26/05/2020 00:47
728 x 90

Xüsusi karantin rejimində onlayn müraciətlərdə dəxli olmayan mövzular - ilk rəqəmlər açıqlandı, sonra deyirlər ki, cavablar gecikir...

img

Mesajla icazə almanın ilk günündə maraqlı vəziyyət yaranıb. Evdən çıxmaq istədiklərinə dair vətəndaşlar tərəfindən icazə əldə etmək üçün SMS-lə 8103 qısa nömrəsinə 223 min telefon nömrəsindən 456 min SMS göndərilib. Verilən məlumata görə, daxil olan mesajlardan təqribən 284 mini, yəni 62 faizi aidiyyəti olmayan məzmunla bağlı göndərildiyindən təsdiq cavabı almayıb. Qeyd edək ki, yaşayış yerini tərk etmək üçün qeyri-ciddi, aidiyyəti olmayan SMS-lərin göndərilməsi yaşayış yerini zəruri olaraq tərk etmək istəyən vətəndaşlara SMS-in vaxtında göndərilməsinə maneə törədir. Göründüyü kimi, vətəndaşlarımız yaradılan şəraitdən sui-istifadə edərək icazə almaq üçün lazımsız mesajlar göndərirlər. Bu da həqiqətən evdən çıxmaq zərurəti olan şəxslərin işini, icazə alma prosedurunu bir qədər ləngitmiş olur.

Belə halların yaranmaması ilə bağlı vətəndaşlarımızın üzərinə hansə məsuliyyət düşür?

Nicat Qasımlı:“Bir az məsuliyyətli davransaq, sistemin işində problem olmaz”.

İnformasiya Kommunikasiya Texnologiyaları üzrə mütəxəssis, VR360.az şirkətinin direktoru Nicat Qasımlı “Bakı-Xəbər”ə açıqlamasında bildirdi ki, vətəndaşlarımız maksimum belə hallardan çəkinməlidirlər:“Biz sizinlə bu sistemin işə düşməsindən əvvəl müsahibəmizdə demişdik ki, 8103 SMS xidmətinin işində problem olmayacaq. Gördük ki, sistem çalışdı. Ancaq onun işini ləngidən bəzi vətəndaşlarımız oldu. Verilən rəsmi məlumatdan görünür ki, edilən müraciətlərin böyük əksəriyyəti lüzumsuz olub. Hər kəsi belə hallardan çəkinməyə çağıram. Məlum olub ki, ilk gündə göndərilən SMS-lərin 60 faizi daha çox sistemi yoxlamaq məqsədilə göndərilən müəyyən SMS-lərdir. Ancaq qərarda zəruri halların nə olduğu konkret kodlarla göstərilib. Lakin o hallara aidiyyatı olmayan mətnlər göndərilir. Vətəndaşlarımız anlamalıdır ki, burda insan faktoru ilə bağlı məsələ var. Həmin mesajlara bir-bir cavab verilməlidir. İnsanlar başa düşməlidirlər ki, onların bu lazımsız SMS-ləri yaşayış yerini tərk etmələri zəruri olan vətəndaşın sorğusunu cavablandırmağı gecikdirə bilir. Vətəndaşlar bilməlidirlər ki, bu həm də karantin qaydalarının kobud şəkildə pozulmasıdır. Buna görə məsuliyyət də nəzərdə tutulur. Həmin şəxslər bilməlidirlər ki, bu gün Operativ Qərargahın verdiyi qərarlar karantin rejiminin qaydalarıdır. Bu qaydaları pozan hər bir şəxs qanunvericiliyə uyğun məsuliyyət daşıyır. Bunu da nəzərə almaq lazımdır ki, lüzumsuz SMS-lərin göndərilməsi şəbəkənin yüklənməsinə səbəb olur. Bu sistemin qurulub istifadəyə verilməsi belə böyük hadisədir. Məndə olan məlumata görə, bunu bizim yerli İKT mütəxəssisləri qurub ərsəyə gətirib. Hazırda bu sahədə iki mükəmməl sistem fəaliyyət göstərir.Biri vətəndaşların SMS-lə icazə almaq sistemi, digəri isə dövlət qurumlarının, özəl təşkilatların öz əməkdaşları üçün aldığı icazə sistemidir. Bir az məsuliyyətli davransaq, sistemin işində problem olmaz”.

Məhəmmədəli QƏRİBLİ

Son xəbərlər