Trampın Avropa da daxil olmaqla dünyanın demək olar ki, bütün ölkələrindən idxala rüsumlar tətbiq etməsindən sonra İtaliyanın baş naziri Giorgia Meloni Vaşinqtona uçan ilk Avropa lideri oldu. Meloni ideoloji cəhətdən Trampa yaxın olan “İtaliya Qardaşları” milli-mühafizəkar partiyasını təmsil edir və Tramp ümumilikdə Avropa İttifaqına mənfi münasibət bəsləsə də, Meloni üçün bu istisnadır. Və o, Trampın andiçmə mərasimində yeganə Avropa lideri idi.
"Düşünürəm ki, o, gözəl baş nazirdir və fantastik dərəcədə yaxşı işləyir. O, dünyanın əsl liderlərindən biridir", - deyə Tramp qapalı danışıqlardan əvvəl bildirib. Eyni zamanda, Meloni tamamilə Avropayönlü siyasətçidir; o, Aİ ölkələrinin birliyini və inteqrasiyasını dəstəkləyir və bundan əlavə, Ukraynanı və Rusiyaya qarşı müxalifəti fəal şəkildə dəstəkləyir. Beləliklə, digər Avropa liderləri ümid edirlər ki, o, Trampı Aİ ilə ticarət razılaşmasına nail olmağa və böyük ticarət müharibəsindən yayınmağa sövq edə bilər. Danışıqlar başlamazdan əvvəl Giorgia Meloni səfərinin məqsədinin danışıqlara başlamaq və Trampı İtaliyaya dəvət etmək olduğunu, onunla və digər Avropa liderləri ilə görüş təşkil etməyə ümid etdiyini bildirib. Danışıqlardan sonra İtaliyanın baş naziri Trampın Romaya dəvəti qəbul etdiyini bildirib. Meloni danışıqlardan sonra mətbuat konfransına Trampla solçu ideologiya və DEI (müxtəliflik, bərabərlik və daxilolma) siyasətlərinə qarşı mübarizədə müttəfiq olduqlarını bəyan etməklə başladı. Onun fikrincə, bu ideologiyanın daşıyıcıları Qərb ölkələrinin tarixini məhv etmək istəyirlər. Ağ Evdən olan BBC müxbirlərinin verdiyi məlumata görə, Tramp Meloninin fikriylə razılaşmaq əlaməti olaraq başını tərpətdi. Meloni daha sonra Trampın “Amerikanı yenidən möhtəşəm et” şüarını dəyişdirərək deyib ki, ABŞ və Avropa birlikdə “Qərbi yenidən möhtəşəm etməliyik”. BBC-nin Avropa məsələləri üzrə müxbiri Laura Qoççii Meloni-nin açıqlamalarını yekunlaşdıraraq bildirib ki, o, Trampla münasibətlərində “bütün düymələri düzgün basmağa” çalışıb. Mətbuat konfransı zamanı jurnalistlər Tramp və Meloniyə Ukrayna ilə bağlı bir neçə sual veriblər. Meloni açılış nitqində bir daha ABŞ və Avropanın birləşməli olduğunu vurğulayıb: “Biz Ukraynanın azadlığını birlikdə müdafiə etdik və birlikdə də davamlı sülhə nail ola bilərik”. Maraqlıdır ki,Tramp Ukrayna prezidenti Vladimir Zelenskini müharibəyə başlamaqda ittiham etmədiyi qənaətinə gələn fikirlər səsləndirib. "Mən müharibədə Zelenskini məsuliyyət daşıdığını demirəm, amma bu müharibənin başlaması məni çox həyəcanlandırır. Mən onu günahlandırmıram, sadəcə deyirəm ki, onun əla iş gördüyünü deməyəcəm. "Mən böyük fanat deyiləm" deyə Tramp vurğulayıb. Jurnalistlər Trampdan yeni sanksiyalar tətbiq etməzdən əvvəl atəşkəs təkliflərinə cavab vermək üçün Putinə nə qədər vaxt verəcəyini soruşublar. Tramp cavab olaraq yalnız bu həftə Rusiyadan bir növ cavab alacağını bildirib.
Surxay Əliyev
