Ruslan Quliyev: “Azərbaycanın sağlamlıq turizminə təkcə əcnəbi turistlər deyil, yerli turistlər də maraq göstərirlər”
Tibbi turizm yaşadığın ölkənin hüdudlarından kənarda tibbi xidmət almaq, istirahətlə yüksək səviyyəli müalicə almağı özündə əks etdirən bir termindir. Qeyd edək ki, bir neçə il bundan öncəyə qədər xəstələr tibbi turizm xidmətlərindən istifadə etməyə çəkinirdilər. Ancaq indi vəziyyət müsbətə doğru dəyişib. Tibbi turizm şirkətləri xəstəliyə, eləcə də xəstənin maddi vəziyyətinə uyğun xəstəxana seçimində, həkimə xəstənin şikayətlərinin daha dəqiq şəkildə çatdırılmasında, ən yaxşı ixtisas həkiminin müəyyən edilməsində köməklik göstərirlər.
Azərbaycanda tibbi turizm sahəsi artıq inkişaf edir. Həm müalicə almaq, həm də istirahət etmək məqsədilə ölkəmizə gələn turistlərin sayı ildən-ilə artır. Azərbaycanın bir sıra sağlamlıq istirahət mərkəzləri var. Onlardan, Qalaaltı, Naxçıvanda Duzdağ, Naftalan və digərlərini misal göstərmək olar. Danılmaz faktdır ki, Naftalan dünyada analoqu olmayan sağlamlıq mərkəzidir və dünyanın istənilən ölkəsinin vətəndaşı istirahət üçün həmin məkana üz tutur.
Açıqlanan statistik rəqəmlərə əsasən, tibbi müalicə məqsədilə Azərbaycana səfər edən turistlərin sayı 2019-cu ildə 18 faiz artacaq. 2018-ci ilin yanvar-noyabr aylarında tibbi müalicə məqsədilə Azərbaycana səfər etmiş turistlərin sayı ötən ilin eyni dövrü ilə müqayisədə 30 faiz artıb.
Ekspertlərin fikrincə, qarşıdakı illərdə tibbi müalicə məqsədilə ölkəyə gələcək turistlərin sayının artması gözləniləndir.
Azərbaycan Sağlamlıq və Termal Turizmə Dəstək Assosiasiyasının sədri Ruslan Quliyev “Bakı-Xəbər”ə açıqlamasında qeyd etdi ki, Azərbaycanda müalicə turizminin inkişafı üçün daha böyük imkanlar var. Ölkəmizin təbiəti, iqlim müxtəlifliyi turizmin bu növü üçün əlverişli şərait yaradır: “Burada əsasən müalicəvi Naftalan nefti, duz mədənləri, palçıq vulkanları, bulaqlar və mineral sular, termal qaynaqlar üstünlük təşkil edir. Son illər bu sahənin inkişafını təmin etmək məqsədilə müxtəlif qanunlar qəbul edilib. Xüsusilə Xəzərboyu ərazilərdə kurort, sanatoriya və digər istirahət yerləri üçün əlverişli şərait yaradılıb”.
Onun sözlərinə görə, sağlamlıq turizminə hər zaman maraq yüksək olub. Tibbi turizm elə bir sahədir ki, bu, mövsümi olmur, hər zaman aktualdır: “Bu gün üçün təkcə Naftalan müalicəvi tibb mərkəzini 70-dən çox ölkədən 45 mindən artıq turist ziyarət edib. İlin sonuna qədər bu göstəricinin daha da artacağı gözlənir. Bura gələnlər arasında Rusiya, Qazaxıstan və Özbəkistandan olan turistlər çoxluq təşkil edir”.
Həmsöhbətimiz onu da qeyd etdi ki, ölkəyə sağlamlıq məqsədilə gələn turistlər əsasən Duzdağ, Naftalan və Qalaaltına üstünlük verirlər. Həmçinin, infrastrukturun inkişaf etməsi müalicə məqsədilə ölkəyə gəlmək istəyən turistlərin sayına təsir edir.
Ekspert onu da vurğuladı ki, sağlamlıq turizminə təkcə əcnəbi turistlər deyil, yerli turistlər də maraq göstərirlər. Onun fikrincə, bu sahənin daha da inkişaf etməsi üçün maarifləndirmə işi sürətləndirilməlidir.
Günel CƏLİLOVA
