Son günlər verillən məlumatlardan bəlli olur ki, Azərbaycanda koronavirus (COVİD-19) infeksiyasına yoluxma halları artır. Aprelin 4-nə olan məlumata əsasən, ölkədə 555 yoluxma faktı qeydə alınıb. Yoluxmaların sayının artması, demək olar ki, bütün dünya ölkələrində müşahidə olunur. Region ölkələri ilə müqayisədə Azərbaycanda vəziyyət qənaətbəxşdir. Bəziləri açıqlanan yoluxma sayları ilə bağlı apardıqları müşahidələrin əsasında yanlış rəylər çıxarırlar. Ümumdünya Səhiyyə Təşkilatının aprelin 4-nə olan məlumatına görə, Ermənistanda 736 yoluxma və 7 ölüm faktı qeydı alınıb. Bu ölkədə Azərbaycanla müqayisədə 5 dəfəyə yaxın az, cəmi 7994 test aparılıb. Gürcüstanda isə yoluxmaların sayı 156 nəfər təşkil edir, lakin ölüm halı hələlik qeydə alınmayıb. Bu müddət ərzində Azərbaycanda Ermənistan və Gürcüstanla müqayisədə daha çox test aparılıb. Ermənistala müqayisədə bu rəqəmlər arasındakı fərq dəfələrlə ölçülür. Aydındır ki, test nə qədər çox aparılırsa bir o qədər çox yoluxmanın üzə çıxma ehtimalı var. Bizdə indiyıdək 35 min test edilibsə, Ermənistanda bu rəqəm 7 min ətrafındadır. İndi təsəvvür edək ki, Ermənistan və ya Gürcüstan kimi balaca ölkələrdə Azərbaycanda aparılan sayda, yəni 35 min adam test edilsəydi yoluxma ilə bağlı hansı rəqəmlər üzə çıxmış olardı?
Milli Qeyri Hökumət Forumunun prezidenti Rauf Zeyninin “Bakı-Xəbər”ə açıqlamasında bildirdiyinə görə, regionun və dünyanın təcrübəsi göstərir ki, infeksiyanın sürətlə yayılması və pik həddə doğru hərəkət etməsi bir çox obyektiv və subyektiv amillərlə bağlıdır:
Rauf Zeyni:“Faktiki olaraq, Ermənistanda test edilən hər 10 nəfərdən birində yoluxma müəyyən edilib”
"Hər bir ölkə və region üçün bu hal spesifikdir. Bütün dövlətlər çalışırılar ki, pandemiya ilə maksimum həddə mübarizə aparsınlar. Regionda müqayisə aparıldıqda Azərbaycanda vəziyyətin daha yaxşı olduğu üzə çıxır. Biz bu informasiyaları həm də təhlil etmə baxımından diqqətlə izləyirik. Biz 35 min test aparıb 500-dən artıq yoluxma müəyyən etmişik. Ermənistanda isə 7 min testdən 700-dən çox yoluxma var. Burdakı kəskin fərqi, yəqin ki, özünüz də görürsünüz. Faktiki olaraq, Ermənistanda test edilən hər 10 nəfərdən birində yoluxma müəyyən edilib. Bu məntiqlə götürsək, yoxlanılanlar bizdəki qədər, yəni 35 min olsaydı yoluxanların sayı 3500 edərdi. Yalan üzərində qurulan bir ölkə kimi Ermənistanda bu statistika da gizlədilir ki, mövcud hakimiyyət tənqidlərdən uzaq olsun. Məntiqlə, ermənilər hər zaman əzabkeş obrazı yaratmaqda mahirdirlər. Ancaq görürsünüz ki, bu məsələdə necə susurlar. Bilirlər ki, vəziyyət bir qədər də pisləşsə onlara baha başa gələ bilər. Hətta indiki vəziyyətdə belə onlarda tibb işçiləri çatışmır. Bunu rəsmən bəyan ediblər. Bizdə proses şəffaf aparılır. Hətta deyərdim ki, dünyanın bir çox ölkələrinə örnək olacaq həddədir. Dövlətimiz tərəfindən aparılan tədbirlər ÜST tərəfindən də tam dəstəklənir. Biz də Milli QHT Forumu olaraq qərargah yaratmışıq. Bütün bölgələrimizdən həmin qərargaha 35 nəfər üzv olub. İctimai maarifləndirmənin həyata keçirilməsində yaxından iştirak edirik. İnanıram ki, tez bir zamanda biz problemin də həllinə nail olacağıq. Bunun üçün vətəndaşın da dövlətə dəstəyi olmalıdır. Verilən bütün tövsiyələrə əməl olunsa, daha az itiki ilə prosesi keçə bilərik”.
Məhəmmədəli QƏRİBLİ
