Aytəkin Kamranqızı:“Kimliyindən, vəzifəsindən asılı olmayaraq, hər kəs Koronovirusla Mübarizəyə Dəstək Fonduna müəyyən məbləğdə vəsait köçürür”
“Fonda yığılan vəsait koronavirusla mübarizə istiqamətində həyata keçirilən tədbirlərin təkmilləşdirilməsinə və maddi-texniki bazasının gücləndirilməsinə yönəldilir”
İstənilən xəstəliyə qalib gəlmək üçün mütləq şəkildə sağlam ruhla bərabər yaxşı da maddiyyat olmalıdır. O ki qaldı bütün dünyanı cənginə alan koronavirus ola… Bu günə qədər dünyada ümumilikdə 414 179 insan koronavirusa yoluxub, 18 440 nəfər isə bu virusun qurbanına çevrilib. Xəstəliklə mübarizə üçün ayrılan vəsait də elə yoluxanların sayı qədər çox və ağlasığmazdır. Hər bir ölkə koronavirusla mübarizə aparmaq üçün kifayət qədər vəsait sərf edir. Azərbaycan da, öz növbəsində, xəstəliyin geniş yayılmaması üçün lazım olan hər bir işi görür. Məlumat üçün bildirək ki, Koronavirusla Mübarizəyə Dəstək Fonduna 60 milyon manat yığılıb. Koronavirusla Mübarizəyə Dəstək Fondu qısa müddətdə yaranıb. Bu günlərdə fonda 60 milyon manat vəsaitin toplanması haqqında fikir bildirən sosioloq Aytəkin Kamranqızı qeyd etdi ki, koronavirus infeksiyasının Azərbaycanda yayılmasının qarşısını almaq və onunla mübarizə istiqamətində silsilə tədbirlər həyata keçirilir:“Məlumdur ki, Azərbaycan Prezidentinin 19 mart 2020-ci il tarixli “Azərbaycan Respublikasında əhalinin sağlamlığının qorunması və koronavirus infeksiyasına qarşı mübarizənin gücləndirilməsi ilə bağlı tədbirlər haqqında” Fərmanına əsasən, Koronavirusla Mübarizəyə Dəstək Fondu yaradılıb. Prezidentin ehtiyat fondundan Koronavirusla Mübarizəyə Dəstək Fonduna ilkin olaraq 20 milyon manat ayrılıb. Prezident İlham Əliyev özünün bir illik əməkhaqqını bu fonda ianə etməklə böyük vətəndaşlıq nümunəsi göstərdi. Bu addım təkcə Fonda yardım deyil, həm də imkanlı təşkilat və müəssisələrə maddi müstəvidə səfərbər olmaq çağırışı idi. Daha sonra Koronavirusla Mübarizəyə Dəstək Fonduna fiziki və hüquqi şəxslər könüllü ödəmələr həyata keçirməyə davam edir. Kimliyindən, vəzifəsindən asılı olmayaraq, hər kəs Koronavirusla Mübarizəyə Dəstək Fonduna müəyyən məbləğdə vəsait köçürür. Elə şəxslər var ki, sadəcə 1 manat köçürür. Bunun özü də böyük jestdir. Kimin imkanı nəyə çatırsa dəstəyini əsirgəməməlidir”. Həmsöhbətimizin sözlərinə görə, Fonda yığılan vəsait koronavirusla mübarizə istiqamətində həyata keçirilən tədbirlərə, o cümlədən xüsusi rejimli tibb müəssisələrinin formalaşdırılmasına, tibb sahəsində çalışan işçilərin mükafatlandırılmasına və onlara maddi yardım göstərilməsinə, tibb müəssisələrinin infrastrukturunun təkmilləşdirilməsinə və maddi-texniki bazasının gücləndirilməsinə yönəldilir”.
Günel CƏLİLOVA
