Sosial şəbəkələrdə bir çox sürücülərin DYP tərəfindən radarlar vasitəsilə koronovirus qadağalarını pozmaların görə 100 manat məbləğində cərimələndiyinə dair çeklərin fotoları paylaşılır. Ən maraqlısı budur ki, vətəndaşlar yaranmış vəziyyətlə bağlı narahatlqlarını ifadə edirlər ki, belə cərimələrin radarlar vasitəsilə olunması anlaşılmazlıq yarada bilər. Bəs əslində vəziyyət necədir?
Məlumatla bağlı Baş Dövlət Yol Polisi İdarəsinin ictimaiyyətlə əlaqələr şöbəsinin rəisi, polis polkovniki Kamran Əliyev avtomobillərin radara düşmə faktını təkzib edib:“Ölkədə mövcud karantin rejimi ilə əlaqədar nəzarət tədbirləri çərçivəsində DYP əməkdaşları da üzərinə düşən vəzifələri yerinə yetirir. Sözügedən protokollar isə yol polisi əməkdaşları tərəfindən saxlanılan avtomobillərə tərtib edilib. Onların radara düşərək bu cür cərimələnməsi barədə deyilənlər doğru deyil. Ümumiyyətlə, radarın bura heç bir aidiyyəti yoxdur. Martın 31-dən Operativ Qərargah məlumat yayır ki, zərurət olmadığı halda evdən çıxmayın. Ancaq fəaliyyətinə icazə verilən təşkilatlarda işləyənlər üzərində müvafiq sənəd olmaqla evdən çıxa və avtomobil idarə edə bilərlər. Bakıda idarə olunan bütün nəqliyyat vasitələri saxlanılacaq. Karantin rejiminə uyğun olaraq, avtomobilin zərurət olmadığı təqdirdə idarə olunduğu aşkar edilsə, həmin sürücü tərəfimizdən 100 manat cərimələnəcək”. Belə olan təqdirdə, sürücülərin güya radarlar vasitəsilə “epidemiya əleyhinə rejimin, sanitariya-gigiyena və karantin rejimlərinin pozulması”na görə cərimə edilmələrinə dair yanlış məlumatlar niyə tirajlanır?
Elməddin Muradlı:“Onlara telefon vasitəsilə gələn cərimə bildirişinin fotosunu çəkib, güya cərimənin radar vasitəsilə olunduğunu yazırlar”
Nəqliyyat məsələləri üzrə ekspert Elməddin Muradlı “Bakı-Xəbər” qəzetinə açıqlamasında bildirdi ki, bu məsələyə DYP tərəfindən aydınlıq gətirilib:“Xüsusi karantin qaydalarının pozulması ilə bağlı DYP cərimələr tətbiq edə bilər. Ancaq bu yöndə cərimələr DYP əməkdaşı tərəfindən edilməlidir. Yəni buraxılan xəta sürücüyə tam olaraq izah olunmalıdır. Xüsusi texniki vasitələr bu xətanı qeydə ala bilməz. Çünki cihaz insanın zərurət olub və ya olmadığı halda küçəyə çıxdığını müəyyənləşdirə bilməz. Sürücü sükan arxasında əlcək və maskadan istifadə etmədiyinə görə də DYP əməkdaşı tərəfindən cərimələnə bilər. Görülən tədbirlər aşkar şəkildə olmalıdır. Təəssüflər olsun ki, bəzən DYP əməkdaşları da avtomobili saxlayıb, sürücü ilə söhbət edib, onu yola salandan sonra cəriməni sistemə vurur. Sürücü bir də görür ki, ona cərimə gəlib. Bu da yolverilməzdir. Təəssüflər olsun ki, bəzi vətəndaşlarımız sosial şəbəkələrdə yanlış rəy formalaşdırırlar. Onlara telefon vasitəsilə gələn cərimə bildirişinin fotosunu çəkib, güya cərimənin radar vasitəsilə olunduğunu yazırlar. Bütün bunlar DYP-yə qarşı aparılan qarayaxmadır. Həmin cəriməni əks etdirən kağızın üzərində texniki qurğu ilə aşkar edildiyi yazılmırsa, deməli, bunu radar müəyyən etməyib. Belə halda DYP əməkdaşlarını da başa düşmək lazımdır. Onlar çox ağır şəraitdə xidmət aparırlar. Kafe, restoranlar bağlıdır, onlar hətta yemək yeməyə yer belə tapa bilmirlər. Belə həssas məqamlarda, tərəflər qarşılıqlı şəkildə bir-birini anlamalıdır. DYP-nin də tədbirlər görməsi vətəndaşların karantin rejiminə tam əməl etməsinə yönəlib”.
Məhəmmədəli QƏRİBLİ
