“... hər iki mərasim kütləvi xarakter daşıdığından, cəmiyyət üçün müəyyən potensial risq yaradır”
Azərbaycanda toy mərasimlərinin keçirilməsi qadağan edilib. Bu barədə Azərbaycan Respublikası Nazirlər Kabineti yanında Operativ Qərargah məlumat yayıb. Məlumatda qeyd olunub ki, ölkə ərazisində bütün toy məclislərinin keçirilməsi qadağan edilib (14 və 15 mart 2020-ci il tarixlərinə əvvəlcədən təyin olunan toy mərasimləri istisna olmaqla). Eyni zamanda, dəfn mərasimləri istisna olmaqla, mərasim zallarında, çadırlarda və digər qapalı məkanlarda yas mərasimlərinin keçirilməsi qadağan olunub. Məlumatda qeyd olunur ki, hazırda koronavirus zəminində yaranan fövqəladə şəraitdə yalnız dövlət tərəfindən keçirilən tədbirlər deyil, vətəndaşlarımızın, bütün cəmiyyətin sosial məsuliyyətdən irəli gələn addımları, görülən işlərə dəstəyi vacibdir. Həmçinin bildirilib ki, koronavirus infeksiyası (COVİD-19) dünya ölkələri arasında sürətlə yayılmaqda davam edir. Virusun inkubasiya dövrünün uzun olması, yayılma sürəti və vaksinin hələ də tapılmaması dövlətləri daha da ciddi tədbirlər görməyə sövq edir. Ümumdünya Səhiyyə Təşkilatı tərəfindən koronavirus infeksiyasının qlobal pandemiya elan olunduğunu nəzərə alaraq və virusun qarşısının alınması istiqamətində ÜST-nin tövsiyə və tələblərindən irəli gələrək ölkə ərazisində bir sıra təxirəsalınmaz tədbirlərin həyata keçirilməsi zərurəti yaranıb. Bununla əlaqədar bir ay müddətində kütləvi tədbirlərin təxirə salınması qərara alınıb. Bütövlükdə ekspertlər yas və toy mərasimlərinin qadağan olunmasının əhəmiyyətini necə dəyərləndirir?
Məsələyə münasibət bildirən şərqşünas Seyid Camal Əzimbəylinin sözlərinə görə, dövlət tərəfindən verilən bu kimi məhdudlaşdırıcı xarakterli qərarlar müsbət əhəmiyyətə malikdir: “Bu, virusun yayılma risqini aşağı salır. O baxımdan toy və yas mərasimlərinə qoyulan qadağanı müsbət hal kimi dəyərləndirirəm. Koronavirus təhlükəsi fonunda belə bir qadağanın tətbiq olunmasına ciddi ehtiyac var idi. Çünki hər iki mərasimlər kütləvi xarakter daşıdığından cəmiyyət üçün müəyyən potensial risk yaradır. O üzdən, bu kimi qabaqlayıcı tədbirlərin görülməsi vacib idi. Təhlükəli virusun tüğyan etdiyi indiki dövrdə belə qərarların verilməsi təbiidir. Bəzən elə şərait formalaşır ki, bu istiqamətdə adminstrativ üsulların işə salınmasına zərurət yaranır. Ona görə də hamı verilən qərarlara əməl etməlidir. İnsanları mövcud vəziyyətlə bağlı məlumatlandırmaq lazımdır. Yas və toy mərasimlərinin müvəqqəti dayandırılmasının əhəmiyyəti təbliğ edilməlidir. Bu barədə əhali mütəmadi məlumatlandırılmalıdır. Çünki bu məsələ hamını düşündürməlidir. Cəmiyyət dövlətlə birlikdə bu çətinliyin öhdəsindən gələcək”.
Vidadi ORDAHALLI
