ABŞ-ın İrana qarşı sanksiyaları davam etdikcə, regionda heç bir müsbət dəyişiklik olmayacaq. “Trend”in məlumatına görə, bunu İran Prezidenti Həsən Ruhani Dövlət Həftəsi (24-30 avqust) münasibətilə bir sıra layihələrin açılışı ilə əlaqədar təşkil olunan tədbirdə deyib.
H.Ruhaninin sözlərinə görə, müsbət dəyişikliklərin açarı Vaşinqtonun əlindədir: "Qərb ölkələri regionda əlavə təhlükəsizlik və region ölkələri ilə yaxşı əlaqələr qurmaq istəyirsə, addımlar atmalıdırlar.İranın hərbi doktrinası normal silahlara əsaslanır və nüvə silahı, kimyəvi silah, kütləvi qırğın silahlarına yer yoxdur".
İran sanksiyaları aradan qaldırmağa çalışacaq. Bunu isə İran hökumətinin sözçüsü Əli Rəbii mətbuat konfransında deyib.
Ə.Rəbiinin sözlərinə görə, İran sanksiyaları heç bir vəchlə qəbul etmir.
Ötən həftənin İranın xarici diplomatiyasının aktivliyi ilə seçildiyini deyən Rəbii əlavə edib ki, İslam Respublikası ABŞ-ın təzyiqlərinə təslim olmayıb: “İran hökuməti bütün gücü ilə çalışır ki, ABŞ-ın sanksiyalarının mənfi nəticələrini azaltsın, eyni zamanda Hərtərəfli Birgə Fəaliyyət Planında qalan üzvləri öz öhdəliklərini yerinə yetirməyə məcbur etsin”.
Qeyd edək ki, 2016-cı il yanvar ayında İranın nüvə proqramı ilə əlaqədar İran və 5+1 qrupu (ABŞ, Rusiya, Çin, Britaniya, Fransa və Almaniya) arasında Hərtərəfli Birgə Fəaliyyət Planı icra olunub. 2018-ci ilin may ayında ABŞ bu plandan çıxdığını bəyan və həmin ilin noyabr ayında İrana qarşı sanksiyalar tətbiq edib. Bu planın avropalı üzvləri sazişi qorumaq istiqamətində 2019-cu ilin yanvar ayında İranla ticarəti davam etdirmək üçün İNSTEX maliyyə mexanizminin yaradıldığını bəyan ediblər. İran saziş tərəflərinin öz öhdəliklərini yerinə yetirmədiklərini əsas götürərək 8 mayda sazişdə nəzərdə tutulan 300 kiloqramdan artıq uranın satışı ilə bağlı öhdəlikləri dayandırdığını bəyan edib. İran 7 iyulda uranın 3,67%-lik zənginləşdirilməsi və Ərak Ağır Su reaktorunun rekonstruksiyası ilə bağlı nüvə sazişində nəzərdə tutulan öhdəlikləri yerinə yetirməyəcəyini elan edib. İranın Avropa tərəfinə verdiyi 60 günlük vaxt 7 sentyabrda başa çatır.
