“Ölkəmizdə ayrı-ayrı sahələrin inkişafı imkan yaradır ki, bu sahələr üzrə yeni lüğətlərimiz hazırlansın” “Bu sahədə lüğətşünaslıq öz işini görməlidir”
Azərbaycanda elm, texnika, kənd təsərrüfatı, eləcə də tibb sahəsilə bağlı terminlər lüğətinin nəşr edilməsi zərurətə çevrilib. Bu istiqamətlərdə çalışan mütəxəssislərin sözlərinə görə, həmin sahələrdə yeni terminlər mövcud olsa da, o terminlər lüğət şəklində nəşr edilmir, edilsə də, onların sayı hədsiz dərəcədə məhdud olduğundan, əməkdaşlar üçün əlçatan olmur.
Müxtəlif sahələr üzrə terminlər lüğətinin nəşr edilməsinin olduqca vacib olduğunu deyən Azərbaycan Dövlət Pedaqoji Universitetinin Müasir Azərbaycan Dili Kafedrasının müdiri, filologiya elmləri doktoru, professor Buludxan Xəlilov “Bakı-Xəbər”ə bildirdi ki, istər elmi-texniki, istərsə də digər sahələrdə terminlər lüğəti çap olunur, ancaq onların tirajı çox az olduğu üçün, bu sahələrdə çalışanların hamısına çatmır. B.Xəlilov vurğuladı ki, bu istiqamətdə fəaliyyət gücləndirilməli və çap edilən terminlər lüğətlərinin tirajı qaldırılmalıdır. “Bu gün müxtəlif sahələr üzrə lüğətlərin nəşr edilməsi olduqca vacibdir. Müxtəlif sahələr üzrə lüğətlərin çap olunması həmin sahələrin inkişafı ilə bağlıdır. Etiraf edək ki, vaxtilə bizdə texnika sahəsinin zəif inkişaf etməsi bu sahədəki lüğətşünaslığı da bəsit formaya salıb. Bu gün biz müstəqilik və ölkəmizdə ayrı-ayrı sahələrin inkişafı imkan yaradır ki, bu sahələr üzrə yeni lüğətlərimiz hazlansın. Ona görə də, demək olmaz ki, texniki sahədə lüğətlər yoxdur, var, ancaq çeşidi və tirajı çox azdır. Çünki texnikanın özünün də müxtəlif sahələri var və bizim bütün istiqamətləri əhatə edən lüğətimiz yoxdur. Heç şübhəsiz ki, bu sahədə lüğətşünaslıq öz işini görməlidir” - deyə bildirən B.Xəlilov qeyd etdi ki, lüğətşünaslığın mövcud olması həmin sahələrin inkişafına təkan verir. “Nəinki texnika sahəsinə, eləcə də hüquq, tibb, siyasət, elmin müxtəlif sahələrinə aid çoxtirajlı lüğətlərin nəşr edilməsi çox lazımdır. Biz əvvəllər rus dilində olan lüğətlərdən istifadə edərdik. İndi isə dövlətimizin öz dili var, bütün lüğətlər öz dilimizdə olmalıdır” - deyə B.Xəlilov vurğuladı.
İradə SARIYEVA
