“Görünən odur ki, dövlətimiz cəmiyyəti bu bəladan qorumaq üçün bütün zəruri tədbirləri həyata keçirir”
Dünyada koronavirus pandemiyasının geniş yayıldığını nəzərə alaraq, koronavirus infeksiyasının ölkəmizdə yayılmasının, onun törədə biləcəyi fəsadların qarşısının alınması, əhalinin sağlamlığının qorunması məqsədilə martın 24-də saat 00:00-dan etibarən ölkə ərazisində xüsusi karantin rejimi elan edilib. Nazirlər Kabineti yanında Operativ Qərargahın bununla bağlı məlumatında deyilir ki, dünyada yayılmış koronavirus (COVİD-19) pandemiyası ilə mübarizədə müxtəlif ölkələrin təcrübəsini nəzərə alaraq, əhalinin sağlamlığının qorunmasını ali məqsəd kimi qəbul edərək, koronavirus infeksiyasının ölkədə yayılmasının, onun törədə biləcəyi fəsadların qarşısının alınması məqsədilə Azərbaycan Respublikasının Sanitariya-epidemioloji salamatlıq haqqında Qanununun 25-ci maddəsinə əsasən, ölkədə 24 mart 2020-ci il saat 00:00-dan etibarən 20 aprel saat 00:00-dək xüsusi karantin rejimi elan edilir. Bu müddət ərzində 65 yaşdan yuxarı insanlara evdən çıxmaq qadağan edilib. Bu kateqoriyadan olan tənha yaşayan şəxslərə, qanunvericiliyə əsasən, sosial xidmətlərin göstərilməsinin təmin edilməsi nəzərdə tutulub. Mülkiyyət növündən asılı olmayaraq, ölkə üzrə rayon və şəhərlərarası sərnişindaşıma fəaliyyəti dayandırılıb. Həmçinin təklif edilib ki, Bakı Nəqliyyat Agentliyi metro stansiyaları arasında müəyyən edilmiş marşrut əsasında saat 06:00-22:00 arası xüsusi ekspress avtobus xətlərini tətbiq etsin. Sərnişinlərə tövsiyə edilsin ki, metrodan istifadə minimuma endirilsin, yerüstü nəqliyyatdan istifadəyə üstünlük versinlər. İctimai yerlərdə, o cümlədən küçələrdə, bulvarda, parklarda və sair yerlərdə şəxslərin 10 nəfərdən artıq qruplarda cəmləşməsi qadağan edilib. İnsanlarası təmaslarda vətəndaşlar tərəfindən 2 metrlik məsafənin saxlanması tövsiyə edilir. Nəzdindəki supermarketlər, ərzaq mağazaları və apteklər istisna olmaqla, ölkə ərazisində ticarət mərkəzlərinin və “Mall”arın fəaliyyəti dayandırılıb. Xüsusi karantin rejiminin tələblərinin icrasına nəzarət Daxil İşlər Nazirliyinə həvalə edilib. Görünən odur ki, Azərbaycan dövləti ölkə əhalisini bu qorxunc virusdan qorumaqdan ötrü bütün mümkün tədbirləri görür. Bu baxımdan koronavirusla mübarizədə ölkəboyu xüsusi karantin reljiminin elan edilməsinin əhəmiyyətini ekspertlər necə dəyərləndirir?
Məsələyə münasibət bildirən şərqşünas Seyid Camal Əzimbəyli dövlətin bu yöndə gördüyü tədbirləri dəstəklədiyini bildirdi. Onun fikrincə, ölkə boyu xüsusi karantin rejiminin tətbiq edilməsi əhalinin koronavirusdan qorunmasına xidmət edir:“Bu onu göstərir ki, Prezident başda olmaqla, Azərbaycan dövləti xalqın mənafeyini düşünür. O üzdən, zəruri olan bütün tədbirlər görülür. Hesab edirəm ki, əhali karantin müddətində tələb olunan bütün qaydalara əməl etməlidir. Çünki bununla bağlı atılan bütün addımlar əhalinin mənafeyinə hesablanıb. Dünyanın müxtəlif ölkələrində olan dostlarla əlaqə saxlayıram. Məlum olur ki, Azərbaycan dövlətinin bu məsələ ilə bağlı atdığı addımlar digər ölkələrlə müqayisədə daha effektli təsir bağışlayır. Görünən odur ki, dövlətimiz cəmiyyəti bu bəladan qorumaq üçün bütün zəruri tədbirləri həyata keçirir. Məqsəd Azərbaycan xalqının sağlamlığını qorumaqdır. Ona görə də hər birimiz dövlətin bu yöndə gördüyü işlərə dəstək verməliyik. Qoyulan qaydalara hamı riayət etməlidir”.
Vidadi ORDAHALLI
