Eyyub Hüseynov: “Təəssüflər olsun ki, Azərbaycanda GMO-nun tərəfdarları var və get-gedə onların sayı artır”
Bu gün dövlətləri də, insanları da düşündürən əsas məsələlərdən biri qida təhlükəsizliyi ilə bağlıdır. Təəssüf ki, müasir dünyada qida təhlükəsizliyinin tam olaraq təmin olunmasına nail olmaq mümkünsüzdür. Nə qədər ki, geni dəyişdirilmiş məhsulların istehsalı davam etdiriləcək, o qədər də insanların sağlam qida məhsulları ilə təmin olunması sual altında qalacaq.
Azərbaycan qanunvericiliyinə və müxtəlif rəsmi sənədlərə görə, ölkəmizdə genetik modifikasiya olunmuş (GMO) məhsulların yetişdirilməsi, eləcə də onların ölkəmizə idxal edilməsi qadağandır. Hətta aidiyyəti qurumlar bəyan ediblər ki, bu məhsulu ölkəmizə gətirənlər ciddi şəkildə cəzalandırılacaqlar. Bu mövzu uzun illərdir mətbuatın gündəmində özünə yer tutur. GMO-nun insan orqanizminə vurduğu zərbələr haqqında dəfələrlə müzakirələr açılıb, mütəxəssis rəyləri təqdim edilib. Lakin qeyd etdiyimiz kimi, bu məhsulların Azərbaycana idxalı hələ də mövcuddur. Bəzi iddialara görə, ölkəmizdə də GMO məhsulları becərilir.
Ekspertlər qeyd edirlər ki, GMO məhsulların istehsalına keçən əsrin 70-ci illərdən başlanıb. Son dövrlər isə dünyanı caynağına alan bu məhsullar sağlamlıq kabusuna çevrilib.
Azərbaycana GMO məhsullarının idxal edilməsi məsələsi hazırda da müzakirə edilir. Ölkəmizə geni dəyişdirilmiş məhsulların xarici ölkələrdən, əsasən də İran və Türkiyədən gətirildiyini deyən Azad İstehlakçılar Birliyinin sədri Eyyub Hüseynov mövzu ilə bağlı “Bakı-Xəbər”ə bildirdi ki, həm BMT-nin biomüxtəlifliyin qorunması haqqında sənədləri, həm Azərbaycanda qəbul edilən rəsmi qərarlar GMO məhsullarının istehsalını və idxalını qadağan edir. Bütün dünyada GMO-nun yayılması prosesinin getdiyini deyən E.Hüseynovun sözlərinə görə, GMO məhsullarının ölkəmizə gətirilməsinin qarşısı alınmalıdır. Azərbaycanın məhsuldar torpağının və işçi qüvvəsinin olduğunu əsas gətirən E.Hüseynov hesab edir ki, ölkəmizə GMO lazım deyil. GMO-nun ətraf mühitin biomüxtəlifliyini pozduğunu vurğulayan E.Hüseynov qeyd etdi ki, aidiyyəti dövlət qurumları bu hala qarşı mübarizəni gücləndirməlidirlər. “Mən neçə ildir deyirəm ki, ölkəyə GMO məhsulları gətirilir. Geni dəyişdirilmiş məhsulların ölkəmizə daxil olmasının qarşısını yalnız mükəmməl ekspertiza ilə almaq mümkündür. Təəssüflər olsun ki, Azərbaycanda GMO-nun tərəfdarları var və get-gedə onların sayı artır. Hətta Qida Təhlükəsizliyi Agentliyi də bu halın qarşısının alınması üçün işlər görmür”.
Prezident İlham Əliyevin GMO əleyhinə bir sıra sənədlər imzaladığını deyən E.Hüseynovun sözlərinə görə, bu sənədlərin tələblərinə əməl edilməlidir. O hesab edir ki, qanunun tələbləri çərçivəsində GMO-ya qarşı mübarizə aparılmalıdır. Bu gün bir sıra şirkətlərin geni dəyişdirilmiş məhsullar istehsal etdiyini deyən müsahibimiz hesab edir ki, o məhsullar insanlara böyük zərər vurur. O, həmçinin, vurğuladı ki, Qida Təhlükəsizliyi Agentliyi Azad İstehlakçılar Birliyi ilə yaxından əməkdaşlıq etməli olduğu halda, lakin əməkdaşlıq etmək istəmir.
İradə SARIYEVA
