03/04/2020 12:06
728 x 90

Özəl klinikalar koronavirus dövründə dövlətə və cəmiyyətə heç bir fayda vermədilər - Azərbaycanda özəl klinikalar niyə də yenidən dövlətləşdirilməsin... - Aydın Quliyev yazır...

img

Koronavirus deyilən təhlükə ilə qlobal mübarizə mərhələsi başlayandan ölkəmizdə diqqət çəkən bir təzahür də budur ki, özəl tibb müəssisələri özlərini çox soyuq, laqeyd və zəif aparırlar. Bu ölkəni bürüyən qorxunun sanki onlara dəxli yox imiş. Bəlkə də dəxli var və oturub, gəlir mənbəyi olan xəstələrin say artımını gözləyirlər…

Baki-xeber.com-un xəbərinə görə, bu sözləri politoloq Aydın Quliyev özünün facebook səhifəsində yazıb. Dünyanı bürüyən koronavirus təhlükəsinə qarşı dövlət səviyyəsində atılan ardıcıl addımlara diqqət çəkən A.Quliyev özəl sektorun bu prosesdən yaxasını kənara çəkməsini yolverilməz adlandıraraq sual edir ki, belə bir zamanda dövlətin siyasətinə dəstək verməyəcəklərsə, onların özəl varlığına ehtiyac varmı?

Politoloq daha sonra yazır:

-Faktdır ki, özəl xəstəxana biznesinin "kralları" bu ölkədə illərdi ən sanballı gəliri olan adamlar sayılır. Bir qəpiklərindən keçməz, yetim-yesirə əl tutmaz, qaçqın və köçkünlərə əl uzatmaz, müharibə əlili və şəhid ailəsi bilməz, dövlət başçısının "Sosial məsuliyyət" layihələri çərçivəsində heç bir çağırışa cavab verməzlər..
Özəl xəstəxanaların koronavirusla mübarizədə zəif, utilitar iştirakı bütün dünyada özünü göstərsə də, bu problem Azərbaycanda daha dəhşətli şəkildə üzə çıxır. Bütün ağırlıqlar dövlət xəstəxanalarının üzərinə düşüb. Belədə, yalnız öz "krallarına" quduz pullar qazandıran özəl xəstəxanalar və klinikalar sistemi bizə lazımdlrmı?
Bir vaxtlar dünya ölkələri dövlət xəstəxanaları sistemindən kütləvi şəkildə özəl xəstəxanalar susteminə keçdi.Onda dövlətlər və hökumətlər nisbətən kasıb, özəl sektor isə varlı idi.Öz dövrü üçün ən yaxşı xəstəxanalar məhz bu səbəbdən əsasən özəl sektorda yarana bildi. İndi ki hər şey tərsinə və həm də yaxşı tərəfə dəyişib! Məsələn, Azərbaycan dövləti bu gün dünyada ən yaxşı dövlət xəstəxanaları yaratmaq imkanına malikdirsə və yaradırsa, niyə də bütün xəstəxanaların yenidən dövlətləşdirilməsi dövrünə qayıtmayaq?!Ölkənin ən ağır günlərində hər tibbi problemi çiyninə çəkən belə imkanlı və sosialyönümlü dövlətimiz varsa, xəstəxana sistemləri niyə də Həsənqulunun, Məmmədqulunun əlində olmalidir ki, bu "qulular" da çətin “virus günlərində” yaxalarını kənara çəkərək ancaq şıdırğı pul qazanmaqlarında olsunlar? Özəl klinika və xəstəxanaların gündəlik kassasının az qala Mərkəzi Bankın filiallarından biri qədər varlı olduğunu kim bilmir ki?!
Bəzi ölkələr XXI əsrdə artıq özəl xəstəxanalar sisteminin özünü sosial məsuliyyət müstəvisində qətiyyən doğrultmadığını, ancaq kimlərinsə şəxsi gəlir mənbəyinə çevrildiyini açıq deyir, bu səbəbdən də xəstəxanaların dövlətləşdirilməsinə yenidən qayıtmağı qərarlaşdırır. Bəs Azərbaycan nə üçün özünü doğrultmayan özəl klinikalardan dövlət xəstəxanaları sisteminə qayıtmasın?! Burada söhbət heç kimin əmlakının müsadirə edilməsindən getmir. Qərar olarsa, kimsənin əmlakına qətiyyən ziyan vurmadan hamının əli çatan və çətin günlərdə ictimai yükə çiyin verən dövlət xəstəxanaları sisteminə yenidən qayıtmaq mümkündür…

 

Son xəbərlər