Azərbaycanda xüsusi karantin rejimi dövründə kimlərin xidməti vəsiqə və ya iş yeri barədə arayış əsasında hərəkət edə biləcəyi müəyyənləşib. Bu barədə Nazirlər Kabineti yanında Operativ Qərargahın yaydığı məlumatda qeyd olunub. Həmin siyahını təqdim edirik:
Azərbaycan Respublikası Prezidentinin Administrasiyasının və Azərbaycan Respublikasının Nazirlər Kabineti Aparatının əməkdaşları; Azərbaycan Respublikası Milli Məclisinin deputatları və Aparatının əməkdaşları; mərkəzi və yerli icra hakimiyyəti orqanlarının rəhbərləri və onların müavinləri; İnsan Hüquqları üzrə Müvəkkil (Ombudsman) və Aparatının əməkdaşları; dövlətə məxsus olan hüquqi şəxslərin, o cümlədən dövlət adından yaradılan publik hüquqi şəxslərin rəhbərləri və onların müavinləri; Azərbaycan Respublikası Xarici İşlər Nazirliyinin əməkdaşları; Azərbaycan Respublikası Kənd Təsərrüfatı Nazirliyinin və onun tabeliyindəki qurumların əməkdaşları; dövlət əhəmiyyətli və həyat təminatı obyektlərinin, habelə fasiləsiz fəaliyyət göstərən müəssisələrin əməkdaşları (1 nömrəli siyahı əlavə olunur); dövlət səhiyyə orqanlarının və qurumlarının (müəssisələrinin), özəl səhiyyə müəssisələrinin əməkdaşları; hüquq mühafizə, məhkəmə və hərbi xidmət nəzərdə tutulmuş orqanların əməkdaşları, vəkillər; kütləvi informasiya vasitələrinin əməkdaşları; Azərbaycan Respublikasında akkreditasiya olunmuş diplomatik nümayəndəliklərin və beynəlxalq təşkilatların əməkdaşları və onların yerli heyəti (Azərbaycan Respublikası Xarici İşlər Nazirliyi tərəfindən verilmiş akkreditasiya kartları əsasında).
Qeyd edək ki, koronavirus (COVID-19) infeksiyasının yayılmasının qarşısının alınması məqsədilə tətbiq edilən xüsusi karantin rejimi çərçivəsində ölkədə hərəkət məhdudiyyətləri müəyyən olunub. Göründüyü kimi, hərəkətinə məhdudiyyət qoyulmayan peşə sahibləri sırasında KİV nümayəndələrinin də adı var. Bunu çox obyektiv qərar saymaq olar. Çünki jurnalistlərin doğrudan da ekstremal şəraitlərdə çalışmalarına ehtiyac var. Ancaq bu amildən sui-istifadə halları da çox ola bilər. Çünki çoxlu sayda MMC kimi qeydiyyatdan keçən və möhürü həmin qurumu təsis edən şəxsin cibində olan, ən başlıcası isə, KİV adına iddia edən saytlar və uzun müddət nəşr edilməyən qəzetlər var. Onların istənilən şəxsə vəsiqə verməsi də problem deyil. Artıq bəzi şəxslərin xüsusi karantin qaydalarının qadağalarından yayınmaq üçün deyilən kateqoriyalı saytların vəsiqəsini nəyinsə müqabilində əldə etməyə maraqlı olmalarına dair məlumatlar var. Bu cür sui-istifadə hallarının qarşısını necə almaq olar ki, əsl peşə fəaliyyətini həyata keçirən jurnalistlərə maneçiliklər törədilməsin?
"Azər Həsrət:“...yalnız normal media fəaliyyəti ilə məşğul olan KİV-in bir qrupunun bu icazədən yararlanmasını təmin etməlidir”
Media eksperti Azər Həsrət “Bakı-Xəbər”ə açıqlamasında bildirdi ki, bu məsələ onu da narahat etməyə başlayıb: “Çünki KİV adından hər zaman sui-istifadə edənlər olub. Onlar münbit şərait olan kimi öz mənfur niyyətlərini həyata keçirməyə çalışırlar. Heç şübhəsiz, indiki vəziyyətdə də bunu etməyə çalışacaqlar. Bu baxımdan da, KİV deyəndə bunun sərhədlərini mütləq müəyyənləşdirmək lazımdır. Operativ Qərargah Mətbuat Şurası ilə birlikdə bu məsələni həll etməlidir. Yəni yalnız normal media fəaliyyəti ilə məşğul olan KİV-in bir qrupunun bu icazədən yararlanmasını təmin etməlidir. Hesab edirəm ki, Mətbuat Şurasının üzvlərinin bütün ölkə boyu məhdudiyyətsiz hərəkətinə vəsiqəni təqdim etməklə icazə verilməlidir. Bəzən elə hallar ola bilər ki, Mətbuat Şurasının üzvləri məsələyə müdaxilə etmiş olsunlar. Ciddi KİV-lər deyəndə, biz televiziyaları, mütəmadi nəşr edilən və ölkədə ciddiliyi ilə seçilən qəzetləri, bir də onlayn fəaliyyət göstərən və cəmiyyətə təsir gücü olan saytları nəzərdə tuta bilərik. Operativ Qərargah Mətbuat Şurası ilə məsələni müzakirə etsə, bu çevrəni dəqiq müəyyənləşdirə bilər. Çıxış yolu var. Bunu etməliyik ki, hər yoldan keçənə jurnalist vəsiqəsini verənlər bu imtiyazdan yaralana bilməsinlər. Dövlətin məqsədi hər bir vətəndaşın sağlamlığını qorumaqdırsa, belə detallara fikir verilməlidir ki, qoyulan məhdudiyyətlərə xələl gətirilməsin. Ciddi olmayan KİV onsuz da internet üzərindən fəaliyyət göstərir. Oturub evlərindən öz işlərini görsünlər”.
Məhəmmədəli QƏRİBLİ
