür şərait yaradıb. Bu toplum İran küçələrinə çıxaraq erməni separatizminə açıq dəstək verə bilir. Necə ki, biz bunun son zamanlar vaxtaşırı şahidi oluruq.
Azad İran Teleqram kanalı məlumat verir ki, İsfahan şəhərində 1100-ə yaxın erməninin iştirakı ilə azərbaycanlı ekoloji fəalların Laçın yolunda aksiyalarına son qoyulması tələbi ilə nümayiş keçirilib.
Etirazçılar əllərində “Artsaxın blokadasını dayandırın”, “Ermənistanın təhlükəsizliyi İranın təhlükəsizliyidir”, “Bakının Qafqaz siyasətinə son qoyun!”, “NATO-nun Turan dəhlizinə yox!” və s. kimi şüarlar yazılmış plakatlar qaldırıblar.
Nümayişdə Ermənistan parlamentinin deputatı Kristina Vardanyan və İranın cənubu və İsfahan üzrə arxiyepiskopu Sipan Kaşçiyan iştirak ediblər.
Gördüyünüz kimi, hətta bunların din xadimi də aksiyada iştirak edib. Molla rejimi bunlara həm qondarma "erməni soyqırımı" nın ildönümündə anti-Türkiyə aksiyası keçirməyə icazə verir, həm də indi Laçın yolunda "blokada"ya qarşı etiraz aksiyası keçirmələrinə şərait yaradıb. Halbuki, Azərbaycan türklərinə Xocalı soyqırımı ilə bağlı aksiya keçirməyə molla rejimi icazə verməz, soydaşlarımız neçə dəfə buna cəhd etsə də rejimin təpkisi ilə üzləşib.
“Bu, İran dövlətinin anti-Azərbaycan, anti-türk siyasətinin başqa bir örnəyidir”
Azərbaycan Milli Dirəniş Təşkilatının sözçüsü, hazırda Türkiyədə yaşayan Güney azərbaycanlı ictimai-siyasi fəal Məcid Cavadi Araz baki-xeber.com-a şərhində bildirdi ki, bu, molla rejiminin anti-Azərbaycan, anti-türk siyasətinin təzahürlərindən biridir. " İsfahanda ermənilər yığılıblar və sözdə guya Xankəndinin "blokadaya" alınmasına etiraz ediblər. İran dövləti də, təbii ki, onlara imkan yaradıb. Düşünürəm ki, bu, İran dövlətinin anti-Azərbaycan, anti-türk siyasətinin başqa bir örnəyidir.
Çünki biz bunu ilk dəfə görmürük. Dəfələrlə görmüşük ki, Tehranda ermənilər yığışıblar istər kilsələrinin içində, istərsə də eşiyində Türkiyə və Azərbaycan əleyhinə yalan, iftira dolu aksiyalar keçiriblər. Elə bu aksiyada olduğu kimi. Çünki bütün dünya bilir ki, hazırda Xankəndinin ətrafında, Laçın yolunda heç bir blokada yoxdur. Orada qanunsuz yüklərin keçirilməsinə icazə verilmir. Sivil şəxslər, humanitar yüklər rahatlıqla keçə bilirlər. Orada heç bir blokadadan söhbət gedə bilməz. Hətta ora göndərilmiş kriminal oliqarx Vardanyan belə Qarabağa girir və çıxır. Bu da o deməkdir ki, orada hər hansı bir blokada yoxdur. Bunu İran dövləti də, ermənilər özləri də bilirlər. Amma hər zaman olduğu kimi, İran bu cür davranışları anti-Azərbaycan, anti-türk siyasətinin bir parçası olaraq həyata keçirir. Rejim ermənilərdən Türkiyə və Azərbaycan, bütövlükdə türkçülük əleyhinə istifadə edir .
M.C.Araz qeyd etdi ki, elə bu siyasətin ucbatından Güney Azərbaycan türklərinə nəinki etiraz olaraq keçirməyə imkan verilir, ümumiyyətlə heç bir mədəni fəaliyyət, heç bir mədəni tədbir keçirməyə şərait yaradılmır, imkan verilmir.
Azərbaycan türklərinin molla rejimi tərəfindən mədəni hüquqlarının heç zaman tanımadığını vurğulayan Məcid Cavadi Arazın sözlərinə görə, bu gün güney türkləri desələr ki, biz Azərbaycana, Xankəndidə xalqımıza məxsus yataqların ermənilər tərəfindən qanunsuz istismarına qarşı aksiya keçirmək istəyirik, yaxud başqa bir məsələ ilə əlaqədar etiraz tədbiri düzənləyəcəyik, molla rejimi buna qəti imkan verməz. "Heç bir halda Azərbaycan türklərinə icazə verilmir. Amma ermənilər rahatlıqla yığılıb antitürk kampaniyalarını keçirə bilirlər. Dediyim kimi, bu da İranın yeni olmayan və yüz ildir davam edən, son zamanlarda daha da şiddətlənən siyasətidir. Bu, özəlliklə də ikinci Qarabağ savaşı sonrası, eyni zamanda Zəngəzur dəhlizi məsələsi ilə bağlı maksimum dərəcəyə çıxan anti-Azərbaycan və antitürk siyasətinin bir örnəyi və göstəricisidir"-deyə M.C.Araz qeyd etdi.
İradə SARIYEVA
