ABŞ-la Türkiyə Suriyanın şimalında təhlükəsizlik zonası yaradılması ilə bağlı razılığa gələ bilmir. Türkiyənin artıq sözügedən bölgələrdə PKK-nın Suriya qanadı saydığı PYD/YPG-yə qarşı hərbi əməliyyatlara başlayacağı qaçılmaz görünür.
Baki-xeber.com xəbər verir ki, Ankaradan əməliyyatların çox yaxında başlayacağı mesajları verilir. Türkiyə Prezidenti Rəcəb Tayyib Ərdoğan Türkiyənin çox yaxın vaxtda Suriyanın şimalında hərbi əməliyyatlara başlayacağını bir daha təkrarlayıb. “Bu gün Türkiyə Suriyanın şimalında əməliyyatlara başlamasa, o zaman gələcəkdə daha ağır bədəl ödəyəcək. Suriyanın şimalında terror bataqlığını qurutmaq ölkəmizin ən önəmli məsələlərindən biridir. "Fərat Qalxanı" və "Zeytun Budağı" ilə başlatdığımız sülh prosesi inşallah çox yaxında fərqli bir səviyyəyə keçəcək. Türkiyənin təhlükəsizliyi NATO-nun və bütün bölgəmizin təhlükəsizliyi deməkdir", - Ərdoğan qeyd edib.
Ərdoğanın bu açıqlamasından əvvəl isə Pentaqon rəhbəri bəyan edib ki, ABŞ bölgədəki müttəfiqi olan, əsasən kürdlərdən ibarət “Demokratik Suriya Qüvvələri”nə hücumun qarşısını alacaq. Türkiyənin Suriyanın şimalında əməliyyat keçirməsinin qəbuledilməz olduğunu deyən ABŞ-ın Müdafiə naziri Mark Esper bildirib: "Birləşmiş Ştatlar Suriyanın şimalında qarşılıqlı maraqları təkrarən alt-üst edəcək birtərəfli hücumların qarşısını alacaq. Ankara ilə razılaşma əldə edəcəyimizə ümidliyəm".
Türkiyə sərhəd boyu Suriya ərazisində 32 km enində təhlükəsizlik zolağının yaradılmasını istəyir, ABŞ isə son müzakirələrdə zolağın eninin 15 km olmasını təklif edib. Ankara bununla razılaşmır, çünki kürd PYD-nin nəzarətində olan Türkiyə üçün təhlükə yaradan əsas bölgələr ABŞ-ın təklif etdiyi 15 km-lik zolaqdan kənarda qalır. Yəni ABŞ PYD-ni sərhəddən çox da uzaqlaşdırmaq istəmir, Ankara isə bunu israrla tələb edir və belə olmadığı halda bölgədə hərbi əməliyyat keçirəcəyinə dair bəyanatlar verir ki, bu da iki NATO ölkəsi arasında gərginliyi artırır.
Digər tərəfdən Türkiyənin hədəfində olan bölgələrdə böyük neft yataqları mövcuddur ki, bu gün həmin yataqları ABŞ-ın dəstəklədiyi kürd silahlı qrupları istismar edir və təbii ki, burada ABŞ-ın da payı var. Ən azından PYD-nin əldə etdiyi neft qazancının böyük bir qismi silah qarşılığında ABŞ-a verilir. Bütün bunlara görə ABŞ-ın Türkiyənin hərbi müdaxiləsinə qarşı çıxması təbiidir.
Bununla belə Türkiyənin hədəfində olan sözügedən bölgədə amerikalı əsgərlərin də mövcudluğu hərbi əməliyyatların başlayıb-başlamayacağını sual altına alır. Ancaq bütün hallarda Türkiyə təhlükəsizlik zonası yaradılması məsələsində israrlıdır – danışıqlarla, ya da hərbi yolla...
Pentaqon rəhbərinin “Türkiyənin birtərəfli hücumlarının qarşısını alacağıq” bəyanatından sonra Türkiyə hərbi əməliyyatlara başlayacağı halda ABŞ-ın hansı addımlar atacağı sualı ortaya çıxır. Rusiyanın “Sputnik” xəbər agentliyi yazır ki, ABŞ Türkiyənin qarşısını almaq üçün əlindən gələni edəcək. Sayta açıqlama verən rusiyalı ekspert Yevseyev iddia edir ki, ABŞ xüsusilə Türkiyənin hərbi hava qüvvələrindən yararlanmasına mane olmağa çalışacaq.
“Əsas məsələ budur ki, ABŞ-ın bu bölgələrdə marağı var. Onlar Suriyadan çıxmaq niyyətində deyil. Sadəcə “gedirik” bəyanatları ilə Böyük Britaniya və Fransanı bölgəyə çəkməyə çalışırlar” – ekspert bildirib.
Ekspertin fikrincə, ABŞ Türkiyənin hücumunun qarşısını almağa çalışacaq, ancaq ordunun artileriya hücumunun qarşısını ala bilməyəcək: “Buna görə də DSQ silahlılarını Deyr əz-Zordan geri çəkə bilər. ABŞ Türkiyə ilə münasibətləri tam pozmaq istəmir, onsuz da münasibətlər yaxşı deyil. Eyni zamanda DSQ-ni də əlindən buraxmaq istəmir. Çünki bu ABŞ-ın bölgədə dəstəksiz qalacağı və Suriyada təsirini itirəcəyi demək olar.
Artilleriya hücumları, xüsusi qrupların bu bölgədə əməliyyatları ola bilər, çünki bu bölgədən Türkiyəyə təhdidlər davam edir".
TAHİR
