Ötən şənbə Səudiyyə Ərəbistanının dövlət neft şirkəti "Saudi Aramco"nun obyektlərinə hücum edən husilər Yəməndəki ərəb koalisiyasının hücumları davam etdirəcəyi təqdirdə Birləşmiş Ərəb Əmirliklərini (BƏƏ) də vurmaqla hədələyiblər.
Baki-xeber.com xəbər verir ki, bu barədə, Səudiyyə Ərəbistanının Müdafiə Nazirliyindən "Saudi Aramco"ya hücumun İran tərəfindən dəstəklənməsi barədə verilən açıqlamadan sonra husilərin sözçüsü Yahya Seri deyib.
Seri, Səudiyyə Ərəbistanının Bekik və Haris neft obyektlərini, aralarında ilk dəfə istifadə edilən aparatların da olduğu, çox sayda dronlarla hədəf aldıqlarını bildirib.
Hücumların hədəflərin məsafə və istiqamətinə görə üç istiqamətdən gerçəkləşdirildiyinə işarə edən Seri, 1500-1700 km mənzilli Samad-3 və üçüncü nəsil Kasif tipli dronların da hücumlarda istifadə edildiyini deyib.
O, Ərəb koalisiyası hücumları davam etdirəcəyi təqdirdə Səudiyyə Ərəbistanı və BƏƏ-yə əks hücumları artırmaq və daha çox həyati əhəmiyyətli obyektləri hədəf alacaqları ilə təhdid edib. Seri, BƏƏ-nin paytaxtı Əbu Dabi və Dubayın da vurulacaq hədəflər siyahısında yer aldığını söyləyib.
Xatırladaq ki, sentyabrın 14-də Səudiyyə Ərəbistanının "Saudi Aramco" dövlət şirkətinə məxsus Bekik və Haris neft emalı zavodlarına hücuma görə məsuliyyəti Yəməndəki qiyamçı husilərin öz üzərinə götürüb. Hücumdan sonra hər iki zavodda güclü yanğın başlayıb və saatlar sonra söndürülüb.
Neft emalı zavodlarındakı partlayış nəticəsində nəql edilən xam neftin həcmi 5,7 milyon barel azalıb və bu da şirkətin hasilatının 50 faizinə bərabərdir. Bu itki anbarlardakı ehtiyatlar hesabına kompensasiya edilir. Eyni zamanda neft emalı zavodlarındakı yanğın qaz hasilatını da sutkada 2 milyard kub fut həcmində azaldıb. Bu həcmdə qaz 700 min barel sıxılmış maye qazın istehsalında istifadə edilir. Bununla da ölkənin etan və sıxılmış maye qaz ehtiyatları yarıya qədər azalıb.
