Məlum olduğu kimi, Qafqazın ən böyük məscidi sayılan Heydər məscidinin açılışı olub. İki ildən artıqdır tikintisi aparılan bu məscidin təməli qoyulandan işlər Prezident İlham Əliyevin nəzarətində idi. Tikinti müddətində mütəmadi olaraq məscidə baş çəkən Prezident İlham Əliyev nəhayət açılış üçün paytaxtın Binəqədi rayonuna getdi. Onu bu açılışda ailə üzvləri də müşayiət edib.
Quran ayələrinin avazı altında açılışı edilən Heydər məscidi indi nəinki Azərbaycanın, hətta Qafqazın ən böyük məscididir. Qafqazın ən böyük məscidinin açılışında Şimali Qafqaz Müftilərinin Əlaqələndirmə Şurasının sədri, Rusiya Federasiyası Qaraçay-Çərkəz müftisi İsmayıl Berdiyev, Rus Pravoslav Kilsəsinin Bakı və Azərbaycan Yeparxiyasının rəhbəri Aleksandr, Bakı Dağ Yəhudiləri Dini İcmasının sədri Milix Yevdayev, Qafqaz Müsəlmanları İdarəsinin Rusiya Federasiyasındakı səlahiyyətli nümayəndəsi və bütün Qafqazın şeyxi Hacı Allahşükür Paşazadə iştirak ediblər.
Məscidin açılışı zamanı bildirilib ki, orada İslama məxsus olan bütün təriqətlərin nümayəndələri birgə ibadət edə biləcək. Buna həm məscidin böyüklüyü, həm də ilkin təyinatının bu yöndə olması tam imkan verəcək.
Heydər məscidini Azərbaycanda fəaliyyət göstərən müxtəlif İslam icmalarını daha da yaxınlaşdıracaq yeni dini-ideoloji mərkəz kimi xarakterizə etmək olarmı?
Şərqşünas Seyid Camal Əzimbəyli "Bakı-Xəbr"ə açıqlamasında bildirdi ki, yeni inşa edilən məscid öz əzəmətilə hamını valeh etdi. Müsahibimizin sözlərinə görə, məscidin böyük üstünlüklərə malik olması ibadət edən bir adam kimi onu və bütün həqiqi dindarları çox sevindirir: "Bunu çəkinmədən demək lazımdır ki, Azərbaycanda ənənəvi İslam təriqətləri arasında heç vaxt nifaq olmayıb. Biz daima sünni-şiə qardaşlığının ən yuxarı səviyyədə olmasını görmüşük. Hazırda da Azərbaycan ən tolerant siyasət yürüdən bir dövlətdir. Özü də bütün bu siyasət yalnız İslam təriqətlərinə münasibətdə həyata keçirilmir. Bütün dini konfensiyaların nümayəndələri belə şəraitdən yararlana bilir. Yeni məscidin tikintisi bu qardaşlığın daha da sürətlənməsi istiqamətində mühüm rola malik olacaq. Bu böyük dini-ideoloji məktəb dövlətimizin yürütdüyü tolerant siyasətin bariz nümunələrindən biri sayılacaq. Düzdür, bəzi radikal dindar qruplar ola bilər ki, bu prosesdən kənarda qalmaq istəsin, ancaq onların sayı hansısa prosesə təsir edə biləcək qədər deyil".
