1 mart 2002-ci ildə Biləsuvar şəhərində anadan olan Şəhriyar Bəxtiyar oğlu Mirişli İkinci Qarabağ müharibəsinin zəfərlə başa çatmasında hünər göstərib adını Azərbaycanın yeni, şanlı tarixinə yazıb. 18 yaşında sinəsini Vətənə sipər edib onu alınmaz qalaya döndərən zəfər şəhidi Şəhriyarın adı hər dəfə çəkiləndə xalq qürur hissi keçirir.
Bu Vətən sevdalısı olduqca qısa bir ömür yaşadı, amma yaşının çərçivəsinə sığmayan qəhrəmanlığı ilə əbədi olaraq yaddaşlara köçdü, elinə-obasına sonsuz məhəbbət mücəssəməsinə döndü. Dövlət də onun müqəddəs şəhid adına ölümündən sonra layiq gördüyü “Vətən uğrunda”, “Cəsur döyüşçü”, Cəbrayılın, Füzulinin azadlığına görə medallarla daha bir şərəf qatdı. Şəhriyar öz şərəfli ölümü ilə bütöv bir millətin ürəyinə elə qəhrəmanlıq toxumu səpib ki, onlar cücərdikcə müdriklər beşiyi, qəhrəmanlar diyarı Azərbaycanda müstəqil, azad günlərin sayı bilinməz.
Mərdlik, cəngavərlik ana südü ilə birgə canına, qanına hopan, 44 günlük haqq savaşımızda igidlik nümunəsi göstərən Şəhriyar Mirişli həyatı dərk edəndən canına yağı dadanmış yurdunun taleyi onu düşündürüb. Orta məktəbi bitirib cəbhə bölgəsinin əsgər olmaqla vicdanla, şərəflə Vətən qarşısında oğulluq borcunu yerinə yetirib. Həmişə də müqəddəs yurd yerimiz Qarabağın azadlığı naminə səngərə, dığalarla döyüşə can atıb. Onun Vətən, torpaq sevgisi əsgər yoldaşlarına nümunə göstərilib.
Ermənistan işğalçı hərbi birləşmələri 2020-ci il sentyabrın 27-də cəbhə xətti boyunca Azərbaycanın yaşayış məntəqələrini ağır artilleriya atəşinə tutmasına cavab olaraq Ordumuz Ali Baş Komandanın əmri əsasında əks-hücuma keçib. Bununla da Şəhriyarın arzuladığı gün yetişib. Xalqımızın mərd oğulları 30 il əsarətdə olan Qarabağımızı erməni dığalardan təmizləmək üçün döyüşə giriblər. Şəhriyar da əlinə silah alıb ön cəbhədə, müharibənin ilk günündə yağıya sarsıdıcı zərbələr vurub, onlara ciddi itkilər verib. Biləsuvarın igid oğlu daha sonra ölümə meydan oxuya-oxuya Kəlbəcər, Cəbrayıl, Füzuli rayonların azadlığı uğrunda döyüşlərdə dığaların kabusuna çevrilib. Və hər dəfə döyüşə girəndə son qarış Vətən torpaqların azad olunacağı günədək düşmənlə döyüşəcəyinə and içib. Neçə-neçə ağır ölüm-dirim savaşlarda şücaət göstərən, doğma torpaq uğrunda can qoyan əsgər Şəhriyar Mirişli 21 oktyabrda Füzuli rayonu ərazisində döyüş tapşırığını yerinə yetirərkən düşmən tərəfindən açılan atəş nəticəsində aldığı güllə yarasından əbədiyyətə qovuşub. Azərbaycan layiqli bir övladı itirsə də, tökdüyü qanı hesabına ulu torpağın bağrına daha bir zəfər bayrağı sancılır.
Bəli, Vətənin müdafiəsi uğrunda canından keçərək şəhidlik zirvəsinə ucalmaq ən böyük qürur və şərəfdir. Bu zirvəyə ucalanlar işıqlı dünyanı cismən tərk edirlər, əbədi olaraq isə ürəklərdə yaşayırlar. Şəhriyar da...
Zəfər ORUCOĞLU Azərbaycan Jurnalistlər Birliyinin üzvü
