Fransa prezidenti Emmanuel Makron Amazondakı meşə yanğınlarının G-7 sammitinin gündəminə çıxarılmasını təklif edib. Baki-xeber.com xarici mediaya istinadən xəbər verir ki, Braziliya isə Almaniya kansleri Angel Merkelin də dəstəklədiyi Makronun təklifə sərt reaksiya verib.
"Bizim evimiz yanır. Sözün həqiqi mənasında. Planetimizin oksigeninin 20 faizini istehsal edən Amazon tropik meşəsi yanır. Bu, beynəlxalq bir böhrandır” - Fransa prezidenti Twitter hesabında yazıb. Onun sözlərinə görə, məsələ G-7 sammitində müzakirəyə çıxarıla bilər.
Makronun təklifini Almaniya kansleri Angel Merkel də dəstəkləyib.
Braziliya prezidenti Cair Bolsonaro isə Makrona elə Twitter-dən cavab verib. “Fransa prezidentinin bölgə ölkələrinin iştirakı olmadan “Amazon yanğını G-7 sammitində müzakirə edilsin” təklifi XXI əsrə uyğun olmayan müstəmləkəçi zehniyyəti xatırladır” – Bolsonaro deyib.
O deyib ki, Braziliyaya Amazon üçün pul göndərən ölkələr bunu xeyriyyə üçün deyil, “bizim suverenliyimizə müdaxilə etmək məqsədilə” edir.
Dünyanın ən böyük tropik meşələrinin olduğu Braziliyada bir ildə 72 mindən çox meşə yanğını baş verdiyi deyilir. Braziliya Milli Kosmik Tədqiqatlar İnstitutunun (INPE) məlumatına görə, bu il ölkədə 72 min 843 yanğın baş verib. Bu isə 2018-ci ilin eyni mövsümündəki yanğınlarla müqayisədə 83 faiz çoxdur.
Amazon tropik meşələrində baş verən minlərlə yanğın mühüm və əvəzolunmaz ekosistemin böyük hissəsini məhv edə bilər. ABŞ-ın peyk görüntülərində Amazonda baş verən minlərlə yanğın səbəbilə Cənubi Amerikanı tüstü bürüdüyü göstərilir.
Ətraf mühit fəalları yanğınlara görə Bolsonaronu günahlandırır və onun fermerləri və digərlərini torpaqları yandırıb, oradan otlaq kimi istifadə etməyə təşviq etdiyini bildirir. Bolsonaro Amazonu kəşf olunmalı iqtisadi resurs adlandırıb. Bolsonaro həmçinin heç bir sübut irəli sürmədən maliyyə itirən qeyri-hökümət təşkilatlarını onu “devirmək üçün” qəsdən yanğına səbəb olmaqda günahlandırıb. Lakin o, deyib ki, fermerlər də qanunsuz şəkildə yanğın başlatmış ola bilər. Bolsonaro həmçinin onun hökumətinin bu cür nəhəng ərazidəki yanğını sönüdürmək üçün kifayət qədər ehtiyatının olmadığını bildirib.
Braziliyanın yerli əhalisinin, eləcə də minlərlə məməli, quş və sürünənlərin böyük bir hissəsi Amazonda yaşayır.
