ABŞ-ın sabiq ermənipərəst senatoru Bob Menendezin həyat yoldaşı Nadine Menendez bazar ertəsi ərinə siyasi dəstək qarşılığında rüşvət almağa vasitəçilik etməkdə təqsirli bilinib.
Nyu-York Federal məhkəməsi Bob Menendezi rüşvət, ədalətə maneçilik və sui-qəsd də daxil olmaqla müxtəlif ittihamlarla məhkum etmişdi. Cinayət işinə təxminən 1 milyon dollar pul, qızıl külçələr və dəbdəbəli avtomobil əlavə olunmuşdu.
Prokurorlar bildiriblər ki, sabiq senatorun erməniəsilli həyat yoldaşı Nadine Menendez ərindən kömək istəyən şəxslərlə görüşlər və sövdələşmələr təşkil etmək üçün vasitəçilik edib. O, ödənişləri toplamaqda və sxemi gizlətməkdə ittiham edilib.
ABŞ mediasında yayılan xəbərlərə görə, prokurorlar məhkəmədə bu əməllərin açıq-aşkar korrupsiya faktı olduğunu bəyan ediblər. Müttəhim hərəkətlərinin qanunsuz olduğunu bildiyini, lakin buna baxmayaraq vasitəçilik fəaliyyətinə davam etdiyini bildirib. Onun barəsində iyunun 12-də hökm oxunacaq və senatorun həyat yoldaşını bir neçə il həbs cəzası gözləyir.
Demokratların Nyu-Cersi ştatından uzun müddət senatoru olmuş Bob Menendez bu ilin yanvarında rüşvət, qəsb və korrupsiya ittihamları ilə cəzasını federal həbsxanada çəkməklə 11 il müddətinə azadlıqdan məhrum edilib. Nyu-York Federal məhkəməsi onu keçən ilin iyul ayında yüz minlərlə dollar rüşvət almaqda və qeydiyyatdan keçməmiş xarici agent kimi fəaliyyət göstərməkdə təqsirli bilib.
ZÜMRÜD
