ABŞ Prezidenti Donald Tramp nüvə anlaşmasından geri çəkilməsi, ardınca Fars körfəzində üz-üzə gəldikləri İranla bağlı sosial media hesabında yeni açıqlama verib.
Baki-xeber.com xarici mediaya istinadən xəbər verir ki, Tramp mesajında İranın heç vaxt müharibədə qalib gəlmədiyini yazıb.
"Unutmayın, İran heç vaxt müharibədə qalib gəlməyib. Lakin danışıqlarda da heç vaxt məğlub olmayıb" - Tramp bildirib.
Bu arada, Tramp Rusiya və İran məsələsində fikir ayrılığı yaşadığı Milli Kəşfiyyat Direktoru Den Koutsun gələn ay istefaya gedəcəyini bildirib. Bu vəzifədə olduğu müddətdə Kouts və Ağ Ev arasında kəşfiyyat siyasəti ilə bağlı kəskin fikir ayrılıqları müşahidə edilirdi. ABŞ-ın Milli Kəşfiyyat Agentliyinin direktoru vəzifəsinə 2017-ci ilin mart ayından başlayan Den Koutsla Tramp arasında bir sıra məsələlər, o cümlədən, Birləşmiş Ştatların Rusiya, Şimali Koreyanın nüvə proqramı və İranın 2015-ci il nüvə razılaşmasının şərtlərinə əməl edib-etmədiyi kimi kəşfiyyat siyasətinə dair önəmli məsələlərdə fikir ayrılıqları mövcud idi.
Den Kouts istefa məktubunu Prezident Trampa bazar günü təqdim edib. Tramp isə Twitter səhifəsində yazdığı mesajında Koutsun avqustun 15-də vəzifəsini tərk edəcəyini elan edib və ona göstərdiyi xidmətə görə təşəkkürünü bildirib. O, Milli Kəşfiyyat Agentliyinin direktoru vəzifəsinə Texas ştatından respublikaçı konqresmen və Trampa loyal olan Con Ratkliffin nominasiyasını irəli sürəcəyini deyib.
Qeyd edək ki, ABŞ dövlət katibi Mayk Pompeo bazar ertəsi Tehrana gedib danışıqlar təklif etdiyini, lakin İranın buna razılıq vermədiyini açıqlayıb.
Onu da xatırladaq ki, Tramp 2018-ci ildə İranla dünya qüdrətləri arasında Tehranın nüvə proqramının məhdudlaşdırılması qarşılığında iqtisadi sanksiyaların aradan qaldırılmasını nəzərdə tutan razılaşmadan çıxıb.
