30/05/2020 05:16
728 x 90

Karantin rejimi qaydalarını pozanlara cərimə sanksiyaları tətbiq olunmağa başladı

img

Polis paytaxtda xüsusi karantin rejimi qaydalarının pozulması hallarına qarşı tədbirləri davam etdirir. Məlum olduğu kimi, koronavirus pandemiyası ilə bağlı tətbiq edilən qadağaları pozan çoxlu sayda vətəndaşlarımız olur. Maarifləndirmə tədbirlərindən nəticə çıxarmayan həmin vətəndaşlarla bağlı hüquqi ölçülər götürülməyə başlanıb. Bakı şəhər Baş Polis İdarəsindən verilən məlumata görə, rejim qaydalarına əməl etməyən şəxslər barəsində qanunvericiliyə uyğun olaraq tədbirlər görülür. Xüsusi rejim qaydasını pozan şəxslər barəsində İnzibati Xətalar Məcəlləsində nəzərdə tutulmuş qaydada cərimə protokolu tərtib edilir.

Qeyd edək ki, Avropa ölkələri koronavirus pandemiyasıyla mübarizə prosesində indiyə qədər görünməmiş tədbirlərə əl atır, hətta cəzalandırmaq təhdidi ilə vətəndaşlara əmr edirlər ki, ancaq zəruri hallarda evlərindən çıxsınlar. Əvvəlcə ölkələrin çoxunda hökumətlər vətəndaşlara mümkün qədər az yer dəyişməyi və başqlarıyla təmasa girməməyi məsləhət görürdülər, son həftələrdə və günlərdə isə dilətutmalardan təhdidlərə keçiblər. Kütləvi tədbirləri təxirə salmaq və sərhədləri bağlamaq nisbətən asan olsa da, insanların davanışına aid qərarların icrasına nəzarət etmək faktiki olaraq mümkün deyil. Ona görə də rəsmilər təkcə inzibati amillərlə yox, insanların şüuruna və yoluxma qorxusuna bel bağlayırlar. Koronavirusun daha çox zərər vurduğu İtaliyada karantin şərtləri xeyli sərtdir. Ərzaq mağazaları və apteklərdən başqa hər yer bağlıdır. Bir neçə gündür ki, böyük şəhərlərin küçələri boşalıb. Evlərindən çıxan şəxslərdə hara və nə üçün getdiklərini bildirən kağız olmalıdır. Karantin rejimini pozmağa görə 300-4000 avro civarında cərimə cəzası nəzərdə tutulub. Koronavirus diaqnozu qoyulmuş şəxsin küçəyə çıxması isə 5 il həbslə nəticələnə bilər. Almaniyada qonaqlıq təşkil edən və ya iki nəfərdən artıq qruplarda toplaşan şəxsləri təxminən 200 avro cərimələyirlər. Almaniyada federal miqyaslı sərt qaydalar 23 martdan etibarən tətbiq edilir. Eyni evdə yaşamayan şəxslərin iki nəfərdən artıq qrupda toplaşması qadağan edilib. Buna əməl edilməsinə polis nəzarət edir. Bütün Almaniyaya aid olan ümumi cərimə qaydaları yoxdur. Məsələni nizamlamağı inzibati ərazilərin özlərinə həvalə ediblər. Məsələn, Şimali Reyn-Vestfaliya və Reynland-Pfalts hökumətləri 25 min avroya qədər cərimə tətbiq edə bilərlər. Demokratiyanın mərkəzi sayılan Avropanın inkişaf etmiş ölkələrində karantin qaydaları ilə bağlı sərt tədbirlərin görüldüyünün şahidi oluruq. Onlarla müqayisədə Azərbaycan dövlətinin vətəndaşlarına qarşı çox humanist davrandığının şahidiyik. Gərək ki, vətəndaşlarımız da bundan nəticə çıxarıb, zəruri olan karantin qaydalarını pozmasınlar. Məhəmmədəli QƏRİBLİ

 

Son xəbərlər