“Sosial və səhiyyə yönümlü vətəndaş cəmiyyəti təsisatları indiki durumda çox fəal olmalı, təcrübələrini bölüşməli, eyni zamanda maarifləndirmə işi aparmalıdır”
Vətəndaş cəmiyyəti hər bir cəmiyyətin bel sütunudur. Məsələ ondadır ki, QHT sektorunu özündə birləşdirən vətəndaş cəmiyyəti dövlət-cəmiyyət münasibətlərinin qurulması, ümumilli məsələlərdə həmrəyliyin yaradılması, vətəndaşların milli və dövlət maraqları ətrafında cəmləşdirilməsi missiyasını yerinə yetirir. O da məlumdur ki, Prezident İlham Əliyevin rəhbərliyi ilə ölkədə koronavirusla ciddi mübarizə tədbirləri aparılır. Vətəndaşların sağlamlığının qorunmasına hesablanmış bu mübarizə izolyasiya tədbirlərindən tutmuş cəmiyyətin həmrəyliyinin təmin edilməsinə qədər olduqca genişmiqyaslıdır. Dövlət başçısının qərarı ilə yaradılan Koronavirusla Mübarizəyə Dəstək Fondunun yaradılması bu mübarizədə ən mühüm addımlardandır. Çünki bu təkcə virusla mübarizədə ianələrin toplanması, dövlətin xalq üçün, ölkə üçün həyata keçirdiyi işə dəstək yox, həm də ümumi həmrəyliyin yaradılması, bu bəşəri bəlaya qarşı cəmiyyətin birləşməsi deməkdir. Ancaq müşahidələr göstərir ki, ölkədəki QHT-lə koronavirusla mübarizədə fəal deyillər. Söhbət təkcə QHT-lərin hansısa maddi dəstəyindən getmir. Söhbət virusla mübarizədə QHT-lərin cəmiyyətdə aktiv fəaliyyətindən gedir. Çünki cəmiyyətin həmrəyliyi vətəndaş cəmiyyətinin əsas missiyası olmalıdır. Vətəndaş cəmiyyəti vətəndaşların həmrəyliyini yaratmalı, ümummilli məsələdə cəmiyyətlə dövlət arasında təmas qurmalı və insanları ümumi amal uğrunda birləşdirməlidir. Bu məsələdə QHT-lər nədənsə çox zəif görünür. Halbuki, koronavirusla mübarizədə QHT-lər aktiv olmalı idilər. Maraqlıdır, sözügedən məsələdə QHT-lər niyə passiv görünür?
Sözügedən məsələ ilə bağlı fikirlərini baki-xeber.com-la bölüşən AMİP funksioneri Əli Orucovun fikrincə, QHT-lərin bu məsələdə passiv mövqe sərgiləmələri təəssüf doğurur: “Koronavirus pandemiyası həm ölkəni, həm höküməti, həm də siyasi və qeyri-hökumət təsisatlarını çətin sınaq qarşısında qoyub. Ancaq təəssüflər olsun ki, hələ də Azərbaycanda QHT-lərin bu məsələdə fəaliyyətini qənaətbəxş saymaq mümkün deyil. Azərbaycanda 2500-dən çox QHT qeydiyyatadan keçib. Hər il yüzlərlə QHT hökumətdən qrantlar və yardımlar alır. Müxtəlif layihələrə on minlərlə manat vəsait xərclənir. Mənə elə gəlir ki, sosial və səhiyyə yönümlü QHT-lər indiki durumda çox fəal olmalı və təcrübəsini bölüşməlidir. Eyni zamanda maarifləndirmə işi aparmalıdır. Pandemiyadan təsirlənən bir çox insanların mənəvi-psixoloji durumu düşükdür, cəmiyyətin özündə bir ümidsizlik və həyəcan var. Lazımdır ki, bu istiqamətdə insanlara dəstək göstərilsin. Yəqin indi hər kəs, o cümlədən QHT-lər tapşırıq və buyruq gözləmədən əlini daşın altına qoymalıdır. Mən ümid edirəm ki, koronavirus pandemiyasından dövlətimiz və millətimiz az itki ilə çıxa biləcək. Bunun üçün hər kəs üzərinə düşəni etməlidir. Düşünürəm ki, bunu edənlər də var, amma bununla kifayətlənmək olmaz. QHT-lər bu işdə fəal olmalıdır”.
Vidadi ORDAHALLI
