“Karantin tədbirlərinə ciddi əməl edilməsi əslində əsas hədəflərdən biri olmalıdır”
Koronavirusla bağlı, bütün ölkələrdə olduğu kimi, Azərbaycanda da təxirəsalınmaz tədbirlər həyata keçirilir. Dövlət orqanlarının fəaliyyətini əlaqələndirən Operativ Qərargahın yaradılması, bəzi ölkələrlə sərhədlərin bağlanması və gediş-gəliş təmaslarının məhdudlaşdırılması, karantin rejiminin tətbiqi qarşıya qoyulan vəzifələri maksimum icra etməyə imkan verib. Ölkədə kütləvi tədbirlərin, toyların təxirə salınması, dövlət və özəl sektora aid qurumlar, vətəndaşlar üçün xüsusi qaydaların elan olunması, onlara ciddi riayət edilməsi üçün nəzarət mexanizminin formalaşdırılması və tətbiqi qərara alınıb. Azərbaycan hökuməti əhalinin sağlamlığının etibarlı qorunması və virusun yayılmasının qarşısının alınması üçün həyata keçirilən tədbirlərin əhatə dairəsini daha da genişləndirib. Bu arada, bu gündən etibarən Azərbaycanda bütün bulvar, park və istirahət məkanlarına insanların sıxlığını tənzimləmək məqsədilə giriş məhdudlaşdırılıb. Bu barədə Nazirlər Kabineti yanında Operativ Qərargah məlumat yayıb. Onu da qeyd edək ki, Azərbaycanda 29 mart saat 00:00-dan etibarən xüsusi karantin rejimi gücləndirilir. O da məlum həqiqətdir ki, park və bulvarlarda insanlar bir-biri ilə daha çox təmasda olur. O baxımdan nəzərə alsaq ki, sözügedən məkanlarda insanların təmas imkanları daha genişdir, belə olan halda qadağa virusun yayılma risqlərinin minimuma endirilməsində necə müsbət rol oynayacaq?
Məsələyə münasibət bildirən professor Adil Qeybunllanın sözlərinə görə, park və bulvarlara girişin məhdudlaşdırılması koronavirusun yayılma risqini azaldır:“Havadan damcı yolu ilə yayılan respirator infeksiyanın hər birində təmas imkanlarının məhdudlaşdırılması əsas hədəflərdən biridir. Bunu bir sıra ölkələrin də təcrübəsi sübut edir və ortada müsbət nəticələr də var. Söhbət Çin və Almaniyada əldə olunan nəticələrdən gedir. Bu gün Almaniyada koronavirusun yayılma potensialının geniş olmasına baxmayaraq, effektiv görülən tədbirlər öz nəticəsini verib. Virusun yayılma intensivliyi Almaniyada İtaliya ilə eyni səviyyədə olsa da nəticələr tam fərqlidir. Almaniyada İtaliya ilə müqayisədə virusa yoluxanların sayı azdır. Bu onu göstərir ki, karantin tədbirlərinə ciddi əməl edilməsi əslində əsas hədəflərdən biri olmalıdır. Ona görə də Azərbaycanda park və bulvarlara girişin məhdudlaşdırılması koronavirusun yayılmasının qarşısının alınmasında müsbət rol oynayacaq. O üzdən, bütün vətəndaşlar buna əməl etməlidir”.
Vidadi ORDAHALLI
