Rusiya prezidenti Vladimir Putinin bilinən iki qızından başqa iki də oğlunun olduğu iddia edilir. Kreml əleyhdarı olan Rusiyanın VChK-OGPU saytı, Putinin gimnast sevgilisi Alina Kabayevadan birinin dörd, digərinin isə 10 yaşında iki oğlu olduğunu iddia edib. Xəbərə görə, 10 yaşlı İvan Vladimiroviç Putin ilk dəfə görüntülənib.
İvan "Rusiyanın ən gizli və yəqin ki, ən tənha uşağı" kimi təsvir edilir. "Bu, İvan Vladimiroviç Putindir. O, digər uşaqlarla çətinliklə ünsiyyət qurur, bütün vaxtını cangüdənlər, dayələr və müəllimlərlə keçirir", - məlumatda deyilir.
İvanın Vladimir adında 4 yaşlı qardaşının da olduğu iddia edilir.
“Dailymail” yazır ki, Rusiya lideri Putin 41 yaşlı gimnast Alina Kabayeva ilə münasibətini heç vaxt təsdiqləməyib. Rusiya lideri müsahibəsində "Şəxsi həyatıma müdaxiləyə icazə vermərəm. Buna hörmət edilməlidir" deyib. Amma bir neçə ay əvvəl sual-cavab zamanı Putin azyaşlı uşaqları ilə nağıl filmlərinə baxdığını bildirib.
Putinin Kabayevadan 4 övladının olduğu da iddia edilir. Lakin rusiyalı jurnalistlər onun yalnız iki oğlunun şəxsiyyətini müəyyənləşdirə biliblər. Bildirilir ki, uşaqlar çox təhlükəsiz ərazidə, gözdən uzaqda yaşayırlar. Rusiya liderinin övladları üçün Britaniya və Yeni Zelandiya vətəndaşlarını müəllim tutduğu, Ukrayna müharibəsi başladıqdan sonra isə müəllimləri Cənubi Afrika vətəndaşları ilə əvəz etdiyi iddia edilir. Uşaqların Federal Mühafizə Xidmətinin əməkdaşları tərəfindən qorunduğu bildirilir. Onların məktəbə getmədikləri, son rus çarının övladları kimi Putinin saraylarında təhsil aldıqları qeyd edilir.
Digər tərəfdən, 72 yaşlı Putinin iki qızından nəvələrinin olduğu da bildirilir. Qızlarından Mariya Vorontsovanın 39, Katerina Tixonovanın isə 38 yaşı var.
TAHİR
