Fransa Prezidenti Emmanuel Makron, önümüzdəki həftələrdə ABŞ prezidenti Donald Tramp və İran prezidenti Həsən Ruhaninin görüşə biləcəklərini deyib.
Baki-xeber.com xəbər verir ki, Makron, Fransanın Biarrits şəhərində G-7 sammitinin üçüncü və sonuncu sessiyasından sonra ABŞ Prezidenti Donald Trampla birgə mətbuat konfransı keçirib.
Sammitdən, əvvəldən bir çox gözləntilərin olduğunu və liderlər arasında birliyin ortaya qoyulduğunu ifadə edən Makron, gələn il G-7-yə ABŞ-ın başçılıq edəcəyini söyləyib.
Makron Trampla iki tərəfli görüşdə bir çox məsələni müzakirə etdiklərini deyib. "İranın nüvə sazişinə dair öhdəliklərini yerinə yetirməsi barədə razılığa gəldik. İran heç vaxt nüvə silahına sahib olmamalıdır və bölgənin sabitliyinə təhdid yaratmamalıdır" – deyən Makron, iki gün əvvəl İran xarici işlər naziri Məhəmməd Cavad Zəriflə Biarritsdə baş tutan görüşdə bir nəticəyə gəlinmədiyini, ancaq dialoqu gücləndirdiyini bildirib.
Makron, bir gün sonra telefonla danşdığı Ruhaninin, ölkəsinin maraqlarına uyğun olduğu müddətcə istənilən siyasi liderlə görüşməyə hazır olduğunu söylədiyini deyib.
"Ruhani və Zərifə dediyim kimi, əgər Ruhani Trampla görüşməyə qəbul edərsə, razılıq əldə edilə bilər. Mən önümüzdəki həftələrdə Ruhani və Tramp arasında görüş keçirilməsini istəyirəm" deyən Makron bu görüşün baş tutmasının çox vacib olduğunu vurğulayıb.
"Danışıqlar baş tutması və bir razılaşma əldə etmək üçün şərtlər yaratdır" – Makron deyib.
Ruhani ilə görüş məsələsinə toxunan Donald Tramp isə, "Şərtlər uyğun olarsa, təbii ki qəbul edərəm" deyib. Tramp ABŞ-ın 2015-ci ildə bağlanan beynəlxalq nüvə anlaşmasını tərk etməsindən sonra Həsən Ruhani ilə Tehranın nüvə proqramı ilə bağlı yeni razılaşmanı müzakirə etməyin gözəl bir şans olduğunu deyib. Tramp “İranın da görüşmək istədiyini düşünürəm” deyib. Lakin Tramp bu görüşün İran ordusunun xaricdə gərginlik yaratmayacağı şərtilə baş tuta biləcəyini bildirib.
Tramp Fransanın İranla ABŞ arasında vasitəçilik səyləri ilə bağlı sualı cavablandırarkən deyib: "İran vəzifəyə başladığım 2.5 il əvvəlki ölkə deyil. İran bir nömrəli terror ölkəsi idi. Mən vəzifəyə başlayanda 18 münaqişə zonası var idi, hər biri də İran tərəfindən dəstəklənirdi. İranın böyük potensialı var. Rejim dəyişikliyi yaxud da, lider dəyişikliyini hədəfləmirik. Nüvə silahına, ballistik raketə sahib olmasınlar və anlaşma müddətinin daha uzun olmasını istəyirik” deyə cavab verib.
O israr edir ki, 2015-ci il razılaşmasına əsasən İranın yalnız 10 il müddətinə deyil, daha uzun müddətə nüvə silahı və ballistik raketlərini sınaqdan keçirməsinə qadağa qoyulmalıdır.
ABŞ prezidenti, İranın "mənfi davranışlarını davam etdirəcəyi halda" sərt müdaxilə ilə qarşılaşacağı ilə bağlı xəbərdarlıq da edib.
